“Ọmọko ọvo rọhẹ ẹbẹre obohwẹre ọnre na yen me dia ghwanre,” eriyin Dauda ro nẹ Sierra Leone rhe tare. “Me vwọ hẹ omotete, orua mẹ nene orua ọfa sivwin otọ. Ayen de se ọbo rhe nẹ ọ rhe rhuẹrẹ ota na. Ọbo na da vwẹ ughegbe kẹ ọshare ọvo, ọ da je vwẹ ukpeibo vwo rhurhu ọshare na. O kriri-i, ọshare ra vwẹ ukpeibo rhurhu na kọ phariẹ, jẹ ọdja họrhọ nẹ oma rọyen cha. Ro vwo nẹ ughegbe na, o de kperi: ‘Me mrẹ ọmare ọvo rọ yan cha! O ku iwun efuanfon phiyọ. Ọshare na pha grongron, ọ djẹ esha, ọ yan gune.’

“O djisẹ rẹ Ọsẹ mẹ rode! Oshọ de muo mamọ, o de kperi: ‘Obo me ta na rhe mu ovwan ẹro-o, we gbe rhi no!’ Vwọrẹ uyota, o vwo ohwo vuọvo ro se yivwin no-o! Ọbo na da fẹrẹn ame vẹ ẹbe rọhẹ omochẹ ku ọshare na, rere ẹwẹn rọyen se vwo totọ.

“Womarẹ ọshare rọ yọnrọn ughegbe na, ‘Ọsẹ rode’ mẹ da ta nẹ otọ na ọ rẹ orua rẹ avwanre. Kọ vuẹ oni rode mẹ nẹ o brudu-u, nẹ ọ ra wian vwẹ otọ na. Orua ro chekọ na rhọnvwe phiyọ orhiẹn na. Etiyin kọyen a wan rhuẹrẹ ota na.”

 Kọke kọke yen e vwo nyo ikuegbe tiọyena vwẹ West Africa. Kirobo rọ hepha vwẹ asan efa vwẹ akpọ na, ọtiọyen iduduru ihwo rehẹ obonẹ vwẹ West Africa ji vwo imuẹro nẹ ihwo ri ghwuru kpo obo erivwin, etiyin kọyen ayen dia de nughe ji suẹn akpeyeren rẹ ihworakpọ. Ọyena ghini uyota? Ihwo ri ghwuru na ghini yerẹn? Ọ rha dia ọtiọye-en, amono keyen vwẹ oma vwo ruẹ ihwo ri ghwuru na? Ọ pha ghanghanre ra vwọ riẹn ẹkpahọnphiyọ rẹ enọ nana, kidie ọnana ota rẹ arhọ vẹ ughwu.