Ebihangwa byona eby’omwoyo Yahwe ebi yangire bikaba biri birungi. Hanyuma omu habamaika akafooka mubi. Ogu nuwe Sitaani Diabolo. Sitaani akaba nagonza abantu omu nsi bamuramye omu kiikaro ky’okuramya Yahwe. Kinu nikyo kyabaireho:

Omu rugonjo rwa Adeni, hakaba haliyo emiti nyingi eyali n’eyana ebijuma ebirungi. Yahwe akagambira Adamu hamu na mukazi we Hawa ngu baali baine obugabe bw’okulya ebijuma. Baitu hakaba haroho omuti gumu, Yahwe ogw’akaba abatangire kulya ebijuma byagwo. Akabagambira ngu kakuba bagulyaho, mananu kwo bakufiire.—Okubanza 2:9, 16, 17.

Kiro kimu Hawa akabali wenka kandi enjoka yatandika kumubaliza. Baitu mali ekaba etali njoka ey’ekaba n’ebaza nauwe; akaba Sitaani Diabolo ayabalisize njoka. Sitaani akagambira Hawa ngu kakuba alya ha kijuma ekibabatangire, akaba naija kuba w’amagezi nka Ruhanga. Akongera yagamba ngu akaba atarukwija kufa. Ebigambo ebi byona bikaba bisuba. Baitu nabwo, Hawa akaikiriza Sitaani ebiyamugambiire kandi yalya ha kijuma. Hanyuma, akatwarra na iba Adamu, nauwe yalya.—Okubanza 3:1-6.

Kusigikirra ha kintu kinu ekyabaireho kwo, nikitwegesa ngu Sitaani mujeemu kandi mubiihi w’ebisuba. Akagambira Hawa ngu kakuba ajeemera Ruhanga, akaba atarukwija kufa. Eki kikaba kisuba. Akasumi kakahika yafa kandi na Adamu nauwe akafa. Sitaani uwe atafe, n’obukiraaba ngu akasumi nikaija kuhika nauwe afe habw’okuba akasiisa. Baitu omu kasumi kanu, aloho kandi nagumizaamu kubiihabiiha abantu. Mubiihi w’ebisuba, kandi nalengaho kuleetera abantu kucwa ebiragiro bya Ruhanga.—Yohana 8:44.

Hanyuma, bamalaika abandi nabo bakafooka babi. Bamalaika banu bakarora omu nsi halumu abakazi abarungi kandi bakagonza kuterana nabo. Nahabweki bakaija omu nsi kandi bajwara emibiri y’abantu abasaija. Hanyuma baketwarra abakazi. Ekintu kinu kikaba nikihakaniza ekigendererwa kya Ruhanga.—Okubanza 6:1, 2; Yuda 6.

Kikaleetera n’abantu ebizibu bingi. Abakazi abaali baswirwe bamalaika banu bakazaara abaana, baitu bakaba batarukusisana n’abaana ba buli kiro. Bakakura baaba abarwani kandi bataine embabazi. Hakumalirra ensi yoona ekaijura ebikorwa by’okurwana kandi Yahwe yacwamu kuhwerekereza abantu ababi omu okusandaara kw’amaizi. Abantu abaakizire Okusandaara kw’Amaizi bakaba Nuha omusaija owakaba ahikiriire n’eka ye.—Okubanza 6:4, 11; 7:23.

Bamalaika ababi ubo bakagaruka omu kiikaro eky’emyoyo; batafe. Baitu bakafubirwa. Bataikirizibwe kugaruka omu ka ya Ruhanga eya bamalaika abesigwa. Ekindi, Yahwe atongere kubaikiriza kujwara embiri y’abantu. Kandi ekindi, nibaija kuhwerekerezebwa ha kiro ekikuru eky’okucwerwaho omusango.—2 Petero 2:4; Yuda 6.

Omu myaka eyatandikire ekyasa ekya makumi abiri, hakabaho obulemu omu iguru. Ekitabu kya Baibuli eky’Okusuku’rwa nikisoborra kiki ekyabaireho: “Kandi habaho obulemu omu iguru, Mikaeri [Yesu Kristo amazire kuhumbuuka] na bamaraika be [abarungi] nibaramaga okurwana nekijoka [Sitaani]; nekijoka nikirwana nabamaraika bakyo [ababi]; kunu tibasingura, kandi nekiikaro kyabu tikikyarorwa omu iguru. Nekijoka ekikoto kyanagwa, enjoka eyaira, enyakwetwa Diabolo kandi Sitaani, arukubihabiha ensi zoona: kyanangwa hansi nabamaraika bakyo [ababi] banagwa hamu nakyo.”

Kiki ekyarugiremu? Baibuli egumizaamu n’egamba eti: “Nukwo musemererwe iguru nabarukuikaramu. Ziribona ensi nenyanja: baitu Diabolo asirimukire halinywe ayina ekiniga kingi, baitu aboine ngu ayina akacu kake.”—Okusuku’rwa 12:7-9, 12.

Mali, Sitaani hamu na bamaraika be ababi babiihabiiha abantu omu nsi kandi babaleetera ebizibu bingi. Bamalaika banu babi nibeetwa badaimoni. Banyanzigwa ba Ruhanga. Boona babi muno.