Ivyelewulwa vya ku muzimu vyonsinye vino Yehova wapanzile vyalinji avipwililike. Lelo umungeli wenga awino wizile apiluka. We-e umungeli we Satana Ciwa. Walondanga ukuti awantu wamupepa ukucila ukupepa Yehova. Mulole vino calinji:

Mu calo ca Edeni mwalinji imiti imivule yino yakomanga ivikomwa ivizima. E Yehova wanenile e Adamu nu muci e Eva ukuti wangalya ivili vyonsinye vino wakulonda. Lelo kwalinji vye umuti wonga wuno Leza wawalesizye ukulyako. Wawanenile ukuti nga wiza walyako walifwa.​—Intaliko 2:9, 16, 17.

Uwanda wumwi lyo Eva ali wenga, inzoka yizile ilanda nawe. Lelo yo-o yitalinji anzoka, walinji we Satana. Walenzile aciloleka nge inzoka ayino yikulanda. Wanenile Eva ukuti nga walya ku cimuti cino wawalesizye walinji nu kuwa ngati we Leza. Wamunenile nu kuti atalifwa. Lelo vyonsinye vyo-o vyalinji avya wufi. Ku cawulanda e Eva wivwizile Satana nu kulya icikomwa cino wawalesizye. Pa nsizi wizile apa ne Adamu nawenye alya.​—Intaliko 3:1-6.

Lyo-o ilyasi likatusambilizya ukuti e Satana we cipondoka swinya we cawufi. Wanenile Eva ukuti nga wakana ukwivwila vino Leza wamunenile atalinji nu kufwa. Lelo wowo walinji awufi, amuno e Adamu ne Eva nye wizile awafwa. E Satana weni atafwile palyanye lelo alifwa ku nkolelo pe vino wacisile. Acili we cawufi swinya watwalilila nu kuzembeleka awantu pa kuti wapondocele Leza.​—Yohani 8:44.

Pa nsizi awangeli na wanjinye wizile awapondocela Leza. Wizile awakumbwa awanaci mu nsi swinya walondanga ukulala nawo. Acino wizile awiza mu nsi nu kuzwala imiwili ya wuntu swinya wasendanga umwanaci uwili wensinye wino wakulonda. Nomba vino wacisile vyapusine sana nu kulonda kwa kwe Leza.​—Intaliko 6:1, 2; Yuda 6.

Co-o calesile intazi ku wantu. Awana wano wa-a awangeli wapafile mu wanaci, walile pano wakula wizile awawa nu lombwa nkaninye swinya walinji awakalale. Mu nsi mwizile amwizula uwuwipe wutupunye ica kuti ne Yehova wizile apingulapo ukonona awantu ku ntalala. E Noa nu lupwa lwakwe awano wapususilevye.​—Intaliko 6:4, 11; 7:23.

Nanti ciwe wowo, awangeli awawipe weni watafwile wanyocezile kwi yulu. Lelo e Yehova atawazumilizizye ukunyocela mu lupwa lwakwe ulwa kwi yulu. Swinya atawazumilizizye nu kuzwala imiwili ya wuntu na swinya. Wa-a awangeli wawipe walifwa pa mpindi yino aliyiza mu kupingula awantu.​—2 Peter 2:4; Yuda 6.

Mu kutalika kwa myaka ya wa 1900, kwi yulu kwakatusile inkondo. Ibuku lya mu Baibolo ilya Ukuwumbulika likati: “Kwakatusile inkondo mwi yulu: E Mikaele [akuli kuti e Yesu Klistu] na wangeli wakwe [awa cisinka] walwile ni cing’wina [e Satana], icing’wina na wangeli wakwe [awa wipe] walwile nawo lelo vitacimvizye, swinya vitalinji na pakwikala mwi yulu. Avino icing’wina cikulu casumvilwe pa nsi, icinzoka ca pa kutalika, cino cikakwitwa nu kuti e Satana swinya e Kasewanya, cino cikasovya awa mu nsi wonsinye; casumvilwe mu nsi, na wangeli wa kwe colico wasumvilwe naco ponga.”

Acani cino cakonsilepo? E Baibolo ikati: “Acino sansamukani mwe wa mwi yulu na mwe wano mwikalamo!” Awangeli wazima wazipizile ukuzewela amuno e Satana na wangeli wawipe, nanti ivimizimu wa wawinzile mwi yulu. Nga mu nsi mweni, acani cino calinji nu kucitika? E Baibolo ikati: “Nomba cawipila mwe wa mu nsi ne sumbi, amuno e Satana Kasewanya ayizile pe mwemwe, swinya ali ni cipyu icikulu, pa kumanya ukuti ali vye ni mpindi yitici.”​—Ukuwumbulika 12:7-9, 12.

E Satana ni vimizimu viwipe watwalilila ukusovya awantu nu kuwacuzya. Swinya wanye awangeli wawipe avili iviwa. Wawa awalwani wa kwe Leza swinya wonsinye pyu wawa awawipe.