Ngehn akan koaros me Siohwa ketin kapikada me mwahu nin tapio. Ahpw mwuhr emen rehrail eri suwedla. Ih Sehdan me Tepilo. Sehdan men aramas akan en kaudokiong ih ahpw kaidehn Siohwa. Eri, iet me wiawi:

Nan mwetuwel en Ihden, mie soangen tuhke tohto me wahrail kan kin iou. Siohwa ketin mahsanihong Adam oh eh pwoud Ihp me ira kak kang wahntuhke pwukat koaros. Ahpw mie tuhke pwoat me Koht ketin mahsanih me ira en dehr kang. E ketin mahsanih me ma ira pahn kang, ira pahn uhdahn mehla.​—Senesis 2:9, 16, 17.

Ehu rahn sineik men koasoiong Ihp ni ahnsou me e kelekelehpw. Kaidehk sineiko me uhdahn koasokosoi, ahpw Sehdan me Tepil me kahrehda sineiko en mwomwen koasokosoi. Sehdan padahkihong Ihp me ma e pahn kang wahntuhke me keinapwdi, e pahn loalokongla duwehte Koht. E pil nda me Ihp sohte pahn mehla. Ire pwukat koaros likamw. Ahpw Ihp kamehlele Sehdan oh kang wahntuhkeo. Mwuhr, e kihong Adam oh Adam pil iang kang.​—Senesis 3:1-6.

Sang poadopoad wet, kitail sukuhlki me Sehdan wia sounpelian oh sounlikamw men. E padahkihong Ihp me ma e sapeikiong Koht, e sohte pahn mehla. Met likamw pwoat. Ihp mehla oh Adam pil mehla. Sehdan sohte mehla ahnsowohte ahpw e pahn mehla ehu rahn pwehki eh wiahda dihp. Ahpw ni ahnsou wet, e  wie momour oh pitipitih aramas. Ih sounlikamw men oh e kin kasonge aramas ren kauwehla sapwellimen Koht kosonned akan.​—Sohn 8:44.

Mwuhr, ekei tohnleng pil suwedla. Tohnleng pwukat kilangada lih masamwahu kan nin sampah oh men wia nsenen pwopwoud rehrail. Irail eri kohdihdo sampah oh doadoahngki paliwar uduk oh mwomwehda ohl kei. Irail eri pwoudikihda lih akan. Met uhwong kupwuren Koht.​—Senesis 6:1, 2; Sud 6.

Met pil kahrehda kahpwal laud ong aramas. En tohnleng pwukat arail pwoud naitikihada seri kei, ahpw seri pwukat weksang seri teikan. Seri pwukat wiahla kodon kei oh irail kin uhdahn lemei. Sampah eri direkihla tiahk lemei kahrehda Siohwa ketin koasoanehdi en kasohrehkihla aramas suwed kan nohlik lapalap ehu. Ihte ohl lelepek Noha oh eh peneinei me pitsang Nohliko.​—Senesis 6:4, 11; 7:23.

Ahpw tohnleng suwed kan pwurala nanleng. Re sohte mehla. Ahpw irail ale kalokeparail. Koht solahr ketin mweidohng irail en iang sapwellime peneinei en tohnleng mwahu kan. Siohwa pil solahr ketin mweidohng irail en doadoahngki paliwar uduk. Oh ehu rahn irail pahn mehla ni rahnen kadeik lapalap.​—Sud 6.

Nan pahr 1914, mahwen wiawi nanleng. Pwuhken Kaudiahl kasalehda dahme wiawi: “Mahwen ahpw tepida nanleng. Maikel [Sises Krais me ketin iasadahr] oh ienge tohnleng [mwahu] kan mahweniong drakono [Sehdan], oh drakono oh ienge [tohnleng suwed] kan mahweniong Maikel oh ienge ko. Drakono eri lohdi; eri, sohla dehu ehu mweimweiong ih oh ienge ko nanleng. Drakon kalaimwuno eri pisikensang nanleng. Eri, iei ih serpent en mahso, me adaneki Tepil de Sehdan, me kin pitipitih sampah pwon, oh me pisikendiongehr sampah iangahki ienge tohnleng [suwed] kan koaros.”

Ia imwilahn met? Paipel doula oh kasalehda: “Ihme kumwail nanleng kan, kumwail perenda, oh koaros me kin kousoan nanleng!” Tohnleng mwahu kan kak peren pwehki Sehdan oh tohnleng suwed kan, de ngehn suwed kan, solahr mi nanleng. Ahpw ia duwen aramas akan nin sampah? Paipel mahsanih: “Meid suwediong sampah oh madau! Pwe Tepilo leledohr rehmwa, oh e inenen lingeringer kowahlap pwehki eh ese me eh ahnsou mwotomwotalahr.”​—Kaudiahl 12:7-9, 12.

Ei, Sehdan oh ienge tohnleng suwed kan kin pitipitih aramas oh kahrehda kahpwal laud nin sampah. Tohnleng suwed pwukat kin adaneki ngehn saut akan. Irail iei imwintihti en Koht. Irail koaros suwed.