Kumba nga Dauda du Sierra Leone yo aya: “Mi asono rogo wiri tooni gbaria. . . . Pai amangi rogo kura uru sa mbure ni gude kindi nga, paya adu dagba gimi aborokporo na kura aboro bani tipa rago. Gimi aboro aya gayo rago du, kura aboro re ki ya gayo du a. Tipa ka mbakada gupai re, i ayambu borongua. Gu borongua re afu bitirobi fu kura kumba sa, ki dadi ko na pisi roko. Fuo regbo tooni, gu kumba i adadi ko na roko re atona ka kio na kini randi. Ho ko angere ni ku kpakpu bitirobi yo, ko atangbako ki ya: ‘Mi nabi gbinza kumba ko niye! Ko vo pisi aroko. Ko ni gbangako na ni gbinza ko, na nvue riko yo, na ko nandu tooni ni nugonugoko.’

“Ko aafura tipa Tita nga guko naima kpi! Ko agunde ni kerehe ki kpari ki ya: ‘Ka oni abihe nga ziree du mi apehe, oni ye ka bihe ni bangironi!’ Ono boro ho naadu na wingbaduse ka ndu te! Gu borongua re azeresi gu kumba re ni migido ko na kpe ko azogoho ku rogo ime, nga gu naadu rogo inga.

“Gu boro nakuru rogo bitirobi yo wa Tita re aya fu gu kumba bitirobi adu beko wẽ gu rago re gaani du. Ko aya fu nina wẽ ri nimangisunge amanga rogo gu rago re zanga bakabangirise. Gu kura aboro naya gayo rago du re aidi na gu sarangbanga re kango ki nyasi.”

 Ngbatunga agu apangbanga re ima nge pavuru Afirika ku dioyo. Rogo gi papara zegino re a wa duhe rogo kura arago, dungu amirioni aboro du na gu ida nga kpikpi aboro naga ku rogo ngbii atoro, nga gu ba i araka rogoho kini bi agu aboro abi du auru kpotosende na ki du na ome kuriyo. Ya mo rengo du nga gupai re? Ya mo kpikpi aboro naraka araka nirengo rogo kura ba? Ka si du nga i arakanga te, ada du tie nakura ni kpia agu aboro naima kpiko re? Si ni nyanyakipa pai gbe mo ini akaragapai sa agi asanahe re, mbiko si nabipa ungaro.