E meitaki anake te au peretana vaerua katoatoa ta Iehova i anga mai. Inara okotai angera tei akariro iaia uaorai kia kino. Ko Satani te Tiaporo aia. Kua anoano a Satani kia akamori te au tangata i runga i te enua nei iaia eiaa ia Iehova. Ko teia tei tupu:

I te kainga i Edene, e manganui te rakau tei uua mai i te ua rakau memeitaki. Kua karanga atura Iehova kia Adamu raua ko tana vaine, koia a Eva, e kai ua raua i te reira. Inara okotai rakau ta te Atua i karanga atu auraka raua e kai i to reira. Kua akakite atu aia me ka kai raua i to reira, ka mate ia raua.—Genese 2:9, 16, 17.

I tetai ra ko Eva anake i tona ngai i tuatua atu ei tetai ovi kiaia. Ko te tika ra, kare ko taua ovi ra tei tuatua atu; ko Satani te Tiaporo ia tei akariro ra kia manakoia e ko te ovi te tuatua atura. Kua tuatua atu a Satani kia Eva e me ka kai aia i te ua rakau i tureia ra, ka kite pakari aia mei te Atua ra. Kua tuatua katoa aia e kare a Eva e mate. Teia nga tuatua e rua e pikikaa anake. Tera ra, kua irinaki a Eva ia Satani e kua kai aia i te ua rakau. I muri iora, kua oronga katoa aia i tetai kia Adamu, e kua kai katoa aia.—Genese 3:1-6.

Mei teianei tua tuatua mou, ka kite tatou e e meameaau e te pikikaa a Satani. Kua akakite aia kia Eva e me ka akarongo kore aia i te Atua, kare aia e mate. E pikikaa te reira. Kua mate a Eva e pera katoa oki a Adamu. Kare a Satani i mate atu i reira, inara ka mate aia no te mea kua ara oki aia. Inara, i teianei, te ora nei aia e te rave ua atu nei i te akavare anga i te tangata. Te vai ua nei rai aia ei pikikaa, e te tamata ra aia kia aati te au tangata i ta te Atua au ture.—Ioane 8:44.

I muri iora, kua kino katoa etai atu au angera. Kua akara maira te reira au angera i te au vaine purotu i te enua nei e kua inangaro i te piri anga ainga ma ratou. E no reira kua aere mai ratou ki te enua nei e kua akariro ei kopapa tangata tane to ratou. E kua rave atura ratou i taua au vaine ra na ratou. E patoi anga teia i ta te Atua ra akakoro anga.—Genese 6:1, 2; Iuda 6.

Kua akatupu katoa te reira i te taitaia maata no te tangata nei. Kua anau mai te au vaine a taua au angera ra i te tamariki, kare ra i te au tamariki noa nei. Kua tupu akera ratou ei au tuputupua ta ua ma te takinga kino. Kua riro te enua kia ki roa i te kino e kua iki a Iehova kia akapou i taua aronga kino ra na roto i tetai vaipuke maata. Te au tangata anake tei ora i taua Vaipuke ra ko Noa tuatua tika ma tona ngutuare tangata.—Genese 6:4, 11; 7:23.Inara, kua oki atura te au angera kikino ra ki te ngai vaerua; kare ratou i mate. Mari ra kua akautungaia ratou. Kare ratou i akatikaia kia oki atu ki roto i ta te Atua anau o te au angera tuatua tika ra. Pera katoa oki, kare a Iehova i akatika akaou ia ratou kia aoao i te au kopapa tangata. E te openga i reira ka mate ratou ki roto i te akava anga maata.—2 Petero 2:4; Iuda 6.

I te tuanga mua o to tatou anere mataiti nei, e tamaki tetai i te rangi. Te akataka maira te puka o te Puka Tapu ia Apokalupo e eaa tei tupu: “E e tamaki tei runga i te rangi: ko Mikaela [koia a Iesu Mesia i akatuakouia maira] e tana au angela [meitaki ra], tamaki atura i te taae [ia Satani]; e kua tamaki maira te taae e tana au angela [kikino], Kare ra i riro te re ia ratou; e kare rava atura o ratou e nooanga i runga i te rangi. Uriia atura oki te taae maata ki vao, ko taua ovi taito ra ïa, ko tei karangaia i te diabolo ra, e ko Satani oki, ko tei pikikaa i to te ao katoatoa nei, i uriia aia ki vao ki runga i te enua nei, e tana au angela [kikino] katoa, kua uri katoaia ki vao.”

Eaa tei tupu? Kua akakite maira te tataanga: “E teianei, kia rekareka, e te au rangi e, e ko kotou katoa oki ko tei noo i reira!” Ka rekareka te au angera meitaki no te mea kua kore atu a Satani e te au angera kikino, me kare vaerua, i te rangi ra. Inara akapeea te au tangata i te enua nei? Te tuatua ra te Puka Tapu: “E mate ra oki to te enua e to te tai! tei raro atu na oki te diabolo ia kotou na, e riri maata oki tona, no te mea kua kite aia e e manga tuatau poto ua tona e toe nei.”—Apokalupo 12:7-9, 12.

Ae, ko Satani e tona au oa kikino te pikikaa nei e te akatupu nei i te mate maata no te au tangata i te enua nei. Kua karangaia teia au angera kikino e au temoni. E au enemi ratou no te Atua. E kino anake ratou katoatoa.