Sivangwa satshavbo nya liphuvbo si vangidwego khu Jehovha si diri sadi. Khavbovbo ngilozi mweyo yi di khala muwugeyi. Iyo khiyo Sathane Dhiyabhulosi. Sathane a di gu vbweta gu khuye vathu mafuni va khozeya uye vbavbandze nya gu khozeye Jehovha. Gu dugelede esi:

Thembweni ga Edheni, gu diri ni misimbo nya yingi yi nga ba yi velega mihandro nya gutshambe. Jehovha a di embeya Adhamu ni mwangadzi waye Evha gu khuye va na hodze mihandro yatshavbo na va tshulegide. Ganiolu gu diri ni simbo moyo owu Jehovha a nga va embeya gu khuye va nga hodzi. Uye a di khuye va gu hodza, va nafa. — Genesi 2:9, 16, 17.

Litshigu limwedo Evha nari enga yi dita nyoga yita ganeya naye. Khu lisine, khandri nyoga yi nga ba yi ganeya; gu diri Sathane Dhiyabhulosi a nga gira gu si wonega nga khatshi nyoga yi nga ba yi ganeya. Sathane a di embeya Evha gu khuye a gu hodza handro wule, a di hadzi manega ni guti nya nga ga Nungungulu. A bwe a ganeya gu khuye kha na ngafa. Satshavbo a nga ganeya si diri malipha. Ambari ulolo, Evha a di khodwa esi Sathane a nga ganeya a bwe a hodza handro. Khu hwane nya isoso, a di ninga Adhamu, anuye a di hodza. — Genesi 3:1-6.

Avba nya matimu yaya nya lisine, hi ngu hevbula gu khethu Sathane muwugeyi nigu muliphi. Uye embede Evha gu khuye a gu mba engisa Nungungulu, kha na ngafa. Ayoyo ma diri malipha. Uye fude nigu Adhamu nuye fude. Sathane kha dzegeya gufa, ambari ulolo, uye a nafa kholu ghohide. Uye a nga gu vbanya nigu a nga gu simama gu sengedzeya vathu. A ngari muliphi, nigu a gu zama gu gira gu vathu va ndraga milayo ya Nungungulu. — Johane 8:44.

Khu gu gimbiya nya tepo, dzimbe dzingilozi dzi di khala vawugeyi. Idzo dzi di wona vanyamayi nyo mbure mafuni dzi bwe dzi dogoreya gu hengeya navo malawu. Khavbovbo dzi di releya mafuni dzi ta dzi gireya mili nya vama. Khu gu landreya, dzi di dzegana ni vanyamayi. Isoso gu di siri makungu ya Nungungulu. — Genesi 6:1, 2; Judha 6.

Isoso gambe si resede sigaradzo nya sikhongolo vathu. Vagadzi nya dzingilozi dzodzo va di velega sanana, ganiolu sanana soso kha sa nga ba si olovelegide. Si di dandra na siri ni malogo, litsoro nigu si di gu laphide ngudzu. Nya mba hweya mafu ma di tala khu wuvivbi, avba nya gu Jehovha a hunga gu fuvisa vathu nya gu vivbe khu gu thumisa ndrambi nya yikhongolo. Vathu va nga vbuluga avba nya Ndrambi khu Nowa ni ndranga yaye basi. — Genesi 6:4, 11; 7:23.

Dzingilozi nya gu vivbe dzi di bweleya dzi khala gambe vathu nya liphuvbo; kha dza ngafa. Ganiolu idzo dzi di tsayiswa. Kha dza dzumeledwa gu bweleya dzi ya patana ni dzingilozi nya gu lulame ndzadzini. Nigu Jehovha kha dzi dzumeleya gambe gu ambala mili nya nyama. Idzo dzi na sogwa khu litshigu nya gulamudwe nya gukhongolo. — 2 Pedro 2:4; Judha 6.

Ga lizana-myaga nya gupheye matshiguni yathu, gu manegide nyimbi dzandzini. Omu ga Gutuledwa, Bhibhiliya yi ngu tshamuseya esi si nga girega: “Khavbo li nga wuga litunga dzadzini, Migeli [Jesu Khisto] ni dzingilozi dzaye [nya dzadi] a di dwana ni mwamilambo [Sathane], anuye mwamilambo a di tsarama a dwana gumogo ni dzingilozi dzaye [nya gu vivbe]. Ambari ulo mwamilambo ni dzingilozi dzaye kha va dugelela. Va di padwa, va gu tutumiswa, gu futwa wulanga wawe ndzadzini. Khidzo a nga tshipiswa khidzo mwamilambo nya khongolo mamba nya guhegule, yi ranwago pwani khiyo dhemoni, ni Sathane, mupembi nya litigo latshavbo. Rinyidwe mafuni gumogo ni dzingilozi dzaye [nya gu vivbe].”

Khu wevbini handro nya isoso? Matimo ma nga gu simama: “Khu guralo, nengelani mu tsaka, uwe dzandzini ni enu mwatshavbo mu vbanyago umo.” Dzingilozi nya dzadi dzi di tsaka kholu Sathane ni dzingilozi dzaye va nga tutumiswa ndzadzini. Ganiolu, hi nga ganeya ginani khu vathu va vbanyago mafuni? Bhibhiliya yari khiyo: “Aholu libango lomo eno gwano enu mu vbanyago mafuni ni linene, kholu Sathane tshigide vbakari gwanu na tade khu likhulu nya likhongolo ngudzu, kholu a dzitigu nya gu khuye gikhati gyaye gidugwana ngudzu.” — Gutuledwa 12:7-9, 12.

Khu lisine Sathane ni vamata vaye nya gu vbivbe va nga gu simama gu pengisa ni gu vangeya sigaradzo nya sikhongolo vathu va vbanyago mafuni. Avo valala va Nungungulu. Vatshavbo va vivbide myonyo.