Seeraaliyoonete ilaminohu Dawudda “Lophphoommohu aliyyee qoqqowira shiimu qachchiraati” yaanno. “Shiimu heeˈreenna maateˈyanna wole maate mereero baattote yekkeero no. Lamenti maate baatto ninkete yite yekkeerantanno. Konne coye tirate mitto kiilaancho woshshine abbini. Kuni kiilaanchi wolu manchira hincilaallo amadisiise waajjo hocco diwi. Kuni manchi hakkawoyitenni huxiˈranna hunkaa hanafi. Hakkiinnino hincilaallo lae ‘mittu geerchi waajjo uddano uddiˈre daanna laeemmo, hojjaameessahonna geerchoho, dananchono awuuwinoho, haˈrannohuno ukkeeti yee maalaˈle coyiˈri.’

“Kuni manchi coyiˈranni noohu ahaahiˈyareeti! Xaggeeffate: ‘Yeemmore ammana hoogginiro amme kiˈne umiˈne lae!’ yii. Addaho, mereerinkenni mittuno laˈˈate bareedinohu dino! Kiilaanchuno qoonchunni amadinoha digintete waa, darchunni wixe konne mancho sammi assi.

“Hincilaallo laˈˈanni noo manchi ragaanni, ‘Ahaahiˈya’ baatto ninkera ikkitanno gede coyiˈri. Ahaaheˈyara baatto mitte yaaddo nookkiha loosidhanno gede kulise. Wole maateno tenne yoonni sumuu yitu. Yekkeerono muro afidhu.”

 Togoo rosi galchimi Afrikira halaˈladunni rosaminoho. Wolu alamete golira miliyoonetenni kiirranni manni reyino manni uullate aana noo manna laˈˈara, kaaˈlara woy gawajjara dandaanno yee ammanannonte gede galchimi Afriki mannirano togoo ammaˈna noonsa. Togoo ammaˈna halaaleho? Addinta reyitinori heeshshote no? Ikka hoogiro reyitinore labbe shiqqannori ayeeooti? Kuriuu xaˈmo dawaro afa lowo geeshsha hasiissannota ikkasera aleenni, reyotenna heeshshote hajooti.