Baebolo ne maa yɛnwu kɛ sunsum nu menli dɔɔnwo wɔ ɛkɛ. Gyihova mumua ne le sunsum.—Dwɔn 4:24; 2 Kɔlentema 3:17, 18.

Mekɛ bie ɛnee Gyihova angome a wɔ maanzaleɛ ye anu a. Akee ɔbɔle ɔ bo kɛ ɔbɔ sunsum nu menli mɔɔ bɛfɛlɛ bɛ anwumabɔvolɛ la. Bɛlɛ tumi kpole yɛɛ bɛze nrɛlɛbɛ bɛtɛla alesama. Gyihova bɔle anwumabɔvolɛ dɔɔnwo; Nyamenle sonvolɛ Daneɛle nwunle anwumabɔvolɛ mgbe ɛya wɔ ɛnyelɛzodeɛnwunlɛ nu.—Daneɛle 7:10; Hibuluma 1:7.

Nyamenle bɔle anwumabɔvolɛ ɛhye mɔ kolaa na yeabɔ azɛlɛ ne. (Dwobu 38:4-7) Bɛ nuhua biala ɛnle ɛkɛ ne mɔɔ le sonla mɔɔ ɛdɛnla azɛlɛ ye azo ɛlɛ na yewu a.