Bantu bonso ba ku mushipiditu bāpangilwe na Yehova bādi bayampe. Penepo mwikeulu umo wāalamuka ke mubi. Aye i Satana Dyabola. Satana wādi usaka bantu ba pano pantanda bamutōte aye, kupitako kutōta Yehova. Kyāpityile namino:

Mu budimi bwa Edena, mwādi mityi mivule yādi ipa bipá bilumbuluke. Yehova wāsapwidile Adama ne wandi mukaji, Eva, amba bādi bakokeja kudya’ko monso mobasakila. Ino kwādi mutyi umo wēbakankeje Leza kudyako. Wānene’mba shi badyeko, bine bakafwa.​—Ngalwilo 2:9, 16, 17.

Difuku dimo Eva wādi kasuku kandi, nyoka waiya kwisamba nandi. Nabubine, ke nyokapo wāile kwisamba nandi; wādi Satana Dyabola wālongele nabya mwanda wa kimweke bu i nyoka wādi unena. Satana wāsapwila Eva’mba shi udye ku kino kipá kikandijibwe, bine ukekala na ñeni pamo’nka na Leza. Kadi wāmulombola’mba bine kukafu po. Bino binenwa byonso bibidi bwādi bubela. Ino yōo, Eva wāitabija kya Satana ne kudya wādya kipá. Kupwa, wākapa’ko ne Adama, nandi wādya.​—Ngalwilo 3:1-6.

Kupityila ku ino mānga yabine, tubefunde’mba Satana i ntomboki kadi i mbepayi. Wāsapwidile Eva’mba shi apele kukōkela Leza, kakafupo. Bwādi bubela. Eva wāfwile ne Adama nandi wāfwile. Satana kāfwilepo mu kine kitatyi’kya, ino ukafwanga bine mwanda wālongele bubi. Inoko,  pano, ukidi mūmi ne ukyendelela na kongola muzo wa muntu. Ukidi mbepayi ne utompanga kukoka bantu bajilule bijila bya Leza.​—Yoano 8:44.

Mwenda mafuku, bamwikeulu bakwabo bāalamukile ke babi. Bano bamwikeulu bāmwene bana-bakaji ba buya bwa dyangi pano pantanda bāivwana kilokoloko kya kusaka kulala nabo busekese. Penepo bāiya pano pantanda, bāvwala ngitu ya bāna-balume. Penepo bāshilula kulala na bāna-bakaji monso mobasakila. Kino kekyādipo kyendelemo mungya mpango ya Leza.​—Ngalwilo 6:1, 2; Yude 6.

Kino nakyo kyāletēle bantu makambakano mavule. Bakaji ba bano bamwikeulu bābutwile bāna, ino bādi bāna bakubulwa kwendelamo. Baikele ke batumpangala ba bukalabale ne ba kasusu. Ntanda yonso yāyula enka bukalabale bonka bonka, Yehova wātyiba mbila ya konakanya bantu bonso babi na dilobe dikatakata. Bantu bāpandile ku dilobe kwādi nka Noa muntu moloke kete ne kisaka kyandi.​—Ngalwilo 6:4, 11; 7:23.

Bamwikeulu babi, bājokēle mu kikalo kya mishipiditu; kēbafwīlepo mhm. Inoko bāpelwe mfuto. Kebākitabijibwepo kadi kujokela mu kisaka kya Leza kibundilwe na bamwikeulu boloke. Pakwabo kadi, Yehova kēbapelepo kadi lupusa lwa kuvwala ngitu ya bantu. Kadi bine bakafwanga kitatyi kya butyibi bukatampe.​—2 Petelo 2:4; Yude 6.

Mu mafuku a kungalwilo kwa kipindi kya ino myaka katwa yotudimo, kwātulukile divita momwa mūlu. Kusokwelwa, mukanda wa mu Bible, ulombola mokyāpityīle: “Ino mwadi ne divita monka mūlu: Mikele [Yesu Kidishitu musanguke] ne bamwikeulu bandi [bayampe] bakamutamba mukishi [Satana] ne mukishi nandi ne bamwikeulu bandi [babi] balwile nabo. Penepo, abo ne kwibanekenya mpika, ino kebamwenepo mwakwikadila mūlu dikwabo, mhm. Ponkapo yewa mukishi mukatakata waelwa panshi; yewa nyoka wa kala na kalā, wakutelwa dya bu dyabola ne dya bu-Satana, ñongoji wa panopantanda ponso; waelwa panopanshi, ne bamwikeulu bandi [babi] bēne kumo baelwa panshi.”

Ikika kyātambileko? Nsekununi ikyendelela: “Penepo nanshi, sepelelai pa uno mwanda uno mānwe madiulu, ne bonso bēkele monka!” Bamwikeulu bayampe bāsepelele mwanda Satana ne bamwikeulu babi, nansha mishipiditu mibi, kebākidipo mūlu. Le bantu pano panshi nabo? Bible unena’mba: “Yo! Yo! malwa obe, abe panopanshi, ne abe mema mwine; mwanda dyabola watūkila po mudi ne bukalabale bukatampe bwine, pa kuyūka’mba: Ngidi ne kakitatyi katyutyu.”​—Kusokwelwa 12:7-9, 12.

Eyo, Satana ne bengidi bandi babi bongolanga bantu ne kuleta byamalwa pano pantanda. Bano bamwikeulu babi betwanga bu bandemona. I balwana na Leza. Abo bonso i babi.