Fikomiana Tany Amin’ny Faritra Ara-panahy
Tsara avokoa ireo persona ara-panahy noforonin’i Jehovah. Avy eo dia nisy anjely iray nanjary ratsy. I Satana Devoly izany. Naniry ny hanompoan’ny olona eto an-tany azy, fa tsy an’i Jehovah, i Satana. Izao no nitranga:
Tao amin’ny saha Edena, dia nisy hazo maro be izay namokatra voa natsiro. Nilaza tamin’i Adama sy i Eva, vadiny, i Jehovah fa afaka nihinana tamin’izany tamin-kalalahana izy ireo. Nisy hazo iray anefa izay nolazain’Andriamanitra fa tsy tokony hihinanany. Nilaza izy fa, raha nihinana tamin’izany izy ireo, dia ho faty tokoa. — Genesisy 2:9, 16, 17.
Indray mandeha, rehefa irery i Eva dia nanatona mba hiresaka taminy ny menarana iray. Mazava ho azy fa tsy ilay menarana no tena niteny; i Satana Devoly no nanao izay hiheverana fa toa ilay menarana no niteny. Nilaza tamin’i Eva i Satana fa raha nihinana tamin’ilay voankazo voarara izy, dia ho hendry sahala amin’Andriamanitra. Nilaza koa i Satana fa tsy ho faty akory i Eva. Samy lainga avokoa ireo fanambarana roa ireo. Na dia izany aza, dia nino an’i Satana i Eva ka nihinana ilay voankazo. Tatỳ aoriana, dia nomeny koa i Adama, ary nihinana koa io. — Genesisy 3:1-6.
Avy amin’io tantara marina io, isika dia mianatra fa mpikomy sady mpandainga i Satana. Nilaza tamin’i Eva izy fa raha tsy mankatò an’Andriamanitra izy, dia tsy ho faty. Lainga izany. Maty tokoa izy ary toy izany koa i Adama. Tsy maty tamin’izay i Satana, fa ho faty izy amin’ny farany satria nanota. Mandra-pahatongan’izany fotoana izany, anefa, dia velona izy ary manohy mamitaka ny Jaona 8:44.
taranak’olombelona. Mbola mpandainga ihany izy, ary miezaka manosika ny olona handika ireo lalàn’Andriamanitra. —Nisy anjely hafa nikomy
Tatỳ aoriana, dia nisy anjely hafa nanjary ratsy. Nahamarika ireo vehivavy tsara tarehy teto an-tany ireo anjely ary naniry ny hanana firaisana taminy. Tonga teto an-tany àry izy ireo ary naka vatan’olombelona lahy. Avy eo dia naka ireo vehivavy ho azy izy ireo. Nifanohitra tamin’ny fikasan’Andriamanitra izany. — Genesisy 6:1, 2; Joda 6.
Niteraka zava-nanahirana be dia be ho an’ny taranak’olombelona koa izany. Niteraka ny vadin’ireny anjely ireny, nefa tsy ohatra ny ankizy rehetra ny zanany. Nihabe ka nanjary olona goavam-be nahery setra sy lozabe izy ireny. Tamin’ny farany dia nanjary feno herisetra aoka izany ny tany, hany ka nanapa-kevitra ny handringana ireo ratsy fanahy tamin’ny alalan’ny safodrano lehibe i Jehovah. Ny hany olombelona tafita velona tamin’ny Safodrano dia i Noa, olo-marina, sy ny fianakaviany. — Genesisy 6:4, 11, MN; 7:23.
Ireo anjely ratsy fanahy anefa dia niverina tany amin’ny faritra ara-panahy; tsy maty izy ireo. Nofaizina anefa izy ireo. Tsy navela hiverina tany amin’ny fianakavian’Andriamanitra misy ireo anjely marina izy ireo. Fanampin’izany, dia tsy namela azy ireo haka vatan’olombelona intsony i Jehovah. Ary amin’ny farany dia ho faty amin’ilay fitsarana lehibe izy ireo. — 2 Petera 2:4; Joda 6.
Noroahina avy tany an-danitra i Satana
Tany am-piandohan’ity taonjato misy antsika ity, dia nisy ady tany an-danitra. Milazalaza izay nitranga toy izao ny Apokalypsy, boky iray ao amin’ny Baiboly: “Ary nisy ady iray nipoaka tany an-danitra: i Mikaela [i Jesosy Kristy tafatsangana tamin’ny maty] sy ny anjeliny [tsara fanahy] niady tamin’ilay dragona [i Satana], ary niady ilay dragona sy ireo anjeliny [ratsy fanahy], nefa tsy naharesy, sady tsy nisy toerana ho azy ireo intsony tany an-danitra. Koa nazera àry ilay dragona lehibe, dia ilay menarana tany am-boalohany, ilay antsoina hoe Devoly sy Satana, izay mamitaka ny tany onenana manontolo; nazera ho etỳ an-tany izy, ary ny anjeliny [ratsy fanahy] dia niara-nazera taminy.”
Inona no vokany? Manohy toy izao ny fitantarana: “Noho izany, mifalia, ianareo ry lanitra sy ianareo izay monina ao aminy!” Afaka ny ho faly ireo anjely tsara fanahy satria tsy any an-danitra intsony i Satana sy ireo anjely, na fanahy (esprits), ratsy fanahy. Kanefa, ahoana ny amin’ireo olona eto an-tany? Hoy ny Baiboly hoe: “Loza ho an’ny tany sy ny ranomasina, fa nidina ho aminareo ny Devoly, sady manana fahatezerana lehibe, satria fantany fa vanim-potoana fohy sisa ny androny.” — Apokalypsy 12:7-9, 12, MN.
Eny tokoa, i Satana sy ireo namany ratsy fanahy dia sady mamitaka no miteraka loza lehibe ho an’ny olona eto an-tany. Antsoina hoe demonia ireny anjely ratsy fanahy ireny. Fahavalon’Andriamanitra izy ireny. Ratsy avokoa izy rehetra.