Ovanhu aveshe vopamhepo ovo va shitwa kuJehova ova li vawa. Opo nee omwengeli umwe okwa ninga mwii. Oye Satana Ondiaboli. Satana okwa halele ovanhu vokombada yedu ve mu ilikane ponhele yaJehova. Eshi osho sha ningwa:

Moshikunino shaEden, omwa li omiti dihapu hadi ima oiimati ihafifa. Jehova okwa lombwela Adam nomukainhu waye, Eva, kutya vo okwa li tava dulu okulya komiti odo va manguluka. Ndele opa li omuti umwe oo Kalunga a ti inave u lya. Okwa ti kutya nge va li ko, okwa li ve nokufya shili. — Genesis 2:9, 16, 17.

Efiku limwe Eva okwa li oye aeke eshi eyoka la popya naye. Paushili, kala li eyoka lo venevene olo kwa li tali popi; oSatana Ondiaboli oo a ninga eyoka li kale la fa olo kwa li tali popi. Satana okwa lombwela Eva kutya ngee ye okwa li komuti oo wa dilikwa, ye ota ka kala e na eendunge a fa Kalunga. Ye okwa ti yo kutya Eva ita ka fya. Omapopyo aeshe aa avali okwa li oipupulu. Nande ongaho, Eva okwa itavela Satana ndee ta li oshiimati. Xuuninwa, ye okwa pa Adam, ndee naye ta li. — Genesis 3:1-6..

Mehokololo eli loshili, ohatu lihongo mo kutya Satana omunashibofa nomunaipupulu. Ye okwa lombwela Eva kutya ngee okwa kala ina dulika kuKalunga, ye ita ka fya. Osho osha li oipupulu. Ye okwa fya nosho yo Adam. Satana ina fya efimbo olo, ashike nande ongaho hauxuuninwa ye ota ka fya shaashi okwa nyona. Paife, ye oku na natango omwenyo nota twikile okupukifa ounhu. Ye natango omunaipupulu,  nota kendabala a ninge ovanhu va tauluke eemhango daKalunga. — Johannes 8:44.

Lwanima, ovaengeli vamwe ova ninga vai. Ovaengeli ava ova mona ovakainhu vawa kombada yedu nova halele okunangala navo. Onghee vo ove uya kombada yedu ndee tave lidike omalutu opanhu oshilumenhu. Ndee tave likufile ovakainhu. Eshi osha li tashi kondjifafana nomhangela yaKalunga. — Genesis 6:​1, 2; Judas 6.

Eshi osha etela ounhu oupyakadi muhapu. Ovakainhu vovaengeli ava ova dala ounona, ndele vo kava li ngaashi ounona vakwao. Vo ova ninga ovatongolume ovakolokoshi novakwanyanya. Hauxuuninwa edu ola yadifwa oukolokoshi nopo nee Jehova okwa tokola okuhanauna po ovanhu vai neyelu linene. Omuyuki Noa novakwaneumbo vaye ovo aveke ovanhu va xupa po kEyelu. — Genesis 6:4, 11; 7:23.

Ndelenee ovaengeli ovo vai ova shuna mouhamba weemhepo; vo inava fya. Ashike okwa li va handukilwa. Vo inava pitikwa vali va shune moukwaneumbo waKalunga wovaengeli ovayuki. Natango, Jehova ine va pitika vali va shune momalutu opanhu. Nohauxuuninwa vo otava ka fya  metokolo la kula. — 2 Petrus 2:4; Judas 6.

Pehovelo lefelemido letu, opwa li oita meulu. Embombibeli lEhololo otali hepaulula osho sha ningwa po: “Ndele meulu omwa tukuluka olwoodi; Mikael [Jesus Kristus omunyumunwa] novaengeli vaye [vawa] va lwifa ongadu [Satana]. Nongadu novaengeli vaye [vai] ova lwa yo, ndele ova nyengwa, nonhele yokukala kwavo meulu inai monika vali. Nongadu inene ya ekelwashi, eyoka likulu, la ifanwa ondiaboli naSatana, ou ta hongaula ounyuni aushe, okwa ekelwa pedu, novaengeli vaye [vai] ova ekelwashi yo . . . pamwe naye.”

Oshilanduliko osha li shike? Ehokololo otali twikile: “Onghee hano nyakukweni, onye omaulu, naava mwa kala muo!” Ovaengeli vawa okwa li tava dulu okukala va hafa shaashi Satana novaengeli vai, ile eemhepo dii, kave mo vali meulu. Ndele ongahelipi kombinga yovanhu kombada yedu? Ombibeli otai ti: “Woo, edu nefuta, osheshi ondiaboli ya kulukila kunye nehandu linene, osheshi i shi shii i nokafimbo kaxupi kongaho.” — Ehololo 12:7-9, 12.

Heeno, Satana nookaume kaye vai otava pukifa notava etele ovanhu vokombada yedu owoo inene. Ovaengeli ava vai ohava ifanwa eendemoni. Vo ovatondi vaKalunga. Vo aveshe ovai.