Ko e tau peresona agaaga oti ne tufugatia e Iehova kua mitaki. Ka e taha e agelu ne liliu kelea. Ko ia ko Satani ko e Tiapolo. Ne manako a Satani ke he tau tagata he lalolagi ke tapuaki ki a ia ka e nakai tapuaki ki a Iehova. Ko e mena hanei ne tupu:

Ha ha i ai he kaina i Etena, kua loga lahi e tau akau ne fua mai e tau fua humelie. Ne tala age a Iehova ki a Atamu mo e haana hoana, ko Eva, kua ataina a laua ke kai mai ia lautolu. Ka e taha e akau ne pehē e Atua ke aua neke kai mai ai a laua. Ne pehe a ia ka kai mai ai a laua, to mamate ni a laua.—Kenese 2:9, 16, 17.

Ko e taha aho ko Eva ni tokotaha he magaaho ne vagahau e gata ki a ia. Mooli, nakai ko e gata mooli ne tutala; ka ko Satani ko e Tiapolo ne taute ke tuga mo e gata ne tutala. Ne tala age a Satani ki a Eva, ka kai e ia e fua akau fakatapu na, to iloilo a ia ke tuga e Atua. Ne pehē foki a ia to nakai mate a ia. Ko e tau talahauaga ua nei ko e tau pikopiko. Ka e taha e mena, ne tali tonu a Eva ki a Satani mo e kai e ia e fua akau. Ko e magaaho fakamui, ne age foki e ia ki a Atamu, ti kai foki a ia.—Kenese 3:1-6.

Mai he tala mooli nei, ne iloa e tautolu ko Satani ko e totoko mo e ko e pikopiko. Ne tala age a ia ki a Eva kaeke ke nakai omaoma a ia ke he Atua, to nakai mate a ia. Ko e pikopiko e talahauaga na. Kua hoko e mate ki a ia ti pihia foki a Atamu. Kua nakai mate a Satani he magaaho ia, pete ni he pihia ka to mate ni a ia ha kua hala a ia. Ka ko e mogonei, ko e mena ia, kua moui agaia a ia mo e matutaki atu ke fakahēhē e tagata. Ko ia agaia ni ko e pikopiko, mo e lali a ia ke tamai e tau tagata ke moumou e tau fakatufono he Atua.—Ioane 8:44.

Ko e magaaho fakamui, kua liliu kelea ai falu he tau agelu. Kua kitia he tau agelu e tau fifine mata fulufuluola he lalolagi ti manako a lautolu ke feuaki mo lautolu. Ti o hifo mai a lautolu ke he lalolagi mo e fakafaliu e tau tino ke he tau tagata taane. Ka mole ia ti uta ai e tau fifine ma lautolu. Ko e totoko e mena nei ke he finagalo he Atua.—Kenese 6:1, 2; Iuta 6.

Kua fakatupu lahi foki he mena nei e matematekelea ma e tagata. Ne fanau he tau hoana he tau agelu nei e tau fanau, ka ko lautolu nakai tuga mooli e tau fanau. Ne tutupu hake a lautolu ke eke mo tau tupua hagahaga kelea mo e vale. Ko e fakahikuaga ti puke ai e lalolagi he tau tagata mahani favale, ti manatu a Iehova ke moumou e tau tagata mahani kelea na, he fakapuke lahi mahaki. Ko e tau tagata ni ne hao mai he Fakapuke ko e tagata tututonu ko Noa mo e haana magafaoa.—Kenese 6:4, 11; 7:23.

Ko e tau agelu mahani kelea, he magaaho ia, ne liliu atu ai ke he kautu agaaga; ka e nakai mamate a lautolu. Ka kua fakahala a lautolu. Kua nakai fakaatā a lautolu ke liliu hake ke he magafaoa tututonu he Atua ko e tau agelu. Ko e taha mena foki, kua nakai liu fakaatā e Iehova a lautolu ke liliu ke he tau tino tagata ha lautolu. Ko e mena ia to mamate a lautolu he fakafiliaga lahi.—2 Peteru 2:4; Iuta 6.

He 1914 ne hoko e tau i luga he lagi. Ne fakamaama mai he Tohi Tapu he tohi a Fakakiteaga e mena ne tupu: “Kua tau foki a lautolu he lagi; ko Mekaeli [ko Iesu Keriso ne liu tu mai] mo e hana tau agelu [mitaki] kua tau ke he tarako [Satani], ko e tarako foki kua tau a ia mo e hana tau agelu [kelea]; Ka e nakai kautu a lautolu, ti nakai tuai moua foki ha mena ke he lagi ke nonofo ai a lautolu. Ti liti hifo ni e tarako lahi, ko e gata tuai haia, kua higoa ko e tiapolo, ko Satani foki ia, ko ia kua fakahehe e lalolagi oti; kua liti hifo a ia ke he lalolagi, kua liti hifo foki hana tau agelu [kelea] fakalataha mo ia.”

Ko e heigoa e fua? Kua matutaki atu e talahauaga nei: “Ko e mena ia kia fiafia ai a koe ko e lagi, mo mutolu kua nonofo ai.” Kua lata ke fiafia e tau agelu mitaki ha ko Satani mo e haana tau agelu kelea, po ke tau agaaga, kua nakai liliu fakaatā ke he lagi. Ka e kua e tau tagata he lalolagi? Kua pehē mai e Tohi Tapu: “Oi fakaalofa kia mutolu kua nonofo ke he fonua mo e tahi, ha kua hifo kia mutolu e tiapolo kua ita lahi, ha kua iloa e ia kua tote hana vaha.”—Fakakiteaga 12:7-9, 12.

E, ko Satani mo e haana tau kapitiga kelea ne fakahēhē mo e fakatupu e oi lahi mahaki ke he tau tagata he lalolagi. Ko e tau agelu kelea nei ne fakahigoa ai ko e tau temoni. Ko e tau fi he Atua a lautolu. Kua kelea a lautolu oti.