Jehová Diosca tucui angelcunatallatami alicuna cachun rurarca. Shinapash shuj angelmi nali tucurca. Chai nali angelca Satanasmi can. Paica Taita Diospa randi paita adorachunmi munarca. Shinaca ima pasashcata ricupashunchi.

Jardín de Edenbica ashtaca frutastata cuj yuracunami tiarca. Chaimandami Jehová Diosca, Adán y Evamanga jardinbi tiaj tucui yuracunapi fucushcataca micui ushanguichimi nirca. Pero shuj yuramandallami na micunachu canguichi nishcarca. Ima horapash chai yuramanda micushpaca, huañunguichipachami nirca (Génesis 2:​9, 16, 17).

Shuj punllaca Eva solalla cajpimi shuj culebra paihuan parlai callarirca. Shinapash chai culebrataca Satanasmi utilizajurca. Shinami Evamanga chai yuramanda frutata micushpaca, Taita Dioshna tucushpa na huañunguichu nishcarcami. Pero Satanasca llullaitami llullajurca. Paipa nishcata crishpami Evaca chai quirumanda frutata japishpa micurca. Y chai jipaca Adanmanbash cujpimi paipash micurca (Génesis 3:​1-6).

Cai historiamandaca Satanás shuj llullaj, na cazuj cashcatami yachajupanchi. Evata na huañunguichu nishpaca shuj jatun llullatami nijurca. Tiempohuanga Evapash, Adanbash huañurcallatami. Chai viajeca Satanasca na huañurcachu. Pero ñallami paipa juchacunamandaca, para siempre huañuchi tucunga. Cunanbica Satanasca tucui cai alpapi causajcunatami umachijun. Shinallata paipa llullacunahuanga, Taita Diospa mandashcacunata na cazuchunmi gentecunataca umachijun (Juan 8:44).

Tiempo jipaca shuj angelcunapashmi nalicuna tucurca. Cai nali angelcunaca, cai alpapi huarmicuna juyailla cajta ricushpami paicunahuan puñungapaj munarca. Chaimi cai alpaman shamungapaj munaimandaca gentecunashna tucurca. Pero Taita Diosca, angelcuna gentecunashna tucushpa causachunga na rurarcachu (Génesis 6:​1, 2; Judas 6).

Cai nali angelcunaca, gentecunataca ninandami llaquichirca. Y cai alpapi huarmicunahuan charishca huahuacunapash na normalchu carca. Chai huahuacunaca millai millai, jatun jatunmi tucurca. Tiempohuanga cai alpapi causaica ninandami huaglirca. Jehová Diosca cai alpapi tucui nali gentecunataca shuj diluviota cachamushpami tucuchirca. Shinapash chai punllacunapica Noé paipa familiahuanllami salvarirca (Génesis 6:​4, 11; 7:23).

Chai nali angelcunaca na huañurcachu. Cieloman cutin tigrashpapash paicunaca castigai tucurcami. Jehová Diosca jahua cielopi ali angelcunahuan cutin causachunga ñana saquircachu. Shinallata gentecunashna tucushpa causachunbash ñana saquircachu. Chai nali angelcunataca ñallami Jehová Diosca tucuchitapacha tucuchinga (2 Pedro 2:4; Judas 6).

1914 huatapimi, jahua cielopica shuj jatun guerra tiarca. Chai guerramanda parlashpami Apocalipsis libropica cashna nin: “Chai jipallami, jahua pachapica jatun macanajui tiarca. Miguel [o Jesús] shuti angelca, paipaj [ali] angelcunandimi, [Satanás] dragonhuan macanajurca. Shinallatami [Satanás] dragonbash, paipaj [nali] angelcunandi macanajurca. Shina macanajushpapash, chai dragonga na unaicaman macanajui usharcachu. Jahua pachapipash, paicuna causanaca na tiarcachu. Chai dragonga, jahua pachamandami shitai tucurca. Paica, pundamandapacha causajuj culebrami. Paillatami, diablo shutipash, Satanás shutipash. Paica, tucui cai pachapi causajcunatami umachin. Paica, paipaj [nali] angelcunandimi, alpaman shitai tucurca”.

Chai jipaca ¿imata pasarca? Apocalipsis libropica cashna nishpami catin: “Chaimandami jahua pachapash, chaipi causajcunapash, cushijuna canguichi”. Pero ¿imamandata ali angelcunaca cushijuna carca? Satanaspash, nali angelcunapash jahua cielopi ñana causajushcamandami ali angelcunaca ninanda cushijurca. Pero cai alpapi gentecunahuanga ¿imata pasana carca? Bibliapica ninmi: “Alpapi causajcuna, mama cuchapi causajcunapash, ¡aij imachari tucunguichi! Diabloca, punllacuna tucurijujta yachashpami, ninanda fiñarishpa cangunapajman uriajumurca” (Apocalipsis 12:​7-9, 12).

Satanaspash, nali angelcunapash jahua cielomanda shitamui tucushcamandami cai alpapi gentecunaca ninanda llaquicunahuan causanajunchi. Cai nali angelcunataca demoniocuna nishpami rijsipanchi. Paicunaca Taita Diospa contracunami can. Chaimi paicunaca nalicuna can.