ការបះបោរក្នុងវិស័យវិញ្ញាណ
ពេលអារក្សសាតាំងប្រើសត្វពស់ឲ្យនិយាយនឹងនាងអេវ៉ា នាងក៏រួមនឹងវាក្នុងការបះបោរប្រឆាំងនឹងព្រះ
បុគ្គលវិញ្ញាណដែលព្រះយេហូវ៉ាបានបង្កើតមកគឺសុទ្ធតែល្អទាំងអស់។ ក្រោយមក ទេវតាមួយក៏បែរជាអាក្រក់។ វាគឺជាអារក្សសាតាំង។ សាតាំងប្រាថ្នាចង់ឲ្យមនុស្សលោកលើផែនដីធ្វើសក្ការៈដល់វាជាជាងដល់ព្រះយេហូវ៉ានោះវិញ។ នេះជារឿងដែលបានកើតឡើង៖
ក្នុងសួនច្បារអេដែន មានដើមឈើជាច្រើនដែលបង្កើតផ្លែដ៏ឆ្ងាញ់ល្អ។ ព្រះយេហូវ៉ាមានបន្ទូលប្រាប់អ័ដាមនិងនាងអេវ៉ាជាប្រពន្ធរបស់គាត់ ថាគេអាចបរិភោគផ្លែពីដើមឈើទាំងនោះបានតាមចិត្ត។ ប៉ុន្តែមានដើមឈើមួយដែលព្រះមានបន្ទូលថាគេមិនត្រូវបរិភោគផ្លែនោះឡើយ។ ទ្រង់មានបន្ទូលថា បើគេបរិភោគផ្លែពីដើមឈើនោះ គេនឹងត្រូវស្លាប់ជាមិនខាន។—លោកុប្បត្តិ ២:៩, ១៦, ១៧
នៅថ្ងៃមួយនាងអេវ៉ានៅតែឯង ពេលដែលសត្វពស់មួយបាននិយាយទៅនាង។ ជាប្រាកដ មិនមែនជាពស់ទេដែលនិយាយ គឺជាអារក្សសាតាំងទៅវិញដែលធ្វើឲ្យហាក់ដូចជាពស់កំពុងនិយាយ។ អារក្សសាតាំងប្រាប់នាងអេវ៉ាថា បើនាងបរិភោគផ្លែដែលបានហាមប្រាមនោះ នាងនឹងមានប្រាជ្ញាដូចព្រះ។ វាក៏បន្ថែមទៅនាងថា នាងនឹងមិនត្រូវស្លាប់ឡើយ។ សេចក្ដីថ្លែងទាំង២នេះគឺជាពាក្យកុហក។ ប៉ុន្តែ នាងអេវ៉ាជឿតាមអារក្សសាតាំងហើយបរិភោគផ្លែនោះទៅ។ ក្រោយមក នាងបានឲ្យផ្លែនោះខ្លះទៅអ័ដាម ហើយគាត់ក៏បរិភោគដែរ។—លោកុប្បត្តិ ៣:១-៦
ពីរឿងពិតនេះ យើងយល់ដឹងថាអារក្សសាតាំងជាអ្នកបះបោរហើយជាអ្នកកុហក។ វាបានប្រាប់នាងអេវ៉ាថា បើនាងមិនស្ដាប់បង្គាប់ព្រះ នោះនាងនឹងមិនត្រូវស្លាប់ទេ។ នោះជាពាក្យកុហក។ នាងបានស្លាប់មែន ហើយអ័ដាមក៏បានស្លាប់ដែរ។ សាតាំងមិនបានស្លាប់នៅពេលនោះទេ តែវានឹងត្រូវស្លាប់នៅទីបំផុត ពីព្រោះវាបានធ្វើអំពើបាប។ ប៉ុន្តែក្នុងគ្រាឥឡូវនេះ វានៅរស់ហើយកំពុងតែបំភាន់មនុស្សលោកតទៅទៀត។ វានៅតែជាអ្នកកុហក ហើយវាខំធ្វើឲ្យមនុស្សប្រព្រឹត្តល្មើសនឹងច្បាប់របស់ព្រះ។—យ៉ូហាន ៨:៤៤
ទេវតាឯទៀតបះបោរ
ក្រោយមក ទេវតាឯទៀតក៏បែរជាអាក្រក់។ ទេវតាទាំងនេះសំគាល់ឃើញស្ត្រីដ៏ល្អឆើតលើផែនដី ហើយចង់រួមសេពមេថុននឹងពួកគេ។ ដូច្នេះទេវតាទាំងនេះក៏ចុះមកឯផែនដី ហើយក្លាយខ្លួនជារូបមនុស្សប្រុស។ រួចមកគេក៏យកពួកស្ត្រីសម្រាប់ខ្លួនគេ។ នេះគឺប្រឆាំងនឹងបំណងព្រះហឫទ័យរបស់ព្រះ។—លោកុប្បត្តិ ៦:១, ២; យូដាស ៦
ពួកទេវតាអាក្រក់បានមកឯផែនដី ដើម្បីប្រព្រឹត្តអំពើអសីលធម៌នឹងស្ត្រី
នេះក៏បណ្ដាលឲ្យមានបញ្ហាជាច្រើនសម្រាប់មនុស្សលោកដែរ។ ប្រពន្ធនៃទេវតាទាំងនេះបានបង្កើតកូនមក ប៉ុន្តែមិនមែនជាកូនធម្មតាទេ។ កូនទាំងនោះធំឡើងជាមនុស្សរូបធំសម្បើម ជាយក្ខឃោរឃៅកំណាច។ តាមយថាហេតុ ផែនដីក៏ពោរពេញទៅដោយសេចក្ដីឃោរឃៅដល់ម្ល៉េះ បានជាព្រះយេហូវ៉ាសម្រេចនឹងបំផ្លាញមនុស្សអាក្រក់ដោយទឹកជំនន់ដ៏ធំ។ មានតែលោកណូអេជាអ្នកសុចរិតនិងគ្រួសារលោកតែប៉ុណ្ណោះ ដែលជាមនុស្សរស់គង់នៅពីទឹកជំនន់នោះ។—លោកុប្បត្តិ ៦:៤, ១១; ៧:២៣
យ៉ាងណាក៏ដោយ ទេវតាអាក្រក់ត្រឡប់ទៅឯវិស័យវិញ្ញាណវិញ ពួកគេមិនបានស្លាប់ទេ។ ប៉ុន្តែ ពួកគេបានត្រូវទទួលទណ្ឌកម្ម។ ព្រះមិនអនុញ្ញាតឲ្យពួកគេត្រឡប់ចូលក្នុងចំណោមពួកទេវតាសុចរិតជាក្រុមគ្រួសាររបស់ទ្រង់ទៀតឡើយ។ ម្យ៉ាងវិញទៀតនោះ ព្រះយេហូវ៉ាមិនអនុញ្ញាតឲ្យពួកគេក្លាយខ្លួនជារូបមនុស្សបានទៀតដែរ។ ហើយដល់ទីបំផុត ពួកគេនឹងត្រូវស្លាប់ក្នុងការជំនុំជំរះដ៏ធំ។—ពេត្រុសទី២ ២:៤; យូដាស ៦
បោះទំលាក់សាតាំងចេញពីស្ថានសួគ៌
សាតាំងនិងពួកទេវតាអាក្រក់របស់វា បានត្រូវបោះទំលាក់ចេញពីស្ថានសួគ៌
ក្នុងដើមសតវត្សយើង មានចំបាំងមួយកើតឡើងក្នុងស្ថានសួគ៌។ សៀវភៅវិវរណៈនៃព្រះគម្ពីររៀបរាប់រឿងដែលបានកើតឡើង៖ «នោះមានចំបាំងនៅលើមេឃ គឺមីកែល[ព្រះយេស៊ូវដែលបានរស់ឡើងវិញ]នឹងពួកទេវតា[ល្អ]របស់លោកច្បាំងនឹងនាគ[សាតាំង] ហើយនាគ នឹងទេវតា[អាក្រក់]វាក៏ច្បាំងនឹងលោកដែរ តែមិនបានឈ្នះទេ ក៏មិនឃើញមានកន្លែងណាឲ្យវា នៅលើមេឃទៀតផង។ នោះនាគធំត្រូវបោះទំលាក់ទៅ គឺជាពស់ពីបុរាណ ដែលឈ្មោះហៅថា អារក្ស ហើយសាតាំងផង ដែលបាននាំលោកីយទាំងមូលឲ្យវង្វេងចេញ វាត្រូវបោះទំលាក់ទៅផែនដីវិញ ព្រមទាំងពួកទេវតា[អាក្រក់]របស់វាផង»។
តើមានលទ្ធផលយ៉ាងណា? ដំណើររឿងចែងតទៅទៀតថា៖ «ដោយហេតុនោះ ឱស្ថានសួគ៌ នឹងពួកដែលនៅស្ថាននោះអើយ ចូរអរសប្បាយឡើង»! ពួកទេវតាល្អអាចអរសប្បាយឡើង ពីព្រោះសាតាំងនិងទេវតាឬវិញ្ញាណអាក្រក់មិនមាននៅក្នុងស្ថានសួគ៌ទៀតទេ។ ប៉ុន្តែចុះយ៉ាងណាទៅចំពោះមនុស្សនៅលើផែនដីនោះវិញ? ព្រះគម្ពីរចែងថា៖ «តែវេទនាដល់ផែនដី នឹងសមុទ្រវិញ ពីព្រោះអារក្សបានចុះមកឯអ្នករាល់គ្នា ទាំងមានសេចក្ដីឃោរឃៅជាខ្លាំង ដោយវាដឹងថាពេលវេលាវាខ្លីណាស់ហើយ»។—វិវរណៈ ១២:៧-៩, ១២
ពិតហើយ សាតាំងនិងគ្នីគ្នាអាក្រក់របស់វានាំមនុស្សលើផែនដីឲ្យវង្វេង ព្រមទាំងបណ្ដាលឲ្យគេមានសេចក្ដីទុក្ខវេទនាយ៉ាងខ្លាំងផង។ ពួកទេវតាអាក្រក់ទាំងនេះហៅថាព្រាយបិសាច ជាខ្មាំងសត្រូវរបស់ព្រះ។ ពួកវាទាំងអស់សុទ្ធតែអាក្រក់ក្រៃលែង។
