Jiihóvah éí tʼááʼátʼéii ńtʼééʼ níłchʼi dineʼé yáʼátʼéehgo áyiilaa. Áko ndi łaʼ bąąhági áátʼįįłgo áʼdiilyaa. Bí éí Séítan nilı̨́. Séítan éí diné nihookááʼ táá siʼą́ą́ ńtʼééʼ bichʼįʼ nidahałáa doogo yiniizı̨́ı̨́ʼ, Jiihóvah bichʼįʼ éí ndagaʼ. Áko díí éí kóhóótʼįįd:

Dáʼákʼéh ĺíden wolyéedi tsin tʼóóʼahayóígo hólǫ́ ńtʼééʼ. Jiihóvah éí Ádam dóó beʼasdzą́ą́ ĺiv díí tʼáá nihí nosingo tsin bineestʼąʼ bąąhdóó osą́ą dooleeł yidííniid. Áko ndi tsʼídá tʼááłáʼí tsin God doo bąąhdóó adoosı̨́įł da yidííniid, ákóohdzaago éí dínóhneeł.—Genesis 2:9, 16, 17.

Łaʼajı̨́ı̨́ góneʼ ĺiv tʼáá sáhí nagháago tłʼiish bichʼįʼ haadzííʼ. Ákó ndi Séítan tłʼiish yáyiiłtiʼgo áyiilaa. Séítan éí ĺiv íidííniid díidígíí tsin bąąhdóó ííníyą́ągo éí Godgi átʼéego hódzą́ągo nitsíníkees doo, dóó doo dadíítsaał da. Éí tʼááʼáłah yoochʼííd átʼé. Ákó ndi, ĺiv Séítan yoosdląądgo tsin bineestʼąʼ jííyą́ą́ʼ. Ádam baa jiníʼą́ągo ałdóʼ yiyííyą́ą́ʼ.—Genesis 3:1-6.

Díí kweʼé haneʼ tʼááʼaaníigo baa hóóneʼígíí, Séítan doo tsʼííd yee God yichʼįʼ niilteeʼii jílı̨́ı̨́ lá dóó biyoochʼííd lágo béédahoozįįd. Bí éí ĺiv tsin bineestʼąʼ bąąhdóó ííníyą́ągo doo dadíítsaał da yidííniid. Díí éí yoochʼííd átʼé. Tʼáá áhodooʼniid yę́ęgi átʼéego ájídin, Ádam ałdóʼ. Séítan ajisihígíí biniinaa hwí ałdóʼ dajidootsaał. Áko tʼahdii diné yiʼooloh dóó biyoochʼííd. God bibee hazʼáanii  diné doo yikʼeh dahółʼı̨́įda doogo yóʼní.—John 8:44.

Áádóó łaʼ níłchʼi diyinii nidaalʼaʼí doo yáʼáshxóógo ádaʼdiilyaa. Chʼikę́ę́h danizhónígo deeyiiłtsą́ągo iłʼishtéézh biniiyé yidáh danoosniiʼ. Níłchʼi diyinii nidaalʼaʼí nihookááʼgi dinégo ádaʼdiilyaa. Tʼáádóó chʼikę́ę́h tʼáá bí dee nízinígíí beʼasdzą́ą́ ádayiilaa. God íinízinę́ę bikʼijįʼ ádaʼjiilaa.—Genesis 6:1, 2; Jude 6.

Áko éí bitsʼą́ą́dóó bílaʼashdlaʼii yéego achʼı̨́ʼ nahwiiʼná yihikai. Beʼasdzą́ą́ ádeeyiilaa yę́ę éí díí níłchʼi diyinii nidaalʼaʼí yá nidaʼiishchínée yéʼiitsoh daazlı̨́ı̨́ʼ. Biniinaa Jiihóvah diné doo yáʼádaashxóonii tó yíląąd bee ádeeshdįįł niizı̨́ı̨́ʼ. Tsʼídá Nóah dóó bighan bił hazʼánii tʼéiyá Tó Yíląąd yiiʼdóó yisdáákai.—Genesis 6:4, 11; 7:23.

Ákó ndi níłchʼi diyinii nidaalʼaʼí doo yáʼádaashxónígíí yádiłhił níłchʼi dineʼé kéédahatʼínéego nídáasdlı̨́ı̨́ʼ. Tʼáadoo daneeznáa da. Áko éí tʼááʼátʼéii ńtʼééʼ hándahwiistʼą́. God biníłchʼi diyinii bándaalʼaʼgo tʼáá ákogo ádaaníłígíí tʼáadoo áajı̨́ʼ bił bééʼálniiʼ da. Doo bílaʼashdlaʼii ínáázhdiʼdoolnííłgo Jiihóvah ádahoolaa. Nihodiyootʼááł beiníłką́ąjı̨́ʼ ałtso ádaazhdoodįįł.—2 Peter 2:4; Jude 6.

Diyin Bizaad Revelation biiʼ 1914 yihaa yę́ędą́ą́ʼ áhóótʼiidígíí,  díí átʼéego yaa hoolneʼ: “Nítʼééʼ yáʼąąshdi anaaʼ hazlı̨́ı̨́ʼ! Máíkel [éí Jesus Christ náábiʼdiilzáhígíí átʼı̨́] áádóó bidiyingo nidaalʼaʼí [yáʼádaatʼéhígíí] éí naʼashǫ́ʼiitsoh [Séítan] yił daʼahigą́ą́ nítʼééʼ, áko naʼashǫ́ʼiitsoh áádóó bindaalʼaʼí [doo yáʼádaashxóníí] hoł daʼahoogą́ąʼgo bikʼeh hodeesdlı̨́ı̨́ʼ, áko yáʼąąshdi doo bá hazʼą́ą da hazlı̨́ı̨́ʼ. Naʼashǫ́ʼiitsoh ayóóʼátʼéii, ałkʼidą́ą́ʼ tłʼiishtsohígíí, éí níłchʼi bidaʼiiníziinii binanitʼaʼí, Séítan wolyéii, [nihookááʼ] tʼáá siʼą́ą́ nítʼééʼ yinaʼaloʼii [nihookááʼ] bikáaʼjı̨́ʼ bidah ahoolghan; bindaalʼaʼí [doo yáʼádaashxóníí] tʼáá bił bidah adabidiistłʼííd.”

Éísh bitsʼą́ą́dóó haa hoodzaa? Áádóó Diyin Bizaad ánáádíʼní: “Éí bąą yáʼąąshii índa biyiʼ kéédahohtʼíinii nihił dahózhǫ́ǫ leʼ!” Séítan dóó bindaalʼaʼí yáʼąąshdi doo náá dahodlónígíí biniinaa níłchʼi diyinii nidaalʼaʼí yáʼádaatʼéhígíí bił da hóozhǫǫd. Áko shąʼ diné nihookááʼ yiiʼ kééhatʼínígíí? Diyin Bizaad áníigo éí: “Nidi nihí [nihookááʼ] índa tónteel nohłíinii doo hojoobaʼ ájíníi da! Háálá níłchʼi bidaʼiiníziinii binanitʼaʼí tʼóó kónígháníjįʼ bee nááhodidooʼnaałígíí bił bééhózingo ayóó átʼéego báháchįʼgo nihichʼįʼ hadahóóleʼ.”—Revelation 12:7-9, 12.

Aooʼ, Séítan dóó bándaalʼaʼí níłchʼi bidaʼiiníziinii daolyéhígíí nihookááʼ biiʼ diné yéego yichʼįʼ nidahwiiłná. Éí God biʼanaʼí dajílı̨́. Éí tʼáá ájíłtso doo dajítsʼíi da.