Ciũmbe cia kĩĩroho ciothe iria Jehova ombĩte ciarĩ njega. Thutha ũcio mũraika ũmwe agĩtuĩka mũũru. Nĩwe Shaitani ũrĩa Mũcukani. Eendaga andũ gũkũ thĩ mamũthathayagie handũ ha Jehova. Ũũ nĩguo kwahaanĩkire:

Thĩinĩ wa mũgũnda wa Edeni, kwarĩ na mĩtĩ mĩingĩ yarĩ na matunda mega mũno. Jehova eerire Adamu na mũtumia wake, Hawa, atĩ nĩ meetĩkĩrĩtio kũrĩa matunda macio. No nĩ kwarĩ mũtĩ ũmwe Ngai ooigire atĩ matikanarĩe matunda maguo. Ooigire atĩ, mangĩkaamarĩa, hatarĩ nganja no gũkua magaakua.—Kĩambĩrĩria 2:9, 16, 17.

Mũthenya ũmwe Hawa arĩ wiki, nyoka nĩ yamwarĩirie. Ũũma nĩ atĩ, ti nyoka yamwaragĩria; nĩ Shaitani ũrĩa Mũcukani waatũmire one ta arĩ nyoka yamwaragĩria. Shaitani eerire Hawa atĩ, angĩrĩa matunda ma mũtĩ ũcio maakanĩtio, angĩũhĩga o ta Ngai. Ningĩ akĩmwĩra atĩ ndangĩkua. Macio maarĩ maheeni. No rĩrĩ, Hawa nĩ eetĩkirie Shaitani na akĩrĩa itunda rĩu. Thutha ũcio, akĩhe Adamu, nake akĩrĩa.—Kĩambĩrĩria 3:1-6.

Kuumana na ũhoro ũcio wa ma, tũreruta atĩ Shaitani nĩ mũremi na nĩ wa maheeni. Eerire Hawa atĩ aangĩagire gwathĩkĩra Ngai, ndangĩakuire. Macio maarĩ maheeni. Marĩ na Adamu nĩ maakuire. Shaitani ndaakuire hĩndĩ ĩyo, o na gũtuĩka mũthia-inĩ no agaakua tondũ nĩ eehirie. No gwa kahinda gaka, arĩ muoyo na nĩ arathiĩ na mbere kũhĩtithia andũ. No wa maheeni, na no ageragia gũtũma andũ maagarare watho wa Ngai.—Johana 8:44.

Thutha-inĩ araika angĩ nĩ maatuĩkire oru. Araika acio moonire airĩtu athaka mũno gũkũ thĩ na makĩenda gũkomania nao. Kwoguo magĩũka gũkũ thĩ na makĩĩhumba mĩĩrĩ ya andũ. Magĩcoka makĩĩyoera airĩtu acio. Ũndũ ũcio warĩ mũgarũ na muoroto wa Ngai.—Kĩambĩrĩria 6:1, 2; Judasi 6.

Ũndũ ũcio ningĩ nĩ wareheire andũ mathĩna maingĩ mũno. Atumia a araika acio nĩ maaciarire ciana, no itiarĩ ciana cia ndũire. Igĩtuĩka imũndũ nene ciarĩ na ũhinya na itaarĩ na tha. Mũthia-inĩ thĩ ĩkĩiyũrũo nĩ ũhinya, ũũ atĩ Jehova agĩtua itua rĩa kũhũthĩra mũiyũro mũnene kũniina andũ arĩa aganu. Arĩa maahonokire Mũiyũro ũcio no Nuhu, ũrĩa warĩ mũthingu na famĩlĩ yake.—Kĩambĩrĩria 6:4, 11; 7:23.

O na kũrĩ ũguo, araika acio aganu matiakuire; maacokire ciikaro-inĩ cia kĩĩroho kũrĩa igũrũ. No nĩ maaherithirio. Matigana gwĩtĩkĩrio macoke thĩinĩ wa famĩlĩ ya Ngai ya araika arĩa athingu. O na ningĩ Jehova ndaametĩkĩririe kwĩhumba mĩĩrĩ ya andũ rĩngĩ. Na mũthia-inĩ nĩ magaakua hĩndĩ ya mũthenya ũrĩa mũnene wa ituĩro.—2 Petero 2:4; Judasi 6.

Mwaka-inĩ wa 1914, nĩ kwagĩire mbaara kũũrĩa igũrũ. Ibuku rĩa Kũguũrĩrio nĩ rĩtaaragĩria ũrĩa kwahaanĩkire: “Na gũkiumĩra mbaara igũrũ: Mikaeli [Jesu ũrĩa wariũkĩtio] na araika ake [arĩa ega] makĩrũa na ndamathia ĩyo [Shaitani], nayo ndamathia ĩyo na araika ayo [oru] makĩrũa no matiatooririe, o na matiacokire kuonerũo handũ kũu igũrũ. Nĩ ũndũ ũcio ndamathia ĩyo nene ĩkĩharũrũkio, nĩyo nyoka ĩrĩa ya tene, o we wĩtagwo Mũcukani na Shaitani, ũrĩa ũhĩtithagia thĩ yothe ĩrĩa ĩikaragwo; akĩharũrũkio thĩ, o na araika ake [oru] makĩharũrũkio hamwe nake.”

Moimĩrĩro maarĩ marĩkũ? Rĩandĩko rĩu rĩthiaga na mbere gũtaarĩria ũũ: “Nĩ ũndũ ũcio-rĩ, kenai igũrũ rĩrĩ o na inyuĩ mũikaraga kuo!” Araika ega nĩ mangĩakenire tondũ Shaitani na araika arĩa oru kana maroho, nĩ maingatĩtwo igũrũ. Ĩ nao andũ thĩinĩ wa thĩ? Bibilia yugaga ũũ: “Kaĩ thĩ o na iria irĩ na haaro-ĩ, tondũ Mũcukani nĩ aharũrũkĩte kũrĩ inyuĩ arĩ na marakara manene, akĩmenyaga atĩ arĩ na ihinda inini.”—Kũguũrĩrio 12:7-9, 12.

Shaitani na araika ake aganu nĩ mahĩtithagia na makarehera andũ ruo rũnene thĩinĩ wa thĩ. Araika acio aganu metagwo ndaimono. Nĩ thũ cia Ngai. Othe nĩ oru.