Diospa unanchasqan angelkunaqa llapallankum allin karqaku. Chaymantam ichaqa huk angel Diospa contranpi hatarirurqa. Chay angelmi satanasña rikuriruspan runakuna payta yupaychananta munarqa.

Eden huertapiqa achka-achka sacham miskillaña ruruyuq karqa. Chaymi Diosqa Adantawan Evata nirqa llapallan sachakunapa rurunta mikunankupaq, ichaqa nirqataqmi huertapa chawpinpi sachapa rurunta mana mikunankupaq. Chay sachapa rurunta mikuruspankuqa wañunankum karqa (Genesis 2:9, 16, 17).

Huk punchawmi sapallan kachkaptin Evata culebra rimapayarqa. Ichaqa manam culebrachu rimarqaqa, aswanqa satanasmi. Satanasmi Evata nirqa chay sachapa rurunta mikuruspaqa Dios hina yachayniyuqña rikurirunanmanta. Nirqataqmi: “Mikuruspaykiqa manam wañunkichu”, nispa. Chay nisqankunaqa llullam karqa, Evaqa satanaspa nisqanta creeruspanmi chay sachapa rurunta mikururqa. Qusanmanpas quykuptinmi paypas mikururqa (Genesis 3:1-6).

Tukuy chaykunawanmi yachanchik satanasqa mana kasukuq llulla kasqanta. Satanasqa Evatam nirqa: “Manam wañunkichu”, nispa. Ichaqa Adanwan Evaqa wañukurqakum. Satanasqa hinallam runakunata pantachichkan, ichaqa Diosmi chinkachinqaña llulla kasqanrayku chaynataq mana kasunanchikpaq pantachiwasqanchikrayku (Juan 8:44).

Wakin angelkunapas Diosta mana kasukuspankum, warmikunata munapayaspanku kay pachaman uraykaramurqaku. Hinaspam runaña rikuriruspanku kay pachapi warmikunawan casarakururqaku. Chayraykum Diosqa paykunawan llumpayta piñakururqa (Genesis 6:1, 2; Judas 6).

Chayqa runakunatapas sasacharqam, ¿imaynanpi? Chay angelkunapa churinkunaqa hatu-hatun runakunam karqaku hinaspam maqakuqllaña, mana allin ruwaqkunallaña karqaku. Paykunaraykum kay pachapiqa mana allin ruwayllaña karqa, chayraykum Diosqa chay runakunata llumpa-llumpay parawan chinkarachirqa. Kay allpa pachapiqa Noeyllañam, warmichanpiwan, churinkunapiwan chaynataq llumchuyninkunapiwan qiparurqaku (Genesis 6:4, 11; 7:23).

Chay angelkunaqa hanaq pachamanmi kutirqaku, ichaqa Diosqa manañam saqirqañachu allin angelninkunawan hukllawakunankutaqa. Manañataqmi saqirqañachu kaqmanta runa hina rikurinankutapas. Paykunaqa Diospa piñakuynin punchawpim chinkachisqa kanqaku (2 Pedro 2:4; Judas 6).

Apocalipsis qillqapim chaymanta kaynata willawanchik: “Chaymantam hanaq pachapi guerra karurqa, Miguelmi angelninkunapiwan manchakuypaq  culebrawan pelearqa, manchakuypaq culebrapas angelninkunapiwanmi pelearqa, ichaqa vencerachikurqakum, manataqmi hanaq pachapi sitiopas paykunapaqqa karqañachu. Chaymi chay manchakuypaq culebraqa kay pachaman wischumusqa karqa. Payqa diablowan hinaspa satanaswan sutichasqa ñawpaqmantaraq kaq culebram. Paymi kay pachapi llapallan runakunata pantachichkan. Paymá angelninkunapiwan kay pachaman wischumusqa karqa”, nispa.

¿Imaynataq hanaq pachapi Diosman sunqu angelkunaqa tarikurqaku satanas wischurachikamuptin? Hina Apocalipsis qillqapim nin: “¡Cielokuna kusikuychik, kusikuychiktaqyá chaypi yachaqkunapas”, nispa. Diosta kasukuq angelkunaqa anchatam kusikurqaku satanas hinaspa payman sayapakuq angelkuna wischurachikamuptinku. Chaynaqa, ¿imataq pasarqa kay pachapi runakunawanqa? Hina bibliapitaqmi nin: “¡Imaynaraq kanqa kay pachawan lamar quchaqa! Diabloqa llumpay piñasqallañam qamkunaman uraykaramun, payqa yachakunmi pisi tiempoyuqllaña kasqanta”, nispa (Apocalipsis 12:7-9, 12).

Satanaswan payman sayapakuq angelkunaqa kay allpa pachapim runakunata engañaspan ñakarichichkanku, chay angelkunaqa demoniokunam. Paykunaqa llumpay mana allin ruwaqllañam kanku, Diostapas chiqninkum.