Taim Jehova i wokim ol ensel, olgeta i gutpela. Tasol bihain wanpela i go nogut. Em Satan. Satan i laik bai ol manmeri long graun i lotuim em na ol i no ken lotuim Jehova. Dispela i kamap olsem:

Long gaden Iden planti diwai i stap ol i karim gutpela kaikai. Jehova i tokim Adam wantaim meri bilong em Iv, ol i ken kisim kaikai long ol dispela diwai. Tasol i gat wanpela diwai i tambu. God i tok, sapos tupela i kaikai pikinini bilong dispela diwai bai tupela i dai tru.—Stat 2:9, 16, 17.

Wanpela taim Iv tasol i stap na wanpela snek i toktok long em. Tasol snek i no save toktok; em Satan i tromoi tok long maus bilong snek. Satan i tokim Iv, sapos em i kaikai pikinini bilong diwai tambu, bai em i kisim gutpela tingting na save wankain olsem God. Na Satan i tok, Iv i no ken dai. Dispela tupela tok wantaim i giaman. Tasol Iv i bilipim tok bilong Satan na em i kaikai pikinini bilong diwai tambu. Bihain em i givim sampela long Adam, na Adam tu i kaikai.—Stat 3:1-6.

Dispela stori i tru na i lainim yumi olsem Satan em i man bilong bikhet na giaman. Em i tokim Iv, sapos em i sakim tok bilong God, em i no ken i dai. Dispela em i tok giaman. Iv i dai, na Adam tu i dai. Satan i no i dai long dispela taim, tasol bihain em i mas i dai, long wanem, em i bin mekim sin. Tasol nau em i stap laip yet na em i wok yet long giamanim ol man. Em i stap yet olsem man bilong giaman, na em  i wok yet long pulim ol man bambai ol i brukim ol lo bilong God.—Jon 8:44.

Bihain, sampela ensel moa i go nogut. Ol dispela ensel i lukim ol meri long graun i gat gutpela skin na ol i laik mekim maritpasin wantaim ol. Olsem na ol i kam daun long graun na tanim i kamap man na kisim ol meri. Tasol God i no laik bai ol ensel i mekim olsem.—Stat 6:1, 2; Jut 6.

Na dispela i kamapim planti hevi long ol man. Meri bilong ol dispela ensel i karim ol pikinini, tasol ol dispela pikinini i narapela kain. Ol i go bikpela na kamap ol traipela man i save mekim pasin pait na mekim nogut tru long ol narapela man. Bihain pasin pait i pulap long graun, olsem na Jehova i kamapim bikpela tait wara na bagarapim ol man nogut. Stretpela man Noa wantaim lain bilong em, ol tasol i abrusim bagarap long taim bilong dispela tait.—Stat 6:4, 11; 7:23.

Tasol ol ensel nogut i go bek gen long ples spirit. Ol i no i dai, tasol ol i kisim strafe. God i no larim ol i kam bek insait long stretpela lain ensel bilong em. Na em i no larim ol i tanim i kamap man gen. Na bihain bai ol i dai long taim bilong bikpela kot.—2 Pita 2:4; Jut 6.

Bihain liklik long yia 1900, bikpela pait i bin kamap long heven. Baibel i stori olsem: “Bikpela pait i kirap long heven. Maikel [em Krais Jisas i kirap bek pinis] wantaim ol [gutpela] ensel bilong en ol i pait long dispela traipela snek [em Satan]. Na snek wantaim ol ensel [nogut] bilong en ol i bekim pait long ol, tasol ol i no gat strong bilong winim pait. Olsem na . . . ol ensel bilong God i tromoi dispela snek i go daun. Em dispela snek bilong bipo yet, na ol i kolim em Satan . . . Em i man bilong giamanim olgeta manmeri bilong graun. Ol i tromoi em i go daun long graun, na ol i tromoi ol ensel [nogut] bilong en i go daun wantaim em.”

Orait, wanem samting i kamap? Baibel i tok: “Yupela olgeta lain i stap long heven, yupela i ken amamas.” Ol gutpela ensel i ken amamas, long wanem, Satan na ol ensel nogut i no i stap moa long heven. Tasol olsem wanem long ol manmeri long graun? Baibel i tok: “Yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol.”—Kamapim Tok Hait 12:7-9, 12.

Tru tumas, Satan wantaim lain nogut bilong em ol i bin giamanim ol manmeri na givim bikpela hevi long ol. Ol dispela spirit nogut i birua bilong God. Olgeta i nogut tasol.