“Kinnuwenle mmuttetthe mwaamukhaani mu eprovincia ya onikela kuusi”, onihimya siiso Dauda a oSerra Leoa. “Nihiku nimosaa, kiri mmiravo, emusi aka ni atthu a emusi ekina yaawanela ematta. Khuta emusi yaahimya wira ematta tiyawaka. Wira ophukiwe mwaha ola, mukulukhana aahiihaniwa. Owo aahimunnya eloola mulopwana mukina ole, nuumala vo aahimukhuneela ni ekuwo yootteela. Moohipisa mulopwana ole aakhuneeliwe ni ekuwo aahipacerya othukumela ni orettheela. Emaara yaawenha awe muloolani, owo aahikhuwela oriki: ‘Kinimoona mulopwana mmosaa oowuuluvala aattamelaka! Owo owanre ikuwo sootteela. Toorakama ni oowuuluvala orina ikharari sootteelela, ni oneetta ekhupakhupa ene’.

“Mulopwana ole aahimya Ataata! Nuumala vo aahilosiwa ni aahikhuwela oriki: ‘Mwaahikupaliki enihimya aka, murwee moone mmansinyu!’ Masi, khuuvo a hiyo aalimpe murima wira opake eyo! Nto mukulukhana owo aahimmaaliha mulopwana ole omutathelaka murette ootakaaheriwa maasi ni makukhu, yaawo yaari mukahini mmatatani mwawe.

“Amwiirihaka olavula mulopwana ole aavarelenle eloola, ‘Ataata’ ale yaahimmye wira ematta ele yaari yawihu. Awo yaahaaleela apiipi wira alimeke moohixanka. Emusi ekina ele yaahaakhulela. Mwaha ole waahimala”.

 Sookumanana iya ti soolema wÁfrica Onikela Nsuwa. Mapuro ala, ni mapuro makina a elapo yotheene, imilyau sinceene sinikupali wira atthu ookhwa anirowa mapuro anikhala minepa, weiwo aniwerya aya waaweha ni waatakhaliha aahiiso waareeriha atthu akumi valaponi. Toko yookupali ela ekeekhai? Niireke wira alipa-ookhwa akumi tthiri? Akhala wira khahiyo akumi, nto tanii ale aniihimya okhala minepa sa alipa-ookhwa? Osuwela waakhuliwa wekeekhai wa makoho ala ti wootthuneya vanceene. Ontaphulela okumi aahiiso okhwa.