E Dauda wino wakulizile mu kaya kamwi ku Sierra Leone watili “Impindi yimwi lyo ncili ne mulumendo twatalisile ukulwila impanga nu lupwa lumwi. Swensinye twatinji ampanga yitu. Pa kuputula umulandu twisile e sing’anga. Wizile asenda e mila apa umuntu winji nga amuvwimba nu mwenda uwutiswe. Paponye weyo umuntu wino walinji mu mwenda watalisile ukuzakaza nu kutwinka. Walile pano walola mwe mila wapunzile ati: ‘Nalola umonsi umukote akwiza azwite imyenda imitiswe. Amutali swinya ali ni mvwi akupita akongowile.’

“Walolanga e Tatakulu umulowe! Apano atalika ukusawayila swinya apunda ati: ‘Nga mukuti nkuwipa zanji muyilolele mwe weneco!’ Kweni pe sweswe patalinji nanti wenga wino wayileko, twatinile! Twizile atulola vye e sing’anga wamusansila imilembo yino wawisile mu kalanga kano walemile. Avino weyo umuntu walesile nu kusawayila.

“E Tatakulu wanenile umonsi wino walolecesyanga mwe mila ukunena awantu ati impanga yalinji aya lupwa lwitu. Swinya e mbuya azipizile ukulima mwe yo-o impanga ukwasowa ukusakamala nanti cimwi. Ulupwa lunji lwazumizile vino tatakulu walanzile. Avino nu mulandu wasizile.”

 Ivya musango wo-o vyazeka sana ku West Africa. Awavule wazumila ukuti awafwe wakatwalilila nu wumi ku cifulo cimwi kuno wakakwavwa nanti ukucuzya awantu. Uzye co-o, acisinka? Nga ca kuti asa cisinka, lyo awaweni wano wakakatuka iviwa? Ukumanya ivyasuko kwe ya-a amawuzyo kwacindama nkaninye. Amuno kungalenga twize tufwe nanti twize tupusuke.