Ulukliu, anju hotu neʼebé Maromak Jeová kria mak diʼak. Maibé neineik-neineik, iha anju ida neʼebé kontra hasoru Maromak. Nia mak Diabu Satanás. Satanás hakarak ema atu adora nia duké adora Maromak Jeová. Tuirmai, saida mak akontese?

Jardín Eden mak fatin furak tebes, nakonu ho ai-hun oioin neʼebé fó fuan barak. Maromak Jeová hatete ba Adão ho nia feen Eva katak sira bele han ai-fuan husi ai-hun hotu. Maibé, iha ai-hun ida deʼit neʼebé Maromak bandu sira labele han nia fuan. Maromak hatete: “Iha loron neʼebé ó han ai-fuan neʼe, ó sei mate.”—Gênesis (Kejadian) 2:9, 16, 17.

Loron ida, bainhira Eva mesamesak iha jardín laran, derrepente samea ida koʼalia ba nia katak se Eva han ai-fuan neʼebé Maromak bandu neʼe, nia sei sai matenek hanesan Maromak. Tuir loloos, ita hotu hatene katak la iha samea ida neʼebé bele koʼalia, maibé iha tempu neʼebá, Diabu Satanás mak uza samea atu koʼalia ba Eva. Satanás mós hatete: “Imi sei la mate.” Tan neʼe, Eva fiar ba Satanás nia lia-bosok hirak-neʼe no han ai-fuan neʼe. Depois, nia fó ba Adão, no Adão mós han.—Gênesis (Kejadian) 3:1-6.

Liuhusi istória neʼe, ita bele hatene katak Satanás mak bosok-teen neʼebé kontra Maromak. Nia hatete katak Eva sei la mate maski la halo tuir Maromak. Neʼe mak bosok duni, tanba  ikusmai Adão no Eva mate. Maibé Satanás la mate kedas iha tempu neʼebá, tan neʼe, toʼo ohin loron, nia sei iha no nafatin lohi ema atu la halo tuir Maromak nia ukun-fuan. Maibé lakleur tan, nia mós sei mate tanba sala hotu neʼebé nia halo.—João 8:44.

Tuirmai, anju sira seluk mós kontra hasoru Maromak. Anju sira-neʼe haree feto bonita sira iha rai toʼo kaan no hakarak hola feto sira-neʼe. Ikusmai, anju sira-neʼe nakfila an ba ema no mai hela iha rai hodi hola feto neʼebé sira hili atu sai sira-nia feen. Hahalok hirak-neʼe aat tebes no kontra Maromak nia hakarak.—Gênesis (Kejadian) 6:1, 2; Judas 6.

Ida-neʼe hamosu susar barak ba ema iha rai tanba anju sira-neʼe nia oan la hanesan ema baibain. Oan sira-neʼe sai boot ba beibeik toʼo sai jigante neʼebé siʼak tebes no gosta halo violénsia. Neineik-neineik, rai sai nakonu ho violénsia. Tan neʼe, Maromak Jeová halo udan boot tun hodi halakon ema aat hotu. Iha tempu neʼebá, ema neʼebé loos naran Noé ho ninia família deʼit mak hetan salvasaun.—Gênesis (Kejadian) 6:4, 11; 7:23.

Maibé, anju aat sira-neʼe la mate tanba sira fila fali ba lalehan. Maski nuneʼe, Maromak Jeová fó kastigu ba sira hodi haketak sira husi anju diʼak sira. Sira laʼós Maromak nia família tan. Maromak Jeová mós la husik tan sira atu nakfila an ba ema hodi mai hela fali iha rai. Iha futuru, anju aat sira-neʼe sei hetan kastigu-mate.—2 Pedro 2:4; Judas 6.

Maizumenus tinan atus ida liubá, funu mosu iha lalehan. Livru Apokalipse husi Bíblia fó-hatene: “Funu mosu iha lalehan: Miguel [Jesus Kristu neʼebé moris fali ona] no ninia anju [diʼak] sira halo funu ho samea boot [Satanás], no samea boot neʼe no ninia anju [aat] sira halo funu ho sira maibé nia la manán, no la iha ona fatin ba sira iha lalehan. Entaun, samea boot neʼe soe tun tiha ba rai; nia mak samea uluk nian, ida neʼebé bolu nuʼudar Diabu no Satanás, neʼebé lohi mundu tomak; nia soe tun tiha ba rai hamutuk ho ninia anju [aat] sira.”

Hafoin saida mak akontese? Bíblia hatete: “Lalehan no imi neʼebé hela iha nia haksolok bá!” Anju diʼak sira bele haksolok tanba Satanás no anju aat sira la iha tan ona iha lalehan. Maibé oinsá ho ema iha rai? Bíblia hatutan: “Susar ba rai no tasi, basá Diabu tun tiha ona ba imi, no nia hirus makaʼas, tanba nia hatene katak nia tempu hela uitoan deʼit.”—Apokalipse 12:7-9, 12.

Neʼe duni, agora daudaun Diabu Satanás ho ninia anju aat sira lohi no haterus ema iha rai. Anju aat sira-neʼe mós iha naran demóniu. Sira mak Maromak nia inimigu no sira hotu laran-aat tebes.