Ovandu ozombepo avehe Jehova mba mema va ri ovasemba. Okuzambo omuengeli umwe wa rira omuvi. Eye oSatana Omudiaboli. Satana wa vangere ovandu kombanda yehi okurikotamena kuye moruveze rwa ku Jehova. Ihi otji tja tjitwa:

Motjikunino tjaEden, mwa ri omiti omingi mbyaa vi tjindi ovihape ovitjate. Jehova wa raera Adam nomukazendu we, Eva, kutja owo atja ve sora okurya kuvyo nokuhinomatjaerero. Nungwari pa ri omuti umwe Mukuru mbwa tja kave sere okurya ku wo. Eye wa tja tjinangara va ri ku wo, owo tjiri atja ve ṱa.—Genesis 2:9, 16, 17.

Eyuva rimwe Eva wa ri erike kuye omuini indu onyoka tji ya hungira kuye. Otjinga pe ri, kaya ri onyoka tjiri ndja hungira; ya ri Satana Omudiaboli ngwa tjita onyoka okumunika ayoo ondjaa i hungire. Satana wa raera Eva kutja eye tja ri kotjihape otjizerikwa, eye atja rira omunandjiviro otja Mukuru. Eye wina wa tja Eva katja ṱa. Omaheya ayeevari nga ya ri ovizeze. Posi yokutja, Eva wa kambura mu Satana na ri kotjihape. Kombunda, eye wa yandja tjiva ku Adam, neye wina wa rya.—Genesis 3:1-6.

Okuza kehungi ouatjiri ndi, eṱe matu rihongo kutja Satana omupirukire nomunavizeze. Eye wa raera Eva kutja eye tje hazuvire ku Mukuru, katja ṱa. Imbyo vya ri ovizeze. Eye wa ṱa nu Adam otjingetjo. Satana ke na pa ṱa moruveze ndo, nandarire kutja eye maa ṱu mena rokutja wa tjita ourunde. Posi yokutja, eye ngundee u nomuinyo nu u kaenda okupukisa ovandu. Eye ngundee omunavizeze, nu u kondja okutjitisa ovandu ve katuke ozoveta zaMukuru.—Johanes 8:44.

Kombunda, ovaengeli varwe va rira ovavi. Ovaengeli mba va kengeza ovakazendu ovawa kombanda yehi nu va vanga okuyekukara noruvakiro kuna wo. Okutja owo ve ya kombanda yehi nave hwikike otutu twovandu ovarumendu. Okuzambo owo ve ritoorera imba ovakazendu. Ihi tja ri ombirukira nondando yaMukuru.—Genesis 6:1, 2; Judas 6.

Otjo wina tja eta omaputi omengi kovandu. Ovakazendu vovaengeli mba va panduka ovanatje, nungwari owo kava ri ovanatje tjimuna ovakwao. Owo ve kura okurira ovarenaka ovindandi novatwe. Momakaondjero woruveze ehi re ura notjitandi pu pe ṱa mba ngandu Jehova tja tanda okuyandeka ovandu ovarunde nomupupo omunene. Ovandu aveyerike mba hupa Omupupo va ri Noa omusemba neṱunḓu re.—Genesis 6:4, 11; 7:23.

Posi yokutja, ovaengeli ovarunde va yaruka komaturiro wozombepo; owo kave na pu va ṱa. Nungwari owo va verwa. Owo kave na pu va yandjerwa okukotoka rukwao meṱunḓu raMukuru rovaengeli ovasemba. Komeho wanao, Jehova ke na pe ve yandjera rukwao komeho okuhwikika otutu twovandu. Nu korusenina maave ṱu mombanguriro indji onene.—2 Petrus 2:4; Judas 6.

Morupa rwenyunguhuka rweserewondo retu, pa ri ovita meyuru. Embo rOmbeibela Omavandururiro mari handjuṋuna mbya tjitwa: “Nu pa kara ovita meyuru. Mikael [Jesus Kristus ngwa penduka movaṱi] novaengeli [ovasemba] ve va rwisire otjitjupamuriro [Satana], notjo wina tje ve rwisire novaengeli [ovavi] vatjo, nungwari ihi otjitjupamuriro tja havererwe, notjo novaengeli vatjo kave yandjererwe okuuhara amave kara meyuru rukwao. Notjitjupamuriro otjikuryoma hi tja imbirahiwa, indji onyoka onguru, ndji ku za Omudiaboli poo Satan, nu ndji pukisa ouye auhe. Otjo tja nakaurirwa kombanda yehi puna ovaengeli [ovavi] vatjo.”

Otjikongorereko tja ri tjiṋe? Omaserekarerwa maye i komeho: “Notji mwa sokuyoroka, eṋe mayuru na eṋe amuhe mbu mu tura mu wo!” Ovaengeli ovawa va pwire okuyoroka mena rokutja Satana novaengeli ovavi, poo ozombepo ozombi, kava ri po rukwao meyuru. Nungwari pe ri vi ohunga novandu kombanda yehi? Ombeibela mai tja: “Owee ku eṋe, mahi nokuvare! Orondu Omudiaboli wa rauka, me ya ku eṋe, neye u nomazenge omanene, tjinga ama tjiwa kutja u noruveze orusupi uriri.”—Omavandururiro 12:7-9, 12.

Ii, Satana novakaende pamwe ve ovarunde ve pukisa nokutjitisa owee onene kovandu kombanda yehi. Ovaengeli ovarunde mba ve isanewa ozondemone. Ozo ozonavita na Mukuru. Ozo azehe zawo ozorunde.