Jehová Diosax suma angelkamakwa luratayna. Ukampis mä angelax jan waliruw tuküna. Ukat Satanás Diablo satäxänwa. Supayax janiw jaqinakan Jehová Diosar yupaychapxañap munkänti jan ukasti jupaw yupaychayasiñ munäna. Uka tuqit jichhax amuytʼañäni.

Edén huertanxa suma achunak churiri walja quqanakaw utjäna. Jehová Diosax Adanampiru Evampiruxa taqi uka achunakat manqʼasipxäta. Ukampis mä quqatxa janiw manqʼapxätati, manqʼapxätaxa jiwapxataw sasaw Diosax säna (Génesis 2:9, 16, 17).

Mä urux Evax sapakïskäna ukhaxa, mä katariw parlxayäna. Chiqpachansa janiw uka katarix parlkänti, jan ukasti Supayaw kataris parlkaspa ukham parlaskäna. Jumatï uka quqan achupat manqʼäta ukhaxa Diosjam yatiñkankañanïxätawa, ukat janiw jiwkätati sasaw sarakïna. Katarin uka arunakapax kʼarïnwa. Ukhampachasa Evax Supayan arunakapar istʼasax uka achutxa manqʼantänwa ukat chachaparuw manqʼantañapatak churäna, ukat Adanax manqʼantxarakïnwa (Génesis 3:1-6).

Aka chiqpach sarnaqäwixa, Supayax kutkatasiri ukat kʼarïtapwa uñachtʼayi. Diosar jan istʼkäta ukhaxa janiw jiwkätati sasaw Evarux säna. Uka arunakapax kʼarïnwa. Kunattix Evax jiwxänwa ukat Adanas jiwxarakïnwa. Supayax janiw ukapachax jiwkänti ukampis niyaw juchapatxa tukjatäxani. Ukäñkamasti jaqinakarux sallqjaskakiniwa. Jichhürunakansa jupax kʼarisiskakiwa, ukat jaqinakax Diosan leyinakap pʼakintapxañapatakiw chʼamachasi (Juan 8:44).

Uka qhipatxa, yaqha angelanakaw jan walir tukupxäna. Uka angelanakax jaqinakan wali suma uñnaqtʼani phuchanakaparuw uñchʼukinipxäna, ukat jupanakampiw ikintasiñ munapxäna. Ukatwa chachanakjam aka Uraqir saraqanipxäna warminakampi ikintasiñataki. Ukax Diosatakix janiw walïkänti, kunattix angelanakax alaxpachan jakasipxañapatakiw luratäpxäna (Génesis 6:1, 2; Judas 6).

Ukaxa jaqinakarux jan walinwa uñjasiyarakïna. Uka angelanakan wawanakapaxa, janiw aliq wawanakakïpkänti, jan ukasti wali jachʼanak jilarasax wali qhuru ukat ñanqha luririnakäpxänwa. Tiempompix aka Uraqix kunayman jan wali lurañanakampi phuqantatäxänwa, ukatwa Jehová Diosax Uma Juiciompi tukjañ amtatayna. Noempi familiapampikiw uka Uma Juiciot qhispipxäna (Génesis 6:4, 11; 7:23).

Ukampisa, ñanqha angelanakax janiw jiwapkänti, jan ukasti alaxpacharuw kutkatxapxäna. Ukampis castigatäpxänwa. Janiw Alaxpachan Diosan suma angelanakapampïxapxänti. Ukatxa, Jehová Diosax jan mayampi jaqir uñtata tukupxañapatakiw jarkʼantxäna. Jutïrinxa jachʼa taripäwi urun taripatäsaw jiwapxani (2 Pedro 2:4; Judas 6).

Khaya 1914 maran alaxpachan mä chʼaxwaw qalltäna, uka  tuqit Apocalipsis librox akham qhanañchi: “Ukatsti mä jachʼa nuwasiñaw alaxpachanxa utjäna. Arcángel Miguelasti [jiwatat jaktanit Jesucristox] [suma] angelanakapampi saytʼasisinxa uka dragonampiw [Supayampiw] nuwasïna, Dragonampi [ñanqha] angelanakapampisti saytʼasipxarakïnwa, ukampis janiw atipjapkänti, alaxpachansti utjañanakax janiw jupanakatakix lugarax utjkxänti. Ukhamax uka dragonax jaqunukutäxänwa alaxpachatxa. Uka dragonapï nayrapacha uka jachʼa katarïnxa, ukasti Supaya, Satanás satarakiwa, juparakiw aka uraqin jaqinakarux wali sallqjañanak luri. Jupampi [ñanqha] angelanakapampisti aka uraqiru jaqtanitäxapxänwa” sasa.

¿Ukat kunas paspachäna? Qillqatax akham saskakiwa: “Alaxpachanakasti ukan utjirinakasa kusisipxam” sasa. Chiqpachansa, janiw Supayasa ni ñanqhanakapas alaxpachankxapxänti ukatwa suma angelanakax kusisipxañapäna. Ukampis ¿aka uraqinkir jaqinakatakix kunjamäpachänsa? Bibliax akham siwa: “¡Wali llakisiñarakiw uraqin ukhamarak qutan utjirinakatakixa! Supayasti jumanakan ukaruw wali colerat juti, tiempopan jukʼakïtapa yatisina” sasa (Apocalipsis 12:7-9, 12).

Jïsa, Supayampi ñanqha angelanakapampixa jaqinakarux sallqjasa ukat jan walinak lurasax walpun tʼaqhisiyapxi. Uka ñanqha angelanakasti saxranaka satäpxiwa. Taqpachaniw Diosar kutkatasipxi ukat nañqha luririnakäpxarakiwa.