Ebihangikwa byosi eby’abandu ab’obunyakirimu aba Yehova ahangika babya babuya. Neryo omumalaika mughuma mwayihindulha mwa mubi. Iyo ni Sitani Diabolo. Sitani mwanza abandu ab’okwa kihugho bamuramaye omwo mwanya w’eriramya Yehova. Ekyabya kyabanikire ky’eki:

Omw’irima ly’Edeni, mwabya emithi mingi eyika hethaya ebighuma ebisihire kutsibu. Yehova mwabwira Adamu na mukali wiwe, Eva, athi banganalya okwa bighuma ebyosi. Aliriryo habya omuthi mughuma owa Nyamuhanga abugha athi sibalyeko. Mwabugha athi bamalya okwa muthi oyo ibakendi syaholha kundu.​—Enzuko 2:9, 16, 17.

Kiro kighuma Eva abya inyane iyuwene omughulhu enzoka yabugha nayo. Kwenene, siyabya enzoka hene-hene eyabugha; abya ini Sitani Diabolo oyo wayihindulha mwa nzoka ngayayikakanaya. Sitani mwabwira Eva athi amalya okwa kighuma ekyo Nyamuhanga amuhana athi syalye, inyakendibya w’amenge nga Nyamuhanga. Kandi mwabugha athi siendi syaholha n’ahake. Ebyosi ebyo abugha abya mabehi. Aliriryo, Eva mw’ikirirya ebya Sitani neryo mwalya ekighuma ekyo. Enyuma waho, mwahakukyo kwa Adamu nayo mwalyakyo.​—Enzuko 3:1-6.

Erilhwa omwa mwatsi ow’ekwenene ono, akathw’eghesaya ngokwa Sitani ni muyisamambuli kandi ni mubehi. Mwabwira Eva athi amathwa ebihano bya Nyamuhanga, isiendi syaholha n’ahake. Aya abya mabehi. Mwaholha kuthya  na Adamu mwaholha. Sitani mwatha holha neryo-neryo, n’omwakini akendisyaholha kundi mwahalya. Nahathya akineho kandi akalholha embere eritheba abandu. Nalino ni mubehi, kandi akakolha n’akaghalha erithetha abandu bangathwa ebihano bya Nyamuhanga.​—Yoane 8:44.

Enyuma waho, n’abandi bamalaika mubayihindulha mw’ababi. Abamalaika aba mubalhangira abali b’abandu okwa kihugho kwa ni babuya, neryo mubanza erisingira nabo. Neryo mubasa okwa kihugho n’eryambalha emibiri y’abandu ng’abalhume. Mubayimirya abakali. Kino sikyabya kighendererwa kya Nyamuhanga.​—Enzuko 6:1, 2; Yuda 6.

Kandi Kino mukyalethera abandu b’omulyambo. Abakali b’abamalaika abo mubabutha abana ab’embaghane. Mubakulha n’omwagha n’ekinigha. Lithya ekihugho mukyosulha mw’omwagha kyaleka Yehova inyathwamu eriherya abandu babi omw’ibwogha ly’amaghetse. Abandu ababya basabukire okw’ibwogha ly’amaghetse y’omuthunganene Noa n’eka yiwe basa.​—Enzuko 6:4, 11; 7:23.

Neryo, abamalaika ababi mubasuba omw’ithwale ly’emirimu; ibo mubatha holha. Aliriryo mubasuyirwa. Mubathalighirwa erisuba omw’aka ey’abamalaika abathunganene ba Nyamuhanga. Erithasy’ongerako,  Yehova mwathabalighira kandi eryambalha emibiri ya bandu. Busana nekyo bakendi sy’ithibwa omwa kiro ky’eritswera.​—2 Petero 2:4; Yuda 6.

Omw’itsuka ly’ekighonye kyethu, muhabya amalhwa omwa lhubulha. Ekitabu eky’Eribisulirwa kikathubwira ekyabya kyabanikire: ‘Neryo muhahulhuka amalhwa elhubulha: Mikaeli, Yesu Kristo oyo walhubukibawa n’abamalaika biwe abuwene mubalhwa n’ekiyoka Sitani, n’abamalaika babi mubalhwa, nikwa mukyakindwa, kandi muhathasyabanika omwanya busana nabo elhubulha. Kandi ekiyoka kinene ekyo mukyaghuswa ahisi, ekyo ni kiyoka kya kera, ekikahulhawa mwa Diabolo na Sitani, oyukatheba ekihugho kyosi; mukyaghuswa ahisi n’abamalaika bakyo babi mubaghuswa haghuma nakyo.’

Ekyabya kyalhwiremo niki? ‘Neryo busana n’omwatsi oyu, inywe lhubulha mutseme, nenyu abikere omwa lhubulha!’ Abamalaika abuwene bangatsemere kusangwa Sitani na bamalaika babi, kutse ebirimu, isi bikiri omwa lhubulha. Ibbwa byangabere bithi okw’abandu abali okwa kihugho? E Biblia yikabugha yithi: ‘Nikwa obulighe okwa kihugho n’okwa ngetse, kusangwa Sitani yabiribandaghalirako inyanahithene kutsibu, kusangwa yasi ko yiwithe kathambi kake buyira.’​—Eribisulirwa 12:7-9, 12.

Inga, Sitani n’abamalaika babi babiritheba n’eriletha obulighe bunene okwa abandu b’okwa kihugho. Abamalaika babi bano kandi bakahulhawa mw’esyombinga. Ni nzighu sya Nyamuhanga. Abosi ni babi.