Sa lelei peresona agaga uma lava na foafoaina e Ieova. Peitai na iai se agelu na liliu atu i le leaga. O ia lea o Satani le Tiapolo. Sa manao Satani e tapuai atu tagata o i le lalolagi ia te ia na i lo o ia Ieova. O le mea lenei na tupu:

I le faatoaga i Etena, sa tele laau na iai sa fuaina mai ni fua e lelei tele i le taumafa. Sa fetalai atu Ieova ia Atamu ma lana avā o Eva e faapea, e saoloto i laua e aai mai ai. Ae peitai sa iai se laau e tasi na tulei atu le Atua e aua la te aai ai. Na ia tulei atu afai la te aai i ai, o le a mautinoa lava e feoti i laua.​—Kenese 2:9, 16, 17.

I se tasi o aso sa na o Eva ai, sa tautala atu le gata ia te ia. O le mea moni, sa lē o le gata moni lava lea na tautala atu; sa o Satani le Tiapolo o lē na faafoliga atu o le gata moni lea o loo tautala atu. Sa taʻu e Satani ia Eva afai e ʻai o ia mai le laau faasaina, o le a atamai o ia e pei o le Atua. Sa ia fai atu foi o le a lē oti lava o ia. O nei faamatalaga uma sa o ni pepelo. E ui i lea, sa talitonu Eva ia Satani ma sa ia aiina ai loa le fua o le laau. Mulimuli ane, ona ia avatuina ai foi lea ia Atamu, ma sa ʻai ai loa foi ma ia.​—Kenese 3:1-6.

Mai i lenei tala moni, ua tatou aʻoaʻoina mai ai o Satani o se fouvale ma o se pepelo. Sa ia taʻu atu ia Eva afai o le a lē usiusitai o ia i le Atua, e lē oti lava o ia. Sa o se pepelo lena mea. Sa oti moni lava o ia, faapea foi ma Atamu. Sa leʻi oti ai Satani i inā, e ui lava o le a mulimuli ane oti o ia auā sa agasala o ia. Peitai, o loo ola pea o ia, ma o loo faaauau pea ona ia taitaiseseina tagata. O loo avea pea o ia ma sē e pepelo, ma o loo taumafai foi o ia e faaosoosoina tagata ina ia solia tulafono a le Atua.​—Ioane 8:44.

Mulimuli ane, sa liliu atu ai isi agelu i le leaga. O nei agelu sa matamata mai i fafine lalelei i le lalolagi ma na mananao ai e faia feusuaiga ma i latou. Ona latou ō mai ai lea i le lalolagi ma faia ni tino tamaloloa. Ona latou nonofo atu lea i fafine ua latou loto i ai. O lenei mea sa o se tetee atu i le fuafuaga a le Atua.​—Kenese 6:1, 2; Iuta 6.

Sa mafua ai foi le tele o faalavelave mo tagata. O avā a nei agelu na fanaua mai ni fanau, peitai sa lē tutusa i latou ma tagata taatele. Na ola aʻe i latou e avea ma ni tagata tino eese, paū ma faasaua. Mulimuli ane ai lava, ona faatumulia ai lea o le lalolagi i le sauā, ma o lea na faaiua ai loa e Ieova e faaumatia tagata amio leaga e ala i se lolo tele. E na o le pau tagata na faasaoina mai i le Lolo sa o le tagata amiotonu o Noa ma lona aiga.​—Kenese 6: 4, 11; 7:23.

E ui i lea, o agelu amioleaga sa toe foi atu i le nofoaga o agaga; sa leʻi feoti i latou. Peitai na faasalaina i latou. Sa leʻi toe faatagaina i latou e toe foi atu i le aiga o le Atua, o ana agelu amiotonu. E faaopoopo atili atu i ai, ua lē toe faatagaina foi i latou e Ieova e toe faia ni o latou tino faaletagata. Ma mulimuli ane o le a oo ina feoti i latou i le faaumatiaga tele.​—2 Peteru 2:4; Iuta 6.

I le amataga o lo tatou senituri, sa faia ai se taua i le lagi. Ua faamatala mai e le tusi o le Tusi Paia o Faaaliga le mea sa tupu: “Ua tau foi le taua i le lagi; o Mekaeli [o Iesu Keriso ua toe faatuina] ma ana agelu [lelei] ua latou tau ma le tarako [Satani], ua ʻau foi le tarako ma ana agelu [leaga] e tau ai le taua, a ua latou le manumalo, e le toe maua foi i le lagi se mea latou te nonofo ai. Ua lafo foi le tarako tele, o le gata tuai lea, ua igoa i le tiapolo, i le ma Satani, o lē faasese i le lalolagi uma; ua lafo ifo i le lalolagi, ua lafo foi ana agelu [leaga] faatasi ma ia.”

O le ā le iuga na iu i ai? Ua faaauau mai faapea le tala o le mea sa tupu: “O le mea lea ia outou olioli ai, le lagi e atoa ma e ua nonofo ai. O i talofa ia te outou o e nonofo i le fanua ma le sami, auā ua alu ifo ia te outou le tiapolo ua lotoa tele, auā ua na iloa ua saasaa ona po.”​—Faaaliga 12:7-9, 12.

Ioe, o Satani ma ana aumea amioleaga ua latou taitaiseseina ma aumaia le tele o puapuaga i tagata o i le lalolagi. O nei agelu amioleaga ua taʻua o temoni. O i latou o fili o le Atua. E leaga uma lava i latou.