“Ro tegø kja na ñiñi a Sierra Leona, nge k’o o mama e Dauda. D’a nu paa ma kja mi tsʼitr’igø, in pjamiliagø ma chu̱ji ko nrro nandyo bʼedyi na perazo juajma, i nrre d’a bʼedyi mi manji ke mi nge in tsjaajik’ꞹ. Nakʼua o ma zopji ke ro e̱je̱ d’a brujo ngek’ua ro mama kjo mi kjaaja k’e juajma. k’e brujo o unꞹ d’a bʼɇzo ke ro penchʼi d’a jñeje, kjanu o ngobʼꞹ ko d’a tr’oxbitu. Dya go mezhe ma k’e bʼɇzo ke o ngobʼꞹji ma go mbꞹrꞹ go mbii i me mi pib’i o ngꞹre. k’e brujo o jñech’e kja k’e jñeje i kjanu o mapjꞹ: ‘¡ri janrra d’a bʼɇzo ke a pale i ba chezhi! Jee tr’oxbitu. Na nrra i a tita, me na tr’oxjñi, i me jñꞹkꞹ ga nzhodʼꞹ’.

“¡Ma mama jama kjaa in ­landegø! Nakʼua, me mi søø i mi mapjꞹ: ‘¡Ma dya gi kreoji k’o rna jandagø, chjⱥd’ⱥji i ñuts’eji kja ne jñeje!’. ¡Zø dya kjo go nee ro ma jñanrrak’o! K’e brujo go juejme k’e bʼɇzo ma go xispi nrreje ko k’o pjindyo mágico ke je mi tunꞹ kja d’a mu̱u̱.

“K’e bʼɇzo ke mi tuʼu k’e jñeje o mama ke in palegø go mama ke in bʼedyigø mi kjaaja k’e juajma, i o xipji ke in nitagø ro pɇpjik’ꞹ i dya ro søxi. Nakʼua k’ꞹ daja k’e bʼedyi go mama ke ma joo akjanuma.”

Nu a África occidental b’ꞹnk’o jokji yo nrrumꞹ akjanu. Xo kja texe nu xoñijoma b’ꞹnk’o xo kjaaji akjanu, nange kjijñiji ke texe yo ya nrru̱u̱ xi bʼꞹbʼꞹji nu ja ka̱ra̱ yo espíritu, eñe ndizinu janrraji texe yo ntee kja ne Xoñijoma i xe pje søø ra tsjaapji. ¿Na kjuanadyayo? ¿Na kjuana ke yo ya nrru̱u̱ ja xi b’ꞹntrji? Ma dya je ga kjanu, ¿kjo ngemayo manji ke ngeji yo espíritu k’o ya nrru̱u̱? K’ꞹ ra pa̱ra̱ji k’o na mejme kja yo trʼønꞹ ra mbøxkꞹji na punkjꞹ. Ra søø ra tsjaakji ra minji texe yo paa.