Jehovä kamanqan espïritukunaqa llapanmi alli kayarqan. Peru tsëpitaqa mana alli tikrarmi, juk angel Satanas Diablu këman charqan. Diabluqa Jehoväta adorayänampa rantin, nunakuna pëta adorayänantam munarqan. Qateqninchömi ima pasanqanta willakun.

Eden huertachöqa munapëpaq frütakunata wayoq mëtsika plantakunam karqan. Adantawan warmin Ëvataqa, tsë frütakunata mikuyta puëdiyanqantam Jehovä nirqan. Peru juk plantapa frütantaqa mana mikuyänampaqmi nirqan, y mikurqa wanuyänampaq kaqtam willarqan (Genesis 2:9, 16, 17).

Juk kutim Ëva japallan këkaptin culebra parlaparqan. Rasumpa kaqchöqa manam culebratsu parlaparqan, sinöqa Satanas Diablum rurarqan culebra parlapëkanqannö kanampaq. Diablum Ëvata nirqan tsë frütata mikurqa, Diosnö yachaq kanampaq kaqta y mana wanunampaq kaqta. Tsëqa manam rasuntsu karqan. Peru Ëvaqa Diabluta creirmi tsë frütata mikurqan. Tsëpitanam Adanta qararqan y pëpis mikurqanmi (Genesis 3:1-6).

Tsë pasanqampitam yachakuntsik Diabluqa Diospa contran y engañakoq kanqanta. Engañarmi Ëvata nirqan, Diosta mana cäsukurpis mana wanunampaq kaqta. Peru Ëvaqa wanurqanmi, y tsënöllam Adanpis wanurqan. Diabluqa manam tsë tiempu wanurqantsu, peru jutsata rurashqa karmi wanunqa. Tsënö kaptimpis, kananqa kawëkanran y nunakunata engañarmi këkan. Kanampis ulikurmi o llullakurmi këkan, y Dios mandakunqankunata nunakuna mana  cäsukuyänampaqmi imëkata rurëkan (Juan 8:44).

Tsëpitanam mas angelkunapis mana alli tikrayarqan. Pëkunaqa Patsachö shumaq warmikunata rikarmi, pëkunawan oqllanakuyta munayarqan. Tsëmi ollquman tikrëkur Patsaman shamur warmikunawan casakuyarqan. Tsë rurayanqanqa Dios munanqampa contranmi karqan (Genesis 6:1,2; Jüdas 6).

Tsërëkurpis nunakunaqa alläpam sufriyarqan. Angelkunapa tsurinkunaqa, manam wakin wamrakunanötsu kayarqan, sinöqa mana allita ruraq y mana llakipäkoq jatusaq nunakunam kayarqan. Tsëpitanam maqanakurlla y wanutsinakurlla Patsachö kayanqanta rikar, Jehovä decidirqan mana allita ruraqkunata alläpa tamyawan ushakätsinampaq. Tsë tamya pasariptinqa, allita ruraq Noëwan familianllam Patsachö quedayarqan (Genesis 6:4, 11; 7:23).

Tsënö kaptimpis, tsë mana alli angelkunaqa ciëlutam kutiyarqan, y manam wanuyarqantsu. Peru Teyta Diosqa castigarmi allita ruraq angelkunawan juntu kayänanta permitirqannatsu. Kananqa manam Jehovä permitinnatsu nunaman tikrayänanta, y tiempuwanqa juiciu junaqchömi wanuyanqa (2 Pëdru 2:4; Jüdas 6).

Qallanan cien watakuna witsanmi ciëluchö guërra karqan. Apocalipsis libruchömi tsë pasakunqampaq kënö willakun: “Tsënam ciëluchö guërra qallëkurqan. Miguelwan [kawarimushqa Jesuswan] [alli] angelninkunam mantsëpaq jatun culebrawan [Diabluwan] pelyayarqan, y mantsëpaq jatun culebrawan [mana alli] angelninkunapis pëkunawanmi pelyayarqan, peru manam vencita puëdiyarqantsu, y manam pëkunapaq ciëluchö sitiu karqannatsu. Tsëmi mantsëpaq jatun culebraqa, awmi, entëru patsata engañëkaq Diablu y Satanas niyanqan unë kaq culebraqa, uraman jitashqa karqan. Pëtaqa patsamanmi jitarkayämurqan, y angelninkunatapis pëtawan juntum jitarkayämurqan”.

¿Imatan tsëpita pasarqan? Tsë libruchömi këta willakun: “Tsëmi ¡kushikuyë ciëlukuna, y tsëchö kawaqkuna! Peru ¡allaw patsa y lamar!”. Diabluwan mana alli angelkuna ciëluchö manana kayaptinmi, alli kaq angelkunaqa kushikuyarqan. Peru ¿imatan pasanan karqan Patsachö nunakunataqa? Bibliachömi këta nin: “¡Allaw patsa y lamar! Wallka tiempullana kananta musyarmi, Diabluqa alläpa cölerashqa qamkunaman urämushqa” (Apocalipsis 12:7-9, 12).

Awmi, Diabluwan demoniu nir reqiyanqan mana alli angelkunaqa, Patsachö nunakunatam engañayan y alläpa sufritsiyan. Pëkunaqa Diospa contranmi këkäyan, y llapampis mana allim kayan.