“Mi a lanta den un pueblo chikitu den e provincia di nort,” Dauda di Siera Leona ta relatá. “Un biaha, tempu mi tabata mucha, tabatin un pleitu pa un tereno entre mi famia i un otro famia. Tur dos a reclamá e mesun tereno. Pa resolvé e asuntu nan a manda yama un hacidor di brua. El a duna un otro homber un spiel, despues a tap’é cu un paña blancu. Pronto e homber bou dje paña a cuminsá tembla i soda. Mientras cu e tabata mira den e spiel, el a sclama: ‘Mi ta mira un homber bieu ta acercando! E ta bistí cu paña blancu. E ta haltu i bieu cu cabei blancu i e ta cana un tiki doblá.’

“E tabata describiendo mi tawela! Anto el a bira histérico i a grita: ‘Si boso no ta kere loke mi ta bisando, bin mira pa boso mes!’ Naturalmente, ningun di nos tabatin e curashi di haci esei! E hacidor di brua a calm’é dor di sprengu riba dje un mescla mágico di bladji i awa, cu e tabatin den un calbas.

“Papiando mediante e homber cu e spiel, ‘Tawela’ a bisa cu e tereno tabata pertenecé na nos famia. El a bisa mi wela cu e mester cultivá e tereno sin preocupacion. E otro famia a aceptá e huicio. E cuestion tabata resolvé.”[1]

 Tal experencianan ta comun na West Africa. Aki, mescos cu na otro partinan di mundu, miyones incontabel ta kere cu hende morto ta pasa p’e mundu di spiritu, caminda nan por observá i influenciá e bida di hende riba tera. E creencia aki ta berdad? E mortonan realmente ta bibu? Si no, ken ta esnan cu ta pretendé di ta spiritu dje mortonan? Conociendo e contesta corecto n’e preguntanan aki ta vitalmente importante. E ta un asuntu di bida of morto.