Atẹṣiṣi to Lẹdo Gbigbọ Tọn Mẹ
To whenuena Satani yi odan de zán nado dọho hlan Evi, yọnnu lọ kọnawudopọ hẹ atẹṣiṣi etọn sọta Jiwheyẹwhe
Gbẹtọ gbigbọnọ he Jehovah dá lẹpo wẹ yin dagbe. Enẹgodo angẹli dopo lẹzun ylankan. Ewọ wẹ Satani Lẹgba. Satani jlo dọ gbẹtọ he tin to aigba ji lẹ ni sẹ̀n emi kakati nado yin Jehovah. Nuhe jọ lọ die:
To jipa Edẹni tọn mẹ, atin susu wẹ tin he nọ de sinsẹ́n he vivi lẹ tọ́njẹgbonu. Jehovah dọ na Adam po asi etọn, Evi po, dọ yé sọgan yi ojlo do dù sọn yé mẹ. Ṣigba atin dopo tin ehe Jiwheyẹwhe dọ dọ yé ma dona dù sọn e mẹ. Ewọ dọmọ eyin yé dù sọn e mẹ, yé na kú dandan.—Gẹnẹsisi 2:9, 16, 17.
To gbedopo Evi tin ede ṣo to whenuena odàn de dọhó hlan ẹn. Na nugbo tọn, e ma yin odàn lọ wẹ dọho na taun tọn gba; Satani Lẹgba wẹ yin mẹhe hẹn ẹn sọawuhia taidi odàn lọ wẹ to hodọ nkọ. Satani dọ hlan Evi dọ eyin ewọ dù sọn atin sinsẹ́n he yin gbigbẹdai lọ mẹ, ewọ na yọnnuin di Jiwheyẹwhe. É sọ vọ dọ dọ ewọ ma na kú gba. Hógbè awe ehe lẹpo wẹ yin lalo. Etomọṣo, Evi yí Satani sè bosọ dù atin sinsẹ́n lọ. Enẹgodo, é yí sọn emẹ na Adam, ewọ sọ dù ga.—Gẹnẹsisi 3:1-6.
Sọn otan nugbo ehe mẹ, mí plọn dọ Satani yin atẹṣitọ po lalonọ de po. E dọna Evi dọ eyin ewọ vẹtoli na Jiwheyẹwhe, é ma na kú gba. Lalo de wẹ enẹ yin. Ewọ kú mọwẹ Adam lọsu ga. Satani ma kú to whenẹnu gba, dile e tlẹ yindọ ewọ na kú to agọgbọnẹn mẹ na é wa ylando wutu. Ṣigba, todin, ewọ tin to ogbẹ̀ bosọ gbẹ́po to nukọnzindo nado hẹn gbẹtọvi lẹ buali. Ewọ gbẹsọ po to lalonọ de yin, podọ ewọ nọ dovivẹnu nado hẹn gbẹtọvi lẹ gbà osẹ́n Jiwheyẹwhe tọn.—Johanu 8:44.
Angẹli Devo Lẹ Ṣiatẹ
To agọgbọnẹn mẹ, angẹli devo lẹ lẹzun ylankan. Angẹli ehelẹ doayi whanpẹ viyọnnu gbẹtọvi lẹ tọn to aigba ji go bosọ jlo nado tindo kọndopọ zanhẹmẹnọzo tọn hẹ yé. Enẹwutu yé wá aigba ji bosọ zé agbasa gbẹtọvi sunnu lẹ tọn ṣinyọn. Enẹgodo yé dè yọnnu lẹ na yéde. Ehe jẹagọdo lẹndai Jiwheyẹwhe tọn.—Gẹnẹsisi 6:1, 2; Juda 6.
Angẹli ylankan lẹ wá aigba ji nado zan walọ mawe hẹ yọnnu lẹ
E hẹn nuhahun susu wá na gbẹtọvi lẹ ga. Asi angẹli ehelẹ tọn lẹ ji ovi lẹ, ṣigba yé ma yin ovi jọgbe lẹ gba. Yé whẹ́n nado yin danuwatọ podọ mẹgangan kanylantọ lẹ. To agọgbọnẹn mẹ aigba yin hinhẹn gọ na danuwiwa sọmọ bọ Jehovah basi dide nado và omẹ ylankan lẹpo súdo gbọn osingigọ daho de dali. Gbẹtọvi dopo akan he lùn Osìngigọ lọ tọ́n wẹ Noa dodonọ po whẹndo etọn po.—Gẹnẹsisi 6:4, 11; 7:23.
Nalete, angẹli ylankan lọ lẹ, lẹkọyi lẹdo gbigbọ tọn mẹ; yé ma kú gba. Ṣigba yé yin yasana. Yé ma yin alọkẹyi nado lẹkọyi whẹndo Jiwheyẹwhe tọn angẹli dodonọ lẹ tọn mẹ whladopo dogọ gba. Yinukọn dogọ, Jehovah ma sọ na dotẹnmẹ yé nado zé agbasa gbẹtọvi lẹ tọn ṣiyọn bà gba. Podọ to godo mẹ yé na kú to whẹdida daho mẹ.—2 Pita 2:4; Juda 6.
Satani Yin Yinyan Jẹgbonu Sọn Olọn Mẹ
Satani po angẹli ylankan etọn lẹ po yin yìnyàn jẹgbonu sọn olọn mẹ
To bẹjẹeji owhe kanweko mítọn ehe mẹ, awhàn de tin to olọn mẹ. Biblu basi zẹẹmẹ nuhe jọ lọ tọn to owe Osọhia tọn mẹ dọmọ: “Awhàn de sọ tin to olọn mẹ: Mikaẹli [Jesu Klisti heyin finfọnsọnkú lọ] po angẹli [dagbe] etọn lẹ po to avùnhò hẹ dlagọni [Satani] lọ; dlagọni lọ sọ to avùnhò po angẹli [ylankan] etọn lẹ po, yé ma sọ gbawhàn; mọ otẹn ma sọ tin na yé to olọn mẹ ba. Yé sọ yàn dlagọni daho lọ jẹgbonu, odàn hóhó lọ, he yè nọ ylọ Lẹgba, podọ Satani, he nọ to aihọn lẹpo klọ: yè yàn ẹn dlan aigba ji, bo sọ yàn angẹli etọn lẹ jẹgbonu po e po.”
Etẹwẹ yin kọdetọn etọn? Linlin lọ zindonukọn dọmọ: “Enẹwutu mì to ayajẹ, mì olọn lẹ emi, po mì he nọnọ̀ yé mẹ lẹ po.!” Angẹli dagbe lẹ sọgan jaya na Satani po angẹli ylankan lẹpo, kavi gbigbọ lẹ, ma gbẹsọ po to olọn mẹ ba gba. Ṣigba etẹwẹ dogbọn mẹhe tin to aigba ji lẹ dali? Bible dọmọ: “Dindọn hlan aihọnmẹnu lẹ, podọ yè he tin to ohù mẹ lẹ, na Lẹgba lọ ko jẹte wá mì de, po homẹgble daho po wutu, na é yọnẹn dọ whenu gli de wẹ é tindo” wutu.—Osọhia 12:7-9, 12.
Mọwẹ, Satani po hagbẹ́ ylankan etọn lẹ po to omẹ hẹn buali bosọ to dindọn daho hẹnwá na gbẹtọ lẹ to aigba ji. Angẹli ylankan ehelẹ nọ yin yiylọ dọ aovi lẹ. Kẹntọ Jiwheyẹwhe tọn wẹ yé yin. Yémẹpo wẹ ylan.
