Jehová Diospa kamasqan angelkunaqa llapallankun allin angelkuna karqanku. Jujninmi ichaqa millayman tukupuspa Saqra Satanás kapurqan. Payqa manan munarqanchu runakuna Jehová Diosta yupaychanankuta, aswanpas payta yupaychanankutan munarqan. Chaymanta astawan yachasun.

Edén huertapiqa sumaq ruruyoq sach’akunan karqan. Chaymi Jehová Diosqa Adanta Evatawan nirqan llapa sach’aq rurunta mijunankupaq, ichaqa juj sach’aq ruruntan mana mijunankuchu karqan, mijuspaqa wañunankun karqan (Génesis 2:9, 16, 17).

Juj p’unchaymi Eva sapallan kashaqtin juj mach’aqway rimapayarqan. Ichaqa manan chay mach’aqwaychu rimasharqan, aswanpas Saqra Satanasmi rimapayasharqan. Evatan nirqan: “Sichus mana mijuna sach’aq rurunta mijunki chayqa Dios jinan kapunki, manan wañunkichu”, nispa. Chay nisqanqa manan cheqaqchu karqan. Ichaqa Evaqa Satanasta kasukuspan chay sach’aq rurunta mijurqan, Adanmanpas mijuchillarqantaqmi (Génesis 3:1-6).

Chaywanmi yachanchis Satanasqa Dios contra jatariq kasqanta, llulla kasqantawan. Evatan nirqan: “Diosta mana kasukuspaqa manan wañunkichu”, nispa. Chayqa manan cheqaqchu karqan. Adanpas Evapas wañupurqankun. Satanaspas pisi tiempollamantan chinkachisqa kapunqa. Chaykamaqa pantachishallanqan runakunata.  Payqa manan munanchu Diosta kasukunanchista (Juan 8:44).

Wakin angelkunapas millaymanmi tukupurqanku. Chaymi kay jallp’api munay rijch’ayniyoq warmikunata rikumuspa uraykamurqanku, runaman tukuspataq paykunawan casarakuspa puñurqanku. Chay ruwasqankuqa manan Diospa munasqanman jinachu karqan (Génesis 6:1, 2; Judas 6).

Chay angelkunaq wawanqa jatuchachaq millay mana khuyapayakuqmi karqanku. Chaymi kay jallp’apiqa mana allin ruwaykuna astawan yapakurqan. Chayraykun Jehová Diosqa millay runakunata jatun parawan chinkachipurqan. Noellan familiantin salvakurqan (Génesis 6:4, 11; 7:23).

Chay millay angelkunaqa manan wañurqankuchu, janaq pachamanmi kutipurqanku, ichaqa allin angelkunaq kasqanmanqa manañan kutirqankuñachu. Chaymantapas Jehová Diosqa manan dejarqanñachu runaman tukunankuta. Paykunaqa pisi tiempollamantan chinkachisqa kapunqaku (2 Pedro 2:4; Judas 6).

Chaytan Apocalipsis libropi willashan: “Janaq pachapitaq  juj guerra qallarirqan, Miguelmi angelninkunapiwan dragonwan maqanakurqan, dragontaq angelninkunapiwan paykunawan maqanakurqan, ichaqa vencesqan karqanku, chaymi janaq pachapi kanankupas manaña atikurqanñachu. Jinan chay dragonqa urayman wijch’uykusqa karqan, paymi chay ñaupa mach’aqwayqa, “Saqra, Satanás” nisqaqa, jallp’a pacha runakunatapas pantachiqqa; arí, jallp’a pachamanmi payqa wijch’uykusqa kapun, angelninkunapas paywan kuskan wijch’uykusqa kapunku”, nispa.

¿Imapin chay maqanakuy tukurqan? Apocalipsis libropin willashan: “¡Chayrayku, kusikuychis janaq pachapi kaqkuna!”, nispa. Kasukuq angelkunaqa maytachá kusikurqanku Satanaspas supayninkunapas manaña janaq pachapichu kasqankumanta. Kay jallp’apirí, ¿iman pasanan karqan? Bibliapin nishan: “¡Imaraqchá kanqa jallp’a pachamanta, lamar-qochamantapas! Saqran sinchi phiñasqa qankunaman uraykamushan, yachanmi payqa tiempon pisillaña kasqantapas”, nispa (Apocalipsis 12:7-9, 12).

Satanasmi millay angelninkunantin kay jallp’api runakunata pantachishan, imaymanakunawantaq ñak’arichishan. Chay millay angelkunan supaykuna kanku. Paykunaqa Diospa enemigonmi kanku.