Wenu mapu mu kayñetun dungu rupay
Satana dungufilu ta Eva kiñe filu mew, femngechi Eva ka kayñetufi ta Ngünechen
Jewba dewmay re kümeke püllü. Welu kiñe werken püllü wedañmawi, Weküfü ngetuy, Satana pingetuy. Kidu doy ayüy ñi poyengeal, fey tati pu che ñi poyenoafiel Jewba. Feymu, ¿chem dungu rupay? Inaduamafiyiñ.
Eden pingechi anümkawe mew mülefuy fentren fünkechi anümka, illufalchi fün wülkelu. Jewba feypifi tati kurewen, Adan Eva engu: ‘Chem fün tamu ayüel, iyafuymu’. Welu Chaw Ngünechen feypifi engu ñi inoal kiñe fün. ‘Ifilmu feyti fün, layaymu tati’, pifi (Génesis 2:9, 16, 17).
Kiñe antü nga, kidulelu Eva dungueyew kiñe filu. Welu filu ñi dungunofel, Satana filufaluwi ñi dunguafiel ta Eva. Satana feypifi ‘ifilmi feyti ingekenochi fün, Chaw Ngünechen reke kimün nieaymi. Ifilmi, lalayaymi tati’. Re koyla tati. Welu Eva feyentufi ta Satana, fey ifi ti fün. Ka elufi ta Adan, tüfa ka femi (Génesis 3:1-6).
Tüfachi rüf nütram mu kimkeiñ Satana ñi kayñetuyawken ka koylatuyawken. Fey feypikafi ta Eva ‘eymi lalayaymi, feyentunofilmi ta Ngünechen’. Welu koylatuy. Eva ka Adan layngu. Feychi antü mu Satana lalay, welu küpaley ti antü ñi layal ñi yafkameken mu. Welu petu mongeley ka amuley ñi ngünenkachemekeal. Petu koylatuyawi ka katrütumekefi ta che tañi inanienoal Ngünechen ñi ngülam (Juan 8:44).
Kakelu werken püllü ka koningün kayñetun mu
Fey wüla kakelu werken püllü ka wedañmawingün. Tüfa engün pukintufingün pu ayüfalchi domo, ka küpa kureyefingün. Feymew nagpayngün Mapu mew, wentrukünuwpayngün, ka niewingün tati pu domo engün. Welu Jewba müna üdefi tüfachi dungu (Génesis 6:1, 2; Juda 6).
Wedake werken püllü nagpayngün Mapu mu ñi femal podngechi dungu tati pu domo engün
Tañi weda femün engün fentren wedake dungu küpalelfi tati pu che. Tüfachi pu werken püllü ñi pu domo niefuyngün püñeñ, trürlayngün kakelu püñeñ mu. Fütrake wentrungefuyngün, kewafe ngefuyngün (nalfe ngebuyngün), ka müna wedakechengefuyngün. Fey ti Mapu mu pütrün wedake dungu mülekefuy, feymu Jewba elduami ñi apümkayafiel kom feychi wedake che kiñe fütra mangin ko mu. Pichiñ che müten montutripayngün tüfachi mangin ko mu, ti nor wentru Noe pingelu ka tañi pu che (Génesis 6: 4, 11; 7:23).
Welu tati pu wedake werken püllü lalayngün, wenu mapu mu wiñotuyngün. Welu kutrankangeyngün. Jewba reñmayewetulaeyew engün pu kümeke werken püllü reke. Ka eluwelaeyew engün ñi wiño wentrukünuwpatual. Fey wüla kom engün layayngün tati ramtukadungun antü mew (Juda 6).
Wenu mapu mu wemünentungey ta Weküfü
Wenu mapu mu wemünentungeyngün Satana ka tañi wedake werken püllü
Kiñe weychan mülefuy wenu mapu mu 1914 tripantu mew. Apokalipsi pingechi lifru mu, Biblia ta feypi chumngechi rupay tüfachi weychan: “Fey rupalu kom tüfachi dungu müley kiñe fütra weychan ta wenu mapu. Miguel [wiño mongeltungeelchi Jesu] ka tañi pu werken püllü weychafi engün tati fütra filu [Satana]. Tati fütra filu ka tañi pu [wedake] werken püllü weychaeyew engün, welu pepi wewnolu engün am, elungewelay ñi müleael kisu engün ta wenu mapu. Feymew wemünentungepay ti fütra filu, tiyechi fütra kuyfi filu Weküfü ka Satana pingelu, tati ngünenkakefilu kom mapu mew mülechi pu che. Kisu ka tañi pu [wedake] werken püllü ütrüfnagümngepay ta mapu mew”.
Fey, ¿chum tripay tüfachi dungu? Biblia ta feypi: “¡Ayüwmün, may, kallfü wenu, ka eymün müleyelu tüfey mew!”. Tati pu kümeke werken püllü ayüwafuyngün, Satana ka tañi wedake werken püllü mülewenolu am wenu mapu mew. Welu, ¿Mapu müleyechi pu che kay? Biblia feypi: “¡Welu awngeay tati müleyelu mapu mew ka lafken mew, tati weküfü, kimnielu am ñi alüñmanoael, nagpay eymün tamün kayñetuaetew rume [mütre] fütra lladken mew!” (Apokalipsi 12:7-9, 12.)
Fey llemay Satana ka tañi pu wedake kompañ ngünenkakefingün ka kutrankakefingün Mapu mu müleyechi che. Tüfachi pu weda werken püllü weküfü ngeyngün, ka pu inuma pingekeyngün. Kayñetufingün ta Chaw Ngünechen. Kom wedañmawingün.
