Hii dee jeje Jehovah bi mbei bi dë bumbuu. Hën wan u de ko hogi bakaten. Hën de ta kai Saatan Didibi. Saatan bi kë taa dee libisëmbë a goonliba aki bi musu dini ën teka u de dini Jehovah. Boo luku fa di soni dë bi pasa:

Gaan hia pau bi dë a di djai u Eden di bi ta pai fuuta di suti u njan. Jehovah bi piki Adam ku ën mujëë Eva taa de bi sa njan dee fuuta kumafa de kë. Ma wan pau bi dë di Gadu bi piki de taa de an bi musu njan fuuta fëën. A bi taki taa ee de bi njan mën, de bi o dëdë nöömö.​—Kenesesi 2:9, 16, 17.

Wan daka Eva bi dë hën wanwan di wan sindeki ko fan ku ën. Ma na di sindeki hën bi ta fan tuutuu. Saatan Didibi wë bi mbei a djei kuma di sindeki hën bi ta fan. Saatan bi piki Eva taa ee a njan di fuuta di de an bi musu njan, nöö a bi o ko köni kuma Gadu. A bi taki söseei taa Eva an bi o dëdë. Mindi wë Saatan mindi dee soni a bi taki dë. Tökuseei Eva biibi Saatan, hën a njan di fuuta. Bakaten a da Adam wan pisi, hën a njan tu.​—Kenesesi 3:1-6.

Di woto aki ta lei u taa Saatan da wan engel di hopo fia ku Gadu, nöö a dë wan mindisonima tu. A bi piki Eva taa an bi o dëdë ee a pasa Gadu buka. Soni wë a bi mindi dë. Eva dëdë, nöö Adam seei dëdë tu. Saatan an dëdë a di ten dë, ma a o dëdë bakaten u di a du zöndu. Nöunöu a dë a libi jeti, nöö a ta ganjan sëmbë go dou. A dë wan mindisonima jeti, nöö a ta pooba u mbei sëmbë booko dee wëti u Gadu.​—Johanisi 8:44.

Bakaten woto engel bi ko hogi tu. Dee engel dë bi si dee waiti mujëë a goonliba, nöö de bi kë libi ku de a manu ku mujëë fasi. Fëën mbei de bi ko a goonliba, hën de tei womi sëmbë sinkii. Hën de tei dee mujëë de bi kë. Na di soni dë Gadu bi kë a de.​—Kenesesi 6:1, 2; Judasi 6.

Di soni dë tja sömëni fuka ko da libisëmbë. Dee mujëë u dee engel dë bi pai miii, ma de an bi dë kuma dee mii sëmbë guwenti u pai. De bi toon gaan langa womi di bi ta du hogihati soni ku sëmbë. Te u kaba fëën, hogi bi ko fuu di goonliba sö tee taa Jehovah buta wan daka u kii dee hogihati sëmbë ku wan gaan wata. Di limbohati womi Noa ku ën wosudendu wanwan tö bi pasa di Gaan Wata dë libilibi.​—Kenesesi 6:4, 11; 7:23.

Ma dee hogi engel bi toona go baka a liba, de an bi dëdë. Ma de bi sitaafu de. De an bi da de pasi u dë ku dee bumbuu engel u Gadu möön. Boiti di dë, Jehovah an bi da de pasi u tei libisëmbë sinkii möön. Te u kaba fëën de o dëdë a di gaan kuutudaka.​—2 Petuisi 2:4; Judasi 6.

A di jaa 1914, wan feti bi feti a Gadu Köndë. Di buku

Akoalimbo ta konda andi bi pasa: ’Wan gaan feti hopo ala. Hën Mikaëli [hën da Jesosi di weki baka] ku dee [bumbuu] basia fëën go feti ku di gaan kaima. Nöö hën di gaan kaima [Saatan] ku dee [hogi] basia fëën ta feti baka. Nöö hën de ta feti teee, ma nöö di gaan kaima an wini, biga an taanga tjika. Nöö di hën ku dee basia fëën lasi kaa, nöö de an da de pasi u de tan a Gadu Köndë ala möön e. Biga de kisi de vinde puu ala tuwë go a goon. Wë nöö di gaan bë kaima i si dë, di fosu sindeki, hën wë da di didibi e, Saatan seei, di ta ganjan sëmbë a hii di goonliba. Hën wë de wini sö e. De hiti ën ku dee basia fëën tuu tuwë go a goonliba gbolo.’

Andi bi dë di bakapisi u di soni dë? Di woto nango dou: „Wë nöö Gadu Köndë, ku un dee sëmbë dë nëën tuu, un wai e! Aai, un piizii seei.” Dee bumbuu engel bi sa wai seei u di Saatan ku dee hogi engel an dë a Gadu Köndë ala möön. Ma unfa a dë ku libisëmbë a goonliba aki? Di Bëibel taki taa: „Helu u di goonliba ku di ze, biga di didibi saka ko a unu awaa. Nöö fa a saka ko dë, a ko ku taanga hatiboonu, biga a sabi taa ten fëën ko sati.”​—Akoalimbo 12:7-9, 12.

Awa, Saatan ku dee taku kompe fëën ta ganjan sëmbë a goonliba, nöö de ta tja gaan fuka ko da de tu. Dee hogi engel dë de ta kai taku jeje. De da felantima u Gadu. Hii de tuu hogi.