Tiintsumi hinkwato leti Yehovha a ti vumbeke a ti ri tinene. Kutani ntsumi yin’wana yi hundzuke leyo biha. I Sathana Diyavulosi. Sathana u lave leswaku vanhu va gandzela yena ematshan’wini yo gandzela Yehovha. Hi leswi, leswi humeleleke:

Entangeni wa Edeni, a ku ri ni mirhi yo tala leyi tswalaka mihandzu yo nandziha. Yehovha u byele Adamu ni nsati wakwe, Evha, leswaku va nga dya mihandzu ya yona. Kambe a ku ri ni murhi wun’wana lowu Xikwembu xi vuleke leswaku a va fanelanga va dya muhandzu wa wona. Xi vule leswaku loko vo dya, a va ta fa hakunene.​—⁠Genesa 2:​9, 16, 17.

Siku rin’wana Evha a a ri yexe loko nyoka yi vulavula na yena. Kambe, a ku nga ri nyoka ya xiviri leyi a yi vulavula; a ku ri Sathana Diyavulosi loyi a endleke swi vonaka onge nyoka a yi vulavula. Sathana u byele Evha leswaku loko o dya muhandzu lowu yirisiweke, a a ta tlhariha ku fana ni Xikwembu. Nakambe u vule leswaku a a nga ta fa. Kambe sweswo a ku ri mavunwa. Hambiswiritano, Evha u kholwe Sathana ivi a dya muhandzu wolowo. Endzhaku, u nyike Adamu wun’wana kutani na yena a dya.​—⁠Genesa 3:​1-⁠6.

Emhakeni leyi, hi dyondza leswaku Sathana i muxandzuki ni muhembi. U byele Evha leswaku loko u tshika ku yingisa Xikwembu, a a nga ta fa. Sweswo a ku ri vunwa. U file, naswona Adamu na yena u file. Sathana a nga fanga, hambi leswi emakumu a nga ta fa hileswi a dyoheke. Hambiswiritano, sweswi wa hanya naswona u ya emahlweni a kanganyisa vanhu.  Wa ha ri muhembi, naswona u ringeta ku kucetela vanhu leswaku va tlula milawu ya Xikwembu.​—⁠Yohane 8:⁠44.

Endzhakunyana, tintsumi tin’wana ti hundzuke to biha. Tintsumi leti, ti vone vavasati vo saseka lava nga emisaveni ivi ti lava ku endla timhaka ta masangu na vona. Kutani ti te emisaveni ivi ti tiambexa mimiri ya vanhu va xinuna. Kutani ti titekele vavasati. Leswi a swi lwisana ni xikongomelo xa Xikwembu.​—⁠Genesa 6:​1, 2; Yudha 6.

Nakambe ti vange ku karhateka lokukulu evanhwini. Vavasati va tintsumi leti va veleke vana, kambe a va nga ri vana lava tolovelekeke. Va kule va ri swihontlovila leswi nga ni vukarhi ni tihanyi. Eku heteleleni misava yi tele hi vukarhi lerova Yehovha a endla xiboho xa ku herisa vanhu lavo biha hi ndhambi leyikulu. Vanhu lava poneke Ndhambi a ku ri Nowa lowo lulama ni ndyangu wa yena ntsena.​—⁠Genesa 6:​4, 11; 7:⁠23.

Hambiswiritano, tintsumi leto homboloka, ti tlhelele exivandleni xa mimoya; a ti fanga. Kambe ti xupuriwile. A ti pfumeleriwanga ku tlhelela endyangwini wa Xikwembu wa tintsumi leto lulama. Ku tlula kwalaho, Yehovha a nga ha ti pfumelelanga ni kan’we leswaku ti ambala mimiri ya vanhu. Naswona eku heteleleni ti ta fa eku avanyiseni lokukulu.​—⁠2 Petro 2:⁠4; Yudha 6.

Hi 1914 ku ve ni nyimpi etilweni. Buku ya Bibele ya Nhlavutelo yi hlamusela leswi endlekeke: “Kutani ku pfuka nyimpi etilweni, ya Mikayele [Yesu Kreste la pfuxiweke eku feni] ni tintsumi ta yena [letinene] loko va lwa ni dragona [Sathana]; na yona dragona yi lwa yi ri ni tintsumi ta yona [leto biha]. Kambe dragona yi hluriwa, yi nga ha pfumeleriwi ku tshama etilweni, yona ni tintsumi ta yona. Hiloko dragona leyikulu leyi yi cukumetiwa yi ya wela ehansi, yona nyoka ya khale leyi vuriwaka Diyavulosi kumbe Sathana, Mukanganyisi wa misava hinkwayo; yi cukumetiwa yi ya wela ehansi emisaveni, tintsumi ta yona [leto biha] na tona ti cukumetiwa kun’we na yona.”

Ku ve ni vuyelo byihi? Mhaka yi ya emahlweni: “Hikokwalaho, tsakani n’wina matilo, na n’wina lava akeke eka wona.” Tintsumi letinene a ti ta tsaka hikuva Sathana ni tintsumi leto biha, kumbe madimona, a va nga ha ri kona etilweni. Kambe ku vuriwa yini hi vanhu lava nga emisaveni? Bibele yi ri: “Mi ni khombo, n’wina misava ni lwandle, hikuva Diyavulosi ú xikele ka n’wina; ú karihile ngopfu hi ku tiva leswaku nkarhi wa yena wu komile.”​—⁠Nhlavutelo 12:​7-9, 12.

Ina, Sathana ni tintsumi takwe to biha va kanganyisa naswona va vanga khombo lerikulu eka vanhu lava nge misaveni. Tintsumi leti to biha ti vuriwa madimona. I valala va Xikwembu. Hinkwato ka tona ti bihile.