Ne iluikak seki espíritus taixnamikkej
Keman Satanás kikuik se kouat uan iuan tajtoj Eva, yejua no kiixnamikik Dios
Nochin espíritus tein Jiova kinchijchiuak yolkualmej katkaj. Satepan, se ángel mochiuak amo yolkuali. Nejin yejua Amokuali Satanás. Satanás kinekia maj taltikpakneminij kiueyichiuanij yejua uan amo Jiova. Tein yekintsin tikitatij kijtoua keniuj mochiuak.
Itech xochital tein moajsia Edén, onkaya miak kuoujmej tein kitemakaya kuoujtakilot tel uejuelik. Jiova kiniluij Adán uan Eva, ke yejuan ueliskiaj kikuaskiaj nejon kuoujtakilomej. Sayoj ke Dios kiniluij maj amo kikuakan se taman kuoujtakilot. Kiniluij komo kikuaskiaj momikiliskiaj (Génesis 2:9, 16, 17).
Se tonal keman Eva iselti yetoya, se kouat peuak kinojnotsa. Tein melauj, amo katka se kouat akin kinojnotstoya; ta yejua Amokuali Satanás akin kichiuak maj moitani ke tajtojtoya se kouat. Satanás kiiluij Eva komo kikuaskia nejon kuoujtakilot tein kiiluijkaj maj amo kikuani, mochiuaskia tamatkej kemej Dios. No kiiluij ke amo momikiliskia. Nejin ome taman katka se xolopijyot. Maski ijkon, Eva kineltokak tein kijtoj Satanás uan kikuaj kuoujtakilot. Satepan kimakak Adán uan no kikuaj (Génesis 3:1-6).
Ika nejin tein yekmelauj mochiuak, tikitaj ke Satanás se taixnamikkej uan xolopij. Kiiluij Eva ke amo momikiliskia komo kiixnamikia Dios. Nejon katka se xolopijyot, ta Eva momikilij, uan Adán no momikilij. Ijkuak, Satanás amo mikik, maski satepan kemaj mikis porin tajtakoj. Sayoj ke kemej nemiok, kisentoka kinpojpoloua taltikpakneminij. Kisentoka takajkayaua, uan kitemoua keniuj kichiuas maj taltikpakneminij kitapanauilikan itanauatiluan Dios (Juan 8:44).
Oksekin ángeles no taixnamikkej
Satepan, okseki ángeles no mochiujkej amo yolkualmej. Nejin ángeles kinitakej siuamej tel kualtsitsin tein nemiaj nikan taltikpak, uan kinekkej imiuan auilnemiskej. Yejika ualajkej nikan taltikpak uan mochiujkej takamej, uan kinkuikej siuamej kemej imin namikuan. Dios amo ijkon kinchijchiujka, yejika amo kiuelitak tein kichiujkej (Génesis 6:1, 2; Judas 6).
Ángeles tein amo yolkualmej ualajkej nikan taltikpak uan auilnemikoj imiuan siuamej
Nejin no kichiuak maj taltikpakneminij kipiakan miak ouijkayomej. Imin namikuan nejin ángeles kinpiakej konemej, sayoj ke tamamej katkaj. Mochiujkej takamej tel uejueykej uan chikaujkej tein tateuiayaj uan tetajyouiltiayaj. Satepan, noyampa onkaya tateuilis, yejika Jiova kinemilij kinixpolos tein amo yolkualmej ika se Tetsaujkakiouit. Sayoj Noé akin katka yolmelauak uan ichankauan, makiskej keman ualaj tetsaujkakiouit (Génesis 6:4, 11; 7:23).
Ángeles tein amo yolkualmej, oksepa mokepkej kampa yetoyaj okseki ángeles. Amo mikkej, sayoj ke kintatsakuiltijkej. Jiova amo kinkauak maj oksepa pouinij imiuan iángeluan tein yolmelaujkej, niono kinkauak maj oksepa mochiuanij takamej. Uan satepan mikiskej itech ueyi taixkomakalis (2 Pedro 2:4; Judas 6).
Satanás kikixtijkej ne iluikak
Satanás uan iamokuali ejekauan kinkixtijkej ne iluikak
Itech xiuit 1914, peuak se ueyi neteuilis ne iluikak. Amaix Apocalipsis kijtoua: “Peuak ne teuilis ne eluiyaktsinko. Uan Miguel [Jesús tein moajokuik], [...] iuan iángelikniuan [tein yolkualmej] kiteuiayaj ne amokuali tekuani [oso Satanás]. Uan ne amokuali tekuani iuan itekitikaikniuan [tein amo yolkualmej] no moteuiayaj iuan ne ángelmej de Dios. Pero in amokuali tekuani amo uelia kintanilis [...]. Ika ya nojon [...] amo uelik ok mokauas ok nepa eluiyaktsinko. Uan ijkon kikalantamotkej ne ueyi amokuali tekuani, yejua ne in kouat ten ne achtopa ipa nentiuits. [...] Kitokaytijkej in amokuali, uan [...] Satanás, ne ten kinkajkayaujtinemi nochi in taltikpakuanij. [...] Uan no kinkalantamotkej nochi ne itekitikaikniuan de Satanás. Uan nochi uetsikoj nikan taltikpak”.
¿Toni kiualkuik nejin neteuilis? Biblia kijtoua: “Ika ya nojon nochi namejuan ten nankalyetonij de eluiyaktsinko, ximoueyiyolpaktijtinemikan”. Ángeles tein yolkualmej, ueliskiaj yolpakiskia porin Satanás uan iángeluan oso espíritus tein amo yolkualmej, amo yetoyajok iluikak. Sayoj ke, ¿toni kinpanoskia taltikpakneminij? Biblia kijtoua: “Semi nanteikneltianij namejuan ten nankalyetokkej tech in taltikpak [...], porin ne amokuali Satanás ualpantemok ya para tekititinemis [...] ika ueyi yolkualanyot. [...] Porin kuali kimati ke amo kipia ok miak tonalmej” (Apocalipsis 12:7-9, 12).
Kemaj, Satanás uan itekitikaikniuan tein amo yolkualmej, kinpojpolouaj taltikpakneminij uan kinteltajyouiltiaj. Nejin ángeles tein amo yolkualmej motokaytiaj amokuali ejekamej. Yejuan kitauelitaj Dios. Nochin amo yolkualmej.
