Hastiin Dauda wolyéego Sierra Leonedę́ę́ʼ nagháago nihił halneʼ: “Łaʼ kin dashijaaʼígi náhookǫsjígo hazʼánígi ákweʼé níyá. Tʼah díí ashkii yázhí nishłínéedą́ą́ʼ tʼáá nihikʼéí bił ałkʼijįʼ saa hazlı̨́ı̨́ʼ kéyah biniinaa. Tʼáá ałchʼíjí éí shíshi kéyah dadííniid. Házhóʼó hashtʼéii hodoonííł biniiyé hataałii léiʼ sóoztʼéʼ. Áko náánáłaʼ hastiin léiʼ biiʼ adéestʼı̨́ı̨́ʼ yeeníʼą́ áádóó naatʼą́hí łigai léiʼ yikʼíístiʼ. Éí díí hastiin naatʼą́hí yikʼíístiʼyę́ę tʼáadoo hodííʼnaʼí bitah hodiisnáaʼgo bitah hoditsxiz dóó tó hąąh hazlı̨́ı̨́ʼ. Biiʼ adéestʼı̨́ı̨́ʼ yiih dę́ę́ʼı̨́ı̨́ʼ ńtʼééʼ áníílá: ‘Hastiin sání léiʼ shichʼįʼ yigááłgo yiiłtsą́! Ééʼ łigai léiʼ yee hadítʼéego yiiłtsą́. Jíneez dóó tʼáá yéego hastih dóó hatsiiʼ nídíníibaʼlágo hajoobááʼígo yigááł.ʼ

“Shinálí Hastiingo yaa yáłtiʼ lá! Áya hodeesyizgo hááchago ádííniid: ‘Doo shı̨́ı̨́nídlą́ą́dą́ą́ʼ tʼáá ni kodi níníłʼı̨́!ʼ Nihí éí tʼóó nídasiildzíidgo tʼáadoo daníilʼı̨́ı̨́ʼ da! Áádóó hataałii adeeʼ biiʼ azeeʼ tó bił ałtaneeziidgo yikʼíís tah.

“Hastiin biiʼ adéestʼı̨́ı̨́ʼ dah yooʼáłę́ę binahjįʼ, ‘Shinálí Hastiinʼ éí díí kéyah tʼah nihílá yidííniid. Áádóó shinálí asdzáán íidííniid kéyah binanilnish tʼáadoo baa níneʼí. Náánáłaʼ nihikʼéí bił tʼáá daʼáko daazlı̨́ı̨́ʼ. Áko áadi índída hashtʼéii hodíítʼeʼ.”

 West Africadi shı̨́ı̨́ díí átʼéego dahaneʼ. Ákweʼé dóó náánáłaʼ tʼáá ałtsogóó nihookááʼ miil biláh ánéelą́ągo diné daneeznánígíí yádiłhił biiʼ hazʼą́ągo aheeskai danízingo dayoodlą́. Áko ádeenízingo éí díí yádiłhiłdę́ę́ʼ kǫ́ǫ́ diné nihookááʼgi hadeesííd dóó yídahółníihgo deeyoodlą́. Ákótʼéego deeyoodlánígíísh éí tʼááʼaaníí? Daneeznánígíísh tʼáá dahiná? Ndagaʼgósh éí daneeznánígíí biníłchʼiʼ háí ádaatʼı̨́ daaní? Díí nidaʼádéékidígíí tsʼídá tʼááʼaanínígíí shił bééhodoozįįł nínízingo éí aláahdi ílı̨́. Nihee iinaʼígíí íiyisíí bídéétʼiʼ.