Ang tanan nga espiritu nga mga tinuga nga gintuga ni Jehova maayo. Nian isa ka anghel ang naglain. Sia amo si Satanas nga Yawa. Luyag ni Satanas nga simbahon sia sang mga tawo sa duta sa baylo nga si Jehova. Amo ini ang natabo:

Sa katamnan sang Eden, madamong mga kahoy ang nagapamunga sing manamit nga bunga. Nagsiling si Jehova kay Adan kag sa iya asawa, si Eva, nga sarang sila makakaon sa sini. Apang may isa ka kahoy nga ginsiling ang Dios nga indi sila dapat magkaon sa sini. Nagsiling sia nga kon magkaon sila sa sini, mapatay sila nga totoo.—Genesis 2:9, 16, 17.

Isa ka adlaw nagaisahanon si Eva sang nakighambal sa iya ang isa ka man-ug. Sa pagkamatuod, indi gid man ang man-ug ang naghambal; ini amo si Satanas nga Yawa nga naghimo nga daw ang man-ug ang naghambal. Si Satanas nagsiling kay Eva nga kon magkaon sia gikan sa ginadumilian nga bunga, mangin maalam sia kaangay sang Dios. Nagsiling man sia nga si Eva indi mapatay. Kabutigan ini. Apang, si Eva nagpati kay Satanas kag ginkaon ang bunga. Sang ulihi, ginhatag niya ang iban kay Adan, kag nagkaon man sia.—Genesis 3:1-6.

Gikan sa sining matuod nga sugilanon, nahibaluan naton nga si Satanas rebelde kag butigon. Ginsilingan niya si Eva nga kon lapason niya ang Dios, indi sia mapatay. Butig ina. Napatay si Eva kag amo man si Adan. Wala sadto napatay si Satanas, bisan pa nga sa ulihi mapatay sia bangod nagpakasala sia. Walay sapayan, buhi pa sia kag padayon nga nagapatalang sa katawhan. Butigon gihapon sia, kag ginatinguhaan niya nga ang tawo maglapas sa mga sugo sang Dios.—Juan 8:44.

Sang ulihi, ang iban nga mga anghel naglain. Nakita nila ang matahom nga mga babayi sa duta kag luyag nila maghulid sa ila. Gani nagkari sila sa duta kag nagpakatawo. Nian ginkuha nila ang mga babayi para sa ila kaugalingon. Supak ini sa katuyuan sang Dios.—Genesis 6:1, 2; Judas 6.

Nagtuga man ini sing daku nga kagamo sa katawhan. Ang mga asawa sining mga anghel nagbata, apang indi sila normal nga mga kabataan. Nagdaku sila nga nangin masingki kag mapintas nga mga higante. Sang ulihi ang duta napun-an sang kasingki sa bagay nga ginpamat-od ni Jehova nga laglagon ang mga malauton paagi sa daku nga anaw. Ang lamang nga nakalampuwas sa Anaw amo ang matarong nga si Noe kag ang iya panimalay.—Genesis 6:4, 11; 7:23.

Walay sapayan, ang malauton nga mga anghel nagbalik sa espirituhanon nga duog; wala sila napatay. Apang ginsilutan sila. Wala sila gintugutan nga makabalik sa panimalay sang matarong nga mga anghel sang Dios. Dugang pa, wala na sila gintugutan ni Jehova nga magpakatawo. Kag sa ulihi mapatay sila sa dakung paghukom.—2 Pedro 2:4; Ju- das 6.

Sa unang bahin sang aton siglo, may inaway sa langit. Ginalaragway sang tolon-an sang Bugna sa Biblia ang natabo: “Karon may inaway sa langit: si Miguel [ang ginbanhaw nga si Jesucristo] kag ang iya [maayong] mga anghel nagpakig-away batok sa dragon [si Satanas], kag ang dragon kag ang iya [malauton nga] mga anghel nagpakig-away apang gindaug sila, kag wala na sing duog sa ila sa langit. Kag ginhulog ang dakung dragon, yanang dumaan nga man-ug, nga ginatawag nga Yawa kag Satanas, ang manugdaya sang bug-os napuy-an nga duta; ginhulog sia sa duta, kag ang iya [malaut nga] mga anghel ginhulog kaupod niya.”

Ano ang resulta? Ang kasaysayan nagapadayon: “Nian magkalipay, O langit kag kamo nga nagapuyo sa sini!” Ang maayong mga anghel magakalipay bangod si Satanas kag ang malauton nga mga anghel, ukon mga espiritu, wala na sa langit. Apang kamusta ang mga tawo sa duta? Ang Biblia nagasiling: “Kailo sa duta kag sa dagat, kay ang Yawa nagpanaug sa inyo, sa dakung kasingkal, bangod nga nakahibalo sia nga may malip-ot lamang sia nga tion.”—Bugna 12:7-9, 12.

Huo, si Satanas kag ang iya malauton nga mga kaupdanan nagapatalang kag nagahimo sing dakung kailo sa mga tawo sa duta. Ining malauton nga mga anghel ginatawag nga mga demonyo. Mga kaaway sila sang Dios. Tanan sila malaut.