Baspiritu buonso bakafuka Yehowa bavua bimpe. Kunyima, umue wa ku banjelo wakalua mubi. nSatana Diabolo. Satana uvua ukeba bua bantu pa buloba kumutendelelabo pamutu pa Yehowa. Biakenzeka mushindu’eu:

Mu budimi bua Edena muvua mitshi mivule ivua ne bimuma bimpe kudia. Yehowa wakambila Adama ne mukajende Eva ne: bavua mua kubidia muvuabo basue. Kadi, kuvua mutshi umue uvua Nzambi muambe ne: kabena ne bua kudia bimuma biawo. Wakamba ne: bu bobo mua kudia bimuma biawo, bavua ne bua kufua kabiyi mpata.​—Genese 2:9, 16, 17.

Dituku kampanda, Eva uvua nkayende pavua nyoka muakule nende. Bushuwa, ki nnyoka uvua muakule nende to; nSatana Diabolo uvua welesha meji ne: nyoka ke uvua wakula. Satana wakambila Eva ne: bu yeye mua kudia bimuma bia mutshi mujidika, uvua mua kuikala ne meji bu Nzambi. Wakamba kabidi ne: kavua mua kufua to. Malu aa abidi avua a dishima. Kadi, Eva wakitaba Satana ne wakadia tshimuma. Pashishe, wakapesha kabidi Adama, ne wakadia pende.​—Genese 3:1-6.

Mu diyuki edi dilelela, tudi bapete lumu lua se: Satana nntomboji ne muena dishima. Wakambila Eva ne: bu yeye mua kutombokela Nzambi, kavua kufua to. Bualu ebu buvua bua dishima. Wakadia tshimuma ne wakafua, bia muomumue ne Adama. Musangu awu, Satana kakafua, kadi neafue bualu wakenza mpekatu. Utshidi ne muoyo ne mmutungunuke ne kupambula bukua-bantu. Utshidi anu muena dishima, ne udi ukeba mua kufikisha bantu ku dishipa mikenji ya Nzambi.​—Yone 8:44.

Kunyima, bakuabo banjelo bakalua pabo babi. Banjelo aba bakamona bakaji balengele bavua pa buloba ne bakajinga bua kuenda nabo masandi. Nenku, bakalua pa buloba ne bakavuala mibidi ya bantu. Ke kuangatabo bakaji. Kabivua mu diumvuangana ne dilongolola dia Nzambi to.​—Genese 6:1, 2; Yuda 6.

Biakakengesha bukua-bantu bikole. Bakaji ba banjelo aba bakalela bana, kadi kabavua bana bu bana buonso to. Pakakolabo, bakalua bantu ba mpolondo bena tshikisu ne ba lukinu. Nenku, buloba buakuwula ne tshikisu ke Yehowa kuangata dipangadika dia kubutula bantu babi ne mvula munene wa kabutu. Anu Nowa ne dîku diende ke bantu bakapanda ku mvula eu.​—Genese 6:4, 11; 7:23.

Banjelo babi bakapingana bobo mu miaba ya mu spiritu; kabakafua to. Kadi, bakanyokibua. Kabakanyishibua kabidi bua kubuela mu dîku dia Nzambi dia banjelo bakane to. Kabidi, Yehowa kakanyisha bua kuluatabo kabidi mibidi ya bantu nansha. Ndekelu wa bionso, nebafue mu dilumbuluisha dinene.​—2 Petelo 2:4; Yuda 6.

Ku ntuadijilu wa siekele wetu, kuvua mvita mu diulu. Mukanda wa mu Bible wa Buakabuluibua udi wamba tshivua tshienzeke ne: “Ne mvita yakajuka mu diulu: Mikaele [Yezu Kristo mubiishibue ku lufu] ne banjelo bende [bimpe] bakaluangana ne dragon [Satana], ne dragon ne banjelo bende [babi] bakaluangana, kadi kabakatshimuna, ne kabakasangana muaba wabo mu diulu nansha. Nenku, dragon munene wakedibua panshi, nyoka awu wa kale, udi ubikidibua ne: Satana Diabolo, udi upambula buloba bujima budi bantu basombe; wakedibua panshi pa buloba ne banjelo bende [babi] bakedibua nende.”

Kuakapatuka tshipeta kayi? Muyuki udi utungunuka ne: “Nunku, sankayi, mulu ne nuenu badi basombemu!” Banjelo bimpe bavua mua kusanka bualu Satana ne banjelo babi, anyi baspiritu babi, kabatshivua kabidi mu diulu to. Kadi bivua munyi bua bantu pa buloba? Bible udi wamba ne: “Diakabi ndienu nuenu buloba ne mbuu bualu Diabolo wapueki kunudi, muikale ne tshiji tshikole, mumanye ne: udi ne tshikondo tshîpi.”​—Buakabuluibua 12:7-9, 12.

Bushuwa, Satana ne bakuende babi badi bapambula bantu ne bajula diakabi bua bantu buonso pa buloba. Banjelo babi aba badi babikidibua ne: bademon. Mbaluishi ba Nzambi. Buonso buabo mbabi.