Mumɔŋ gbɔmɛi ni Yehowa bɔ lɛ fɛɛ hi jogbaŋŋ. Kɛkɛ ni ŋwɛibɔfo kome tsɔ bɔfo fɔŋ. Lɛ ji Satan Abonsam. Satan miisumɔ ni gbɔmɛi ni yɔɔ shikpɔŋ nɔ lɛ aja lɛ moŋ fe ni amɛaaja Yehowa. Nɔ ni ba nɛ:

Tsei babaoo yɛ Eden trom lɛ mli ni woɔ yibii ni ŋɔɔ waa diɛŋtsɛ. Yehowa kɛɛ Adam kɛ eŋa, Hawa akɛ, amɛbaanyɛ amɛye eko fɛɛ eko bɔ ni amɛsumɔɔ. Shi tso kome ko yɛ mli ni Nyɔŋmɔ kɛɛ amɛ akɛ amɛkaye enɔ yibii lɛ eko. Ekɛɛ amɛ akɛ kɛji amɛye enɔ yibii lɛ eko lɛ, gboimɔ amɛaagboi.—1 Mose 2:9, 16, 17.

Gbi ko lɛ Hawa kometoo pɛ yɛ he ko kɛkɛ ni onufu ko kɛ lɛ bawie. Yɛ anɔkwale mli lɛ, jeee onufu lɛ diɛŋtsɛ wie lɛ; Satan Abonsam ji mɔ ni ha efee tamɔ nɔ ni onufu lɛ miiwie lɛ. Satan kɛɛ Hawa akɛ kɛji eye tso ni agu amɛ yeli lɛ yibii lɛ, ebaale nii waa tamɔ Nyɔŋmɔ. Ekɛɛ yoo lɛ hu akɛ egboŋ kɔkɔɔkɔ. Nɛkɛ wiemɔi enyɔ nɛɛ fɛɛ ji amale. Shi yɛ fɛɛ sɛɛ lɛ, Hawa he Satan eye ni eye tso lɛ yibii lɛ. Yɛ sɛɛ mli lɛ, eha Adam hu eko, ni lɛ hu eye.—1 Mose 3:1-6.

Wɔkaseɔ kɛjɛɔ nɛkɛ anɔkwa sane nɛɛ mli akɛ Satan ji atuatselɔ kɛ amalelɔ. Ekɛɛ Hawa akɛ kɛji etse Nyɔŋmɔ hiɛ atua lɛ, egboŋ kɔkɔɔkɔ. Amale ni. Shi egbo kɛ̃ ni Adam hu gbo nakai nɔŋŋ. Shi Satan gbooo yɛ nakai beaŋ, eyɛ mli akɛ yɛ naagbee lɛ ebaagbo moŋ ejaakɛ efee esha. Shi kɛlɛ, amrɔ nɛɛ ehiɛ ka ni eeya nɔ eelaka gbɔmɛi adesai lolo. Eka  he eji amalelɔ lolo, ni ebɔɔ mɔdɛŋ ni elaka gbɔmɛi ni amɛku Nyɔŋmɔ mlai lɛ amli.—Yohane 8:44.

Yɛ sɛɛ mli lɛ, ŋwɛibɔfoi krokomɛi tsɔmɔ bɔfoi fɔji. Nɛkɛ ŋwɛibɔfoi nɛɛ na yei ni he yɔɔ fɛo yɛ shikpɔŋ lɛ nɔ ni amɛyasumɔ ni amɛkɛ amɛ ana bɔlɛ. No hewɔ lɛ amɛba shikpɔŋ lɛ nɔ ni amɛkɔlɔ hii ni ji gbɔmɛi adesai agbɔmɔtsei amɛha amɛhe. Kɛkɛ ni amɛkɛ yei lɛ hi shi akɛ amɛŋamɛi. Enɛ teɔ shi woɔ Nyɔŋmɔ yiŋtoo.—1 Mose 6:1, 2; Yuda 6.

Ekɛ naagbai babaoo hu ba gbɔmɛi adesai anɔ. Nɛkɛ ŋwɛibɔfoi nɛɛ aŋamɛi lɛ fɔ bii, shi amɛyɛ sɔrɔto yɛ gbekɛbii krokomɛi lɛ ahe. Amɛdara ni amɛtsɔmɔ obalaŋi ni dara agboi ni feɔ basabasa ni amɛyitseiaŋ wala. Yɛ naagbee lɛ shikpɔŋ lɛ nɔ fɛɛ bayi obɔ kɛ yiwalɛ aahu akɛ Yehowa kpɛ eyiŋ akɛ ebaakpata gbɔmɛi fɔji lɛ ahiɛ kɛ nu afua kpeteŋkpele ko. Gbɔmɛi adesai pɛ ni je Nu Afua lɛ mli ji Noa jalɔ lɛ kɛ eweku lɛ.—1 Mose 6:4, 11; 7:23.

Shi kɛlɛ, nakai ŋwɛibɔfoi fɔji lɛ ku amɛsɛɛ kɛtee mumɔi ashihilɛ he lɛ; amɛgboiii. Shi agbala amɛtoi. Aŋmɛɛɛ amɛ gbɛ ni amɛbafata Nyɔŋmɔ weku ni ji ŋwɛibɔfoi jalɔi lɛ ahe dɔŋŋ. Kɛfata he lɛ, Yehowa eŋmɛɛɛ amɛ gbɛ dɔŋŋ ni amɛkɔlɔ gbɔmɛi adesai agbɔmɔtsei. Ni yɛ naagbee lɛ amɛbaagboi yɛ kojomɔ kpeteŋkpele lɛ mli.—2 Petro 2:4; Yuda 6.

Yɛ wɔ afii oha nɛɛ shishijee mli gbɛ lɛ, ta ko te shi yɛ ŋwɛi. Biblia mli wolo ni ji Kpojiemɔ lɛ tsɔɔ nɔ ni ba lɛ mli akɛ: “Ni ta te shi yɛ ŋwɛi: Mikael [Yesu Kristo ni atee lɛ shi lɛ] kɛ ebɔfoi [kpakpai] lɛ fa drako lɛ [Satan] nɔ ta. Ni drako lɛ kɛ ebɔfoi [fɔji] lɛ fata ehe kɛwu, ni amɛnyɛɛɛ, ni asaŋ amɛnaaa gbɛ dɔŋŋ yɛ ŋwɛi. Ni ashɛ drako kpeteŋkpele lɛ afɔ, mɔ ni ji blema onufu lɛ ni atsɛɔ lɛ diabolo, (naafolɔlɔ loo Abonsam) lɛ kɛ Satan, (henyɛlɔ) lɛ ni shishiuɔ jeŋ muu lɛ fɛɛ lɛ, ashɛ lɛ afɔ shikpɔŋ lɛ nɔ, ni ashɛrɛ ebɔfoi [fɔji] lɛ hu ashwie afata ehe.”

Mɛni jɛ mli ba? Sane lɛ yaa nɔ akɛ: “No hewɔ lɛ nyɛ ŋwɛii kɛ nyɛ mɛi ni nyɛyɔɔ jɛi nyɛnaa tsuijurɔ!” Ŋwɛibɔfoi kpakpai lɛ baanyɛ ana miishɛɛ ejaakɛ Satan kɛ bɔfoi fɔji, loo mumɔi lɛ bɛ ŋwɛi dɔŋŋ. Shi gbɔmɛi ni yɔɔ shikpɔŋ nɔ lɛ hu? Biblia lɛ kɛɔ akɛ: “Kpoo ha mɛi ni yɔɔ shikpɔŋ lɛ nɔ kɛ ŋshɔ hiɛ lɛ! Ejaakɛ Abonsam lɛ ekpeleke shi kɛba nyɛŋɔɔ, egri naakpa, ni ele akɛ be fioo kɛkɛ eyɔɔ.”—Kpojiemɔ 12:7-9, 12.

Hɛɛ, Satan kɛ ehefatalɔi fɔji lɛ elaka gbɔmɛi ni amɛkɛ amanehulu shihilɛ kpele eba shikpɔŋ lɛ nɔ. Atsɛɔ nɛkɛ ŋwɛibɔfoi fɔji nɛɛ akɛ daimonioi. Amɛji Nyɔŋmɔ henyɛlɔi. Mumɔi fɔji ji amɛ fɛɛ.