Fanjaka iaby o fagnahy finoro i Jehovah reo. Naho fa avy eo, le nisy anjely raike nanjare raty. I Satana Devoly zay. Tea i Satana naho ireke ty ho tompoe o ndatio fa tsy i Jehovah. Izao ty raha niseho:

Tamy i tonda Edenay ao, le nisy hatae maro namokatse voa tena nafiry. Nisaontsy tamy i Adama naho i Eva vali’e ty Jehovah fa azo iareo hanegne iaby ze ao. Nanagne fahafahagne soa iareo. Faie nisy hatae raike nisaontsien’Andrianagnahare fa tsy toko’e hohane iareo. Nisaontsy reke fa naho mihinagne amy izay iareo le ho mate.​—Genesisy 2:9, 16, 17.

Nisy fotoagne ty Eva nirerike, le nagnatogne aze mba hirehake ama’e i meregney. Mazava hoaze fa tsy i meregney ty tena nifampirehake ama’e. I Satana Devoly ty nanao ze hieretseretagne fa i meregney ty nirehake. Nirehake tamy i Eva ty Satana tie naho mihinagne amy i voan-katae rinaray reke, le hahilala manahake an’Andrianagnahare. Nirehake ka ty Satana fa tsy ho mate ty Eva. Sambe vande iaby o raha roe nirehafe’e reo. Ndra tie teo zay, le nino i Satana ty Eva sady nihinagne tamy i voan-kataey. Nimea’e ka ty Adama naho fa tafara izay sady nihinagne.​—Genesisy 3:1-6.

Ianarantikagne boake amo o tantara maregne io fa mpigoreve naho mpavande ty Satana. Nirehake tamy i Eva reke fa naho tsy mankatò an’Andrianagnahare reke, le tsy ho mate. Vande zay. Nimate vata’e iareo amy i Adama. Tsy nimate tamy ze fotoagne zay ty Satana faie ho mate reke amy ty fara’e satria nanota. Faie amparake ty hiavia izay, le velogne reke sady manohy mamitake ty tarana o ndatio. Mbe mavande avao ka reke, sady mikezake mandrisike o ndatio handika ty lalàn’Andrianagnahare.​—Jaona 8:44.

Nisy anjely hafa nanjare raty naho fa tafara tatoy. Nivoamare iareo ty ampela soa tarehe tambone tane etoy, le nagniry hila irey iareo. Niavy tambone tane etoy iareo sady niova ho vatan-dahilahy. Nalae iareo i ampela rey. Nifanohetse tamy ty raha nisafirien’Andrianagnahare zay.​—Genesisy 6:1, 2; Joda 6.

Niterake raha manahiragne maro hoahy ty tarana o ndatio zay. Niterake ty valy i anjely rey faie tsy mba nanahake o ajajao iaby ty ana iareo. Nihabey sady nanjare ndaty jabajaba nimpiarotegne vaho mpampijale iareo. Nanjare feno hampiarotegne ty tane toy tamy ty fara’e. Nitapa-kevetse ty hamono i ndaty raty fagnahy rey tamy ty alala ty safodrano bey ty Jehovah. I Noa, ndaty maregne, naho ty keleia’e avao ty nivotso-belogne tamy i safodranoy.​—Genesisy 6:4, 11; 7:23.

Faie niheregne tamy ty faritse ara-pagnahy agne i anjely raty fagnahy rey. Tsy mate iareo. Faie nisazeagne iareo. Tsy nengagne hiheregne tamy ty keleian’Andrianagnahare misy o anjely maregneo iareo. Fagnampe izay, le tsy nenga i Jehovah hiova ho vata o ndaty sasa iareo. Ho mate amy i fitsaràgne lahibeỳ iareo amy ty fara’e.​—2 Petera 2:4; Joda 6.

Tamy ty fanomboha ty taonjato misy antikagne toy, le nisy aly ty tan-dagnitse agne. Izao ty fomba irehafa ty boke Apokalypsy, boke raike agnate Baiboly ao ty raha niseho tagne: “Nisy aly ty tan-dagnitse agne. Nialy tamy i dragogney [i Satana] ty Mikaela naho ty anjeli’e. Nialy tamy iareo ka i dragogney naho ty anjeli’e faie tsy naharese, sady tsy nisy toeragne hoahy iareo sasa ty tan-dagnitse agne. Natorake mafe i dragogne lahibeỳ, i menaragne tam-boaloha’e tagney, i tokavegne tihoe Devoly naho i Satanay, i mamitake ty tane toỳ. Natorake mafe tan-tane etoy reke, sady natorake mafe niarake ama’e ka i anjeli’e [raty fagnahy] rey.”

Ino ty voka’e? Izao ty tohy i fitantaragney: “Naho izay, le mifalea ry lagnitse naho inareo mipetrake agne!” Afake ty hifale i anjely soa fagnahy rey satria tsy an-dagnitse agne sasa ty Satana naho i anjely, fagnahy [esprits] raty fagnahy rey. Faie manao akore ty amy i ndaty an-tane etoy rey? Hoe ty Baiboly: “Loza hoahy ty tane naho o riakeo, fa nizotso ama’areo agne ty Devoly sady boseke mafe satria fanta’e fa fohe ty fotoagne anagna’e.”​—Apokalypsy 12:7-9, 12.

Ie, tena magnoho-doza ty ndaty an-tane etoy ty Satana naho i nama’e raty fagnahy rey. Atao tihoe demonia i anjely raty fagnahy rey. Fahavalon’Andrianagnahare iareo. Raty iaby iareo.