UDauda owase-Sierra Le-one uyalandisa: “Ngakhulela emzini omncane osesabelweni esisenyakatho. Ngisesengumfanyana kwake kwaba lengxabano phakathi kwemuli yakwethu lenye kubangwa umhlabathi. Bonke babesithi umhlabathi lo ngowabo. Kwabizwa inyanga ukuthi izoxazulula le ndaba. Yanika enye indoda isibuko yasiyembathisa ilembu elimhlophe. Kungakayi ngaphi indoda le yaqala ukuqhuqha, yaginqa. Lapho ikhangela esibukweni yababaza, ‘Ngibona indoda egugileyo isiza! Igqoke okumhlophe, inde, ilenwele ezimhlophe njalo ihamba ikhotheme kancane.’

“Yayibona ukhulu wami! Yaqalisa ukwethuka yasimemeza isithi: ‘Nxa licabanga ukuthi ngilamanga wozani lizozibonela!’ Kakho phakathi kwethu owaba lesibindi sokukwenza lokhu. Inyanga le yathulisa lindoda ngokuyichela ngomuthi owawulamahlamvu lamanzi owawuseqhageni.

“‘Ukhulu’ ekhuluma esebenzisa indoda yesibuko wathi umhlabathi wawungowemuli yethu. Watshela ugogo ukuthi angesabi ukulima umhlabathi lo. Enye imuli le yasamukela isahlulelo lesi, indaba yaxazululwa.”

 Indaba ezinje zijayelekile e-Africa eseNtshonalanga. Lapha njengakwezinye indawo zomhlaba, izigidi zikholwa ukuthi abantu abafileyo baya endaweni yemimoya, lapho abenelisa ukuhlola njalo babe lengxenye empilweni zabantu abasemhlabeni. Kuliqiniso yini lokhu? Abafileyo bayaphila yini? Nxa bengaphili ngobani abazithi bayimimoya yabafileyo? Ukuzazi izimpendulo eziqondileyo zemibuzo le kuqakatheke kakhulu. Yindaba yokufa lokuphila.