Jontir ri espíritus ri xeruʼän Jehová kan ütz kinaʼoj, ye kʼa jun chkë ryeʼ xuʼän itzel runaʼoj. Ri ángel riʼ ya riʼ Satanás ri Diablo. Satanás xrajoʼ chë ri winäq nkiyaʼ ruqʼij ryä pa rukʼexel nkiyaʼ ruqʼij Jehová. Tqatzʼetaʼ achkë xbʼanatäj.

Chwäch ri jardín de Edén, kan kʼïy wä cheʼ kʼo ri kan jaʼäl kiwäch nkiyaʼ. Jehová xuʼij chkë Adán y Eva chë ütz nkitäj kiwäch ri cheʼ riʼ. Ye kʼa kʼo wä jun cheʼ ri xuʼij Dios chkë chë ma tkitäj ta ruwäch. Ryä xuʼij chkë chë we xtkiʼän riʼ, xkekäm (Génesis 2:9, 16, 17).

Kʼo jun qʼij, taq Eva ruyonïl wä kʼo, jun kumätz xtzjon rkʼë. Ye kʼa ma kan ta yë ri kumätz xtzjon, xa yë Satanás ri Diablo ri xbʼanö riʼ. Satanás xuʼij che rä Eva chë we nutäj ruwäch ri cheʼ ri xbʼix che rä chë ma ütz ta nutäj, kan kowan runaʼoj xtjeʼ achiʼel Dios. Ryä chqä xuʼij che rä chë ma xtkäm ta. Ye kʼa ri xuʼij Satanás che rä xa tzʼukün taq tzij. Tapeʼ ke riʼ, Eva xnmaj ri xbʼix che rä, rma riʼ xtäj ruwäch ri cheʼ. Chrij riʼ xyaʼ chqä che rä Adán, ri xtäj chqä ruwäch ri cheʼ riʼ (Génesis 3:1-6).

Ri xbʼanatäj kikʼë Adán y Eva nukʼüt chqawäch chë Satanás kan itzel runaʼoj chqä jun ajtzʼuküy tzij. Ryä xuʼij che rä Eva chë ma xtkäm ta we nuqʼäj rutzij Dios, ya riʼ xa jun tzʼukün tzij. Ryä xkäm y ya riʼ chqä xbʼanatäj rkʼë Adán. Tapeʼ Satanás ma xkäm ta chpan ri tiempo riʼ, ryä xtkäm chqawäch apü rma xpabʼaʼ riʼ chwäch Dios. Ye kʼa loman nbʼanatäj riʼ, ryä kʼa najin na yeruqʼöl ri winäq. Ryä kʼa jun ajtzʼuküy tzij na y kʼa najin na nukanuj rubʼanik  rchë nuʼän chë ri winäq nkiqʼäj rutzij Dios (Juan 8:44).

Kïy junaʼ chrij riʼ, nkʼaj chik ángeles xuʼän chqä itzel kinaʼoj. Re ángeles reʼ xkitzʼët chë ri ixoqiʼ kan jaʼäl yetzuʼun, rma riʼ xkajoʼ xewär kikʼë. Ya riʼ xuʼän chë re ángeles reʼ xepë chwäch le Ruwachʼlew chqä xkipoʼ kiʼ chë achiʼaʼ. Chrij riʼ, xejeʼ kikʼë xa bʼa jaruʼ ixoqiʼ xkajoʼ. Ya riʼ kan ma rukʼwan ta wä riʼ rkʼë ruraybʼal Dios (Génesis 6:1, 2; Judas 6).

Ri xkiʼän ri ángeles riʼ kan kʼïy kʼayewal xkʼäm pä pa kiwiʼ ri winäq. Ri kixjilal re ángeles reʼ xejeʼ kal, ye kʼa ri akʼalaʼ riʼ ma achiʼel ta ri nkʼaj chik. Ryeʼ kan mamaʼ taq kaqän xeʼel y kan itzel wä kinaʼoj. Xqʼax ri tiempo kan ruyon wä chik itzelal nbʼan chwäch le Ruwachʼlew. Rma riʼ, Jehová xuʼän chë xpë jun mamaʼ qʼeqäl jöbʼ rchë xchüp kiwäch ri itzel taq winäq. Xa xuʼ Noé, ri rukʼwan wä jun jïk kʼaslemal chwäch Dios, chqä rufamilia xekolotäj qa (Génesis 6:4, 11; 7:23).

Ye kʼa ri itzel taq ángeles ma xekäm ta, rma xkipoʼ chik jmul kiʼ chë espíritus. Tapeʼ ke riʼ, xyaʼöx kʼayewal pa kiwiʼ rma Dios. Ryeʼ ma xyaʼöx ta chik qʼij chkë rchë xetzolin chpan rufamilia Jehová chqä rchë nkipoʼ chik jmul kiʼ chë winäq. Y chqawäch apü, xtchup kiwäch taq xtqʼat tzij pa kiwiʼ (2 Pedro 2:4; Judas 6).

Chpan ri junaʼ 1914, xbʼanatäj jun chʼaʼoj chlaʼ chkaj. Ri wuj Apocalipsis nuʼij achkë xbʼanatäj. Chriʼ nuʼij: «Xbʼanatäj jun chʼaʼoj chlaʼ chkaj. Miguel [ri ya riʼ Jesús] chqä ri [utziläj] r·ángeles xkiʼän chʼaʼoj rkʼë [Satanás] ri dragón. Y ri dragón chqä ri [itzel] r·ángeles xkiʼän chʼaʼoj chqä, ye kʼa ryeʼ ma xechʼakon ta chqä ma xyaʼöx ta chik qʼij chkë rchë xejeʼ qa chlaʼ chkaj. Rma riʼ xkʼaq pä ri mamaʼ dragón, ri kumätz ri xjeʼ pa naʼäy, ri nbʼix Diablo chqä Satanás che rä, ri najin yeruqʼöl jontir winäq. Ryä xkʼaq pä chwäch le Ruwachʼlew, y ri [itzel] r·ángeles chqä xekʼaq pä rkʼë ryä».

¿Achkë xkʼäm pä jontir ya riʼ? Apocalipsis nuʼij: «Rma riʼ, ¡kan kiʼ ikʼuʼx tibʼanaʼ jontir rïx, ri yïx kʼo chkaj!». Ri ütz taq ángeles kan kiʼ kikʼuʼx xkiʼän rma Satanás chqä ri itzel taq espíritus xeʼelesäx pä chkaj. Ye kʼa, ¿achkë wä xtbʼanatäj kikʼë ri winäq ri ye kʼo chwäch le Ruwachʼlew? Le Biblia nuʼij: «¡Juyuʼ kiwäch ri ye kʼo chwäch le Ruwachʼlew chqä chpan ri mar! Rma ri Diablo xbʼä akuchï yïx kʼo wä rïx y kan kowan katajnäq ruyowal, rma retaman chë xa jbʼaʼ chik tiempo kʼo chwäch» (Apocalipsis 12:7-9, 12).

Achiʼel nqatzʼët, Satanás chqä ri itzel r·ángeles najin yekiqʼöl ri winäq chqä najin nkiyaʼ kʼayewal pa kiwiʼ. Re itzel taq ángeles reʼ nbʼix demonios chkë. Ryeʼ kan ye rukʼulel Dios, rma jontir kan itzel kinaʼoj.