Dibopiwa ka moka tša moya tšeo Jehofa a di bopilego di be di lokile. Ka morago morongwa o tee o ile a fetoga o mobe. Yena ke Sathane Diabolo. Sathane o be a nyaka gore batho ba mo lefaseng ba mo rapele go e na le go rapela Jehofa. Se ke seo se diragetšego:

Kua tšhemong ya Edene go be go e-na le dihlare tše dintši tšeo di bego di enywa dienywa tše bose. Jehofa o ile a botša Adama le mosadi wa gagwe Efa gore ba ka ja dienywa tša tšona ka bolokologi. Eupja go be go e-na le sehlare se tee seo Modimo a itšego ga se ba swanela go ja dienywa tša sona. O itše ge ba be ba ka di ja, ba be ba tla hwa e le ka kgonthe.—Genesi 2:9, 16, 17.

Ka letšatši le lengwe Efa o be a nnoši ge noga e bolela le yena. Ee, ge e le gabotse e be e se noga yeo e bego e bolela; e be e le Sathane Diabolo yo a ilego a dira gore go bonagale eka noga e a bolela. Sathane o ile a botša Efa gore ge e ba a be a ka ja seenywa se se ileditšwego, o be a tla hlalefa a swana le Modimo. O ile a ba a bolela gore Efa o be a ka se hwe. Dipolelo tše ka bobedi e be e le maaka. Lega go le bjalo, Efa o ile a dumela Sathane gomme a ja seenywa. Ka morago, o ile a fa Adama, yo le yena a ilego a ja.—Genesi 3:1-6.

Go tšwa taodišong ye ya therešo, re lemoga gore Sathane ke lerabele le moaketši. O boditše Efa gore ge a be a ka se kwe Modimo o be a ka se hwe. Ao e be e le maaka. Efa o ile a hwa gomme go bile bjalo le ka Adama. Sathane ga se a ka a hwa ka nako yeo, gaešita lege mafelelong a tla hwa ka gobane a dirile sebe. Lega go  le bjalo, mo lebakeng le o sa dutše a phela gomme o sa tšwela pele a timetša batho. O sa dutše e le moaketši, gomme o leka go dira gore batho ba robe melao ya Modimo.—Johane 8:44.

Ka morago, barongwa ba bangwe ba ile ba fetoga ba babe. Barongwa ba ile ba bona basadi ba babotse mo lefaseng gomme ba nyaka go ba le dikopano tša botona le botshadi le bona. Ka gona ba ile ba tla lefaseng gomme ba apara mebele ya batho ba banna. Ke moka ba itšeela basadi. Se se be se thulana le morero wa Modimo.—Genesi 6:1, 2; Juda 6.

Le gona se se ile sa bakela batho mathata a magolo. Basadi ba barongwa ba ba ile ba belega bana, eupja e be se bana ba tlwaelegilego. Ba ile ba gola go ba ­dinatla tše šoro le tše sehlogo. Mafelelong lefase le ile la tlala bošoro kudu moo Jehofa a ilego a rera go fediša batho ba kgopo ka meetse-fula a magolo. Batho feela bao ba ilego ba phologa Meetse-fula e bile Noage wa moloki le lapa la gagwe.—Genesi 6:4, 11; 7:23.

Lega go le bjalo, barongwa ba babe ba ile ba boela lefelong la moya; ga se ba ka ba hwa. Eupja ba ile ba otlwa. Ga se ba ka ba dumelelwa go boela lapeng la Modimo la barongwa ba go loka. Go feta moo, Jehofa ga se a ka a hlwa a sa ba dumelela go apara mebele ya batho. Mafelelong ba tla hwa kahlolong e kgolo.—2 Petro 2:4; Juda 6.

Karolong ya mathomo ya lekgolo le la nywaga, go bile le ntwa legodimong. Puku ya Beibele ya Kutollo e hlalosa seo se diragetšego: “Kwa lexodimong xwa tsoxa ntwa ya xe Mikaele [Jesu Kriste yo a tsošitšwego] le Barongwa ba xaxwe [ba go loka] bà e-lwa le Nôxa [Sathane], ’me Nôxa è e-lwa è na le Barongwa ba yôna [ba babe]. Nôxa ya se kê ya fenya; kwa lexodimong xwa se kê xwa hlwa xò e-ba le madulô a yôna. Nôxa e kxolo yeo ya rakwa; yôna ye ba rexo ké Diabolo le Sathane, motimetši wa lefase ka moka la batho. Ya lahlêlwa lefaseng; le Barongwa ba yôna [ba babe] ba lahlwa le yôna.”

Mafelelo e bile afe? Pego e tšwela pele ka gore: “Thabang-xê, lena Maxodimo, le ba ba axilexo xôna.” Barongwa ba go loka ba be ba ka thaba ka gobane Sathane le barongwa ba babe goba meoya, ba be ba se sa hlwa ba le legodimong. Eupja go thwe’ng ka batho ba mo lefaseng? Beibele e re: “Ba madi-mabe ké lena ba Le axilexo lefaseng le lewatleng, xobane Diabolo ó theoxetše xo lena à tuka boxale ka kudu; ó tseba xe a sa šaletšwe ke lebakanyana fêla.”—Kutollo 12:7-9, 12.

Ee, Sathane le bagwera ba gagwe ba kgopo ba timetša le go baka madimabe a magolo go batho ba ba lego mo lefaseng. Barongwa ba ba kgopo ba bitšwa batemona. Ke manaba a Modimo. Ka moka ga bona ke ba babe.