Murutili, ka bɔ fɛn hakililamaw sigiyɔrɔ la
Hawa tugura Sitanɛ la ka muruti Ala ma, tuma min na a ye sa kɛ ka kuma a fɛ
Jehowa ye fɛn hakililama minnu da, olu bɛɛ tun ka ɲi. Nka, mɛlɛkɛ kelen juguyara. O ye Sitanɛ Sendonbaga ye. Sitanɛ tun b’a fɛ dugukolo kan sigibagaw k’ale bato sanni u ka Jehowa bato. Kow kɛra cogo min na, o filɛ nin ye:
Jiri caman tun bɛ Edɛn nakɔtu la; u tun bɛ den dumanw kɛ. Jehowa y’a fɔ Hadama n’a muso Hawa ye k’u bɛ se k’o jiridenw dun u sago la. Nka, Ala y’a fɔ u ye ko jiri kelen bɛ yen u man kan ka min den dun. A y’a fɔ ko n’u y’a dun, u na sa dɛ.—Jenɛse 2:9, 16, 17.
Don dɔ, ka Hawa to a kelen na, sa dɔ kumana a fɛ. A jɛlen don tiɲɛ na ko sa yɛrɛ tun tɛ ka kuma; Sitanɛ Sendonbaga de y’a kɛ i n’a fɔ sa tun bɛ kuma la. Sitanɛ y’a fɔ Hawa ye ko n’a ye jiriden kɔnnen dun, k’a na kɛ hakilitigi ye iko Ala. A y’a fɔ a ye fana k’a tɛna sa. Nin kuma fila tun ye nkalon ye. Nka, Hawa dara Sitanɛ na ka jiriden dun. O kɔfɛ, a ye dɔ di Hadama ma; o fana y’a dun.—Jenɛse 3:1-6.
An bɛ kalan min sɔrɔ ka bɔ nin maana lakika in na, o ye ko Sitanɛ ye banbaganci ni nkalontigɛla ye. A tun y’a fɔ Hawa ye ko n’a ye Ala kan bila, k’a tɛna sa. O tun ye nkalon fin ye. A sara, Hadama fana kɛra ten. Sitanɛ ma sa o tuma la, nka a bɛna laban o de ma, katuguni a ye jurumu kɛ. O n’a ta bɛɛ, yan ni o cɛ, a bɛ balo la, wa a bɛ t’a fɛ ka hadamadenw lafili. Nkalontigɛla don hali bi, wa a b’a ɲini ka mɔgɔw bila ka Ala ka sariyaw tiɲɛ.—Yuhana 8:44.
Mɛlɛkɛ wɛrɛw murutira
O kɔfɛ, mɛlɛkɛ wɛrɛw juguyara. O mɛlɛkɛw ye muso cɛɲiw kɔlɔsi dugukolo kan; u fɛ jɛ nege y’u minɛ. O kama, u nana dugukolo kan ka hadamaden cɛw fari ta. O kɔ, u ye musow ta u yɛrɛw ye. O ni Ala kuntilenna tun tɛ bɛn.—Jenɛse 6:1, 2; Jude 6.
Mɛlɛkɛ juguw nana dugukolo kan walasa ka jatɔya kɛ ni musow ye
O ye tɔɔrɔba fana lase hadamadenw ma. O mɛlɛkɛ ninnu musow jiginna denw na, nka subahanadenw tun don. U kɛra mɔgɔ janmanjanba farinmaw ani nigɛlɛnw ye. A laban na, dugukolo fara farinya kow la fo Jehowa y’a latigɛ ka mɔgɔ juguw halaki ni sanjiba ye. Mɔgɔ dama minnu kisira ka bɔ sanjiba la, olu kɛra Nuhun tilennen ye, an’a ka denbaya.—Jenɛse 6:4, 11; 7:23.
Nka, mɛlɛkɛ juguw seginna fɛn hakililamaw sigiyɔrɔ la; u ma sa. Nka, u ɲangira. Jɛn ma kɛ n’u kɔseginni ye Ala ka mɛlɛkɛ tilennenw ka denbaya kɔnɔ. Ka fara o kan, Jehowa t’u yamaruya bilen u ka hadamaden farikolo ta. A laban na, u na sa kiriba tuma la.—2 Piɛrɛ 2:4; Jude 6.
Sitanɛ gɛnna ka bɔ sankolo la
Sitanɛ n’a ka mɛlɛkɛ juguw gɛnna ka bɔ sankolo la
An tile la san kɛmɛ mugannan daminɛ na, kɛlɛ dɔ kɛra sankolo la. Bibulu ka kitabu min tɔgɔ ko Jirali, o b’a ɲɛfɔ tan: ‘Kɛlɛ kɛra sankolo la. Misɛl [Yesu lakununen] ni a ka mɛlɛkɛ [ɲumanw] ye o dragɔn [Sitanɛ] kɛlɛ. Dragɔn fana ni a ka mɛlɛkɛ [juguw] ye kɛlɛ kɛ. U ma se sɔrɔ. U ma yɔrɔ sɔrɔ sankolo la tun. O dragɔn kunbaba, sa kɔrɔ, min tɔgɔ ko Sendonbaga ni Sitanɛ, o min bɛ dugukolo bɛɛ lafili, o kerunna ka bɔ yen ka bin dugukolo kan, ale ni a ka mɛlɛkɛ [juguw] ɲɔgɔn fɛ.’
O nɔ kɛra mun ye? Ɲɛfɔli tɔ filɛ: “Sankolow ni u kɔnɔ fɛnw, aw ka ɲagali o kosɔn.” Mɛlɛkɛ ɲumanw sera ka ɲagali katuguni, Sitanɛ n’a ka mɛlɛkɛ juguw, walima fɛn hakililama juguw tun tɛ sankolo la bilen. Dugukolo kan sigibagaw dun? Bibulu ko: “Bɔnɛ bɛ dugukolo ni kɔgɔji ye, katuguni Sitanɛ jiginna ka taa aw yɔrɔ. A dusu bɔra kosɛbɛ, katuguni a y’a dɔn ko a ka wakati tɔ man jan tun.”—Jirali 12:7-9, 12.
Ɔwɔ, Sitanɛ n’a jɛɲɔgɔn juguw bɛ mɔgɔw lafili, ka bɔnɛbaw lase u ma dugukolo kan. O mɛlɛkɛ juguw bɛ wele jinɛw. Ala juguw don. U bɛɛ ye kɔnɔnajuguw ye.
