Dauda me kohsang sahpw ehu nan Aperika nda: “I tikida nan kisin wasakis nan palikapi. Ni ei kisin pwutak, mie pak me akamai en sahpw wiawi nanpwungen ei peneinei oh pil ehu peneinei. Koaros nda me sapwarail sahpwo. Pwehn kapwungala met, se likwerihedo emen sounwunahni. E kihong ohl emen kilahsenirongin ehu oh pwainkihdi ih likou pwetepwet ehu. Ohl me mi pahn likowo tepida rerrer oh pwudohdi. Ni eh kilang nan kilahso e werikihda: ‘I kilangada ohl laud men kohkohdo! E likawih likou pwetepwet. E reirei, mah, moangepwet, oh mpwokos.’

“E koasoakoasoia at pahpa kahlapo! E ahpw werida: ‘Ma kumwail sohte kamehlele dahme I ndinda, kumwail kohdo kilang!’ Ahpw sohte emen reht me kommwad en wia met! Sounwunahnio eri usupihki pihl me dolki tehn tuhke sang nan kisin pwoatol kis oh kameleileidi ohlo.

“Ni eh doadoahngki ohl me kolokol kilahso pahn likowo, aramas me mwomwen at pahpa kahlapo nda me sahpwo sapwen at peneinei. E ndaiong at nohno kahlapo me e kak doadoahk nan sahpwo oh sohte anahne pwunodki mehkot. Peneinei teio pil pwungki koasoandio. Met kapwungala ireo.”

 Soahng wet kin wiawi wasa tohto nan sampah. Aramas tohto kin kamehlele me me melahr akan kin wiahla ngehn oh kohla ekis wasa, oh re kak kilang oh kamwakid mouren aramas nin sampah. Ia duwe, madamadau wet uhdahn mehlel? Me melahr akan kin uhdahn momour? Ma soh, ihs irail kan me kin mwomwehda ngenen me melahro? E kesempwal kitail en ese pasapengpen peidek pwukat. Met kin pidada atail mour.