Yehova wakalenga ŵantu ŵa thupi lauzimu ŵaweme pera. Kweni pakazakaŵa mungelo yumoza uyo wakazgoka muheni. Iye ni Satana Diabolosi. Satana wakakhumbanga kuti ŵantu pano pasi ŵasopenge iye mu malo mwa kusopa Yehova. Ici ndico cikacitika:

Mu munda wa Eden, mukaŵa makuni ghanandi agho ghakapambikanga vipambi vyakunowa. Yehova wakaphalira Adamu na muwoli wake Heva, kuti ŵaryenge umo ŵakhumbira vipambi vya makuni agha. Kweni pakaŵa khuni limoza ilo Ciuta wakaŵaphalira kuti ŵaleke kurya vipambi vyake. Wakayowoya kuti usange ŵaryenge vipambi vyake, iwo ŵafwenge nadi.—Genizesi 2:9, 16, 17.

Zuŵa linyake Heva wakaŵa yekha, ndipo njoka yikiza na kuyowoya nayo. Kuyowoya unenesko, iyi yikaŵa njoka yekha cara iyo yikayowoyanga; Satana Diabolosi ndiyo wakayipangiska kuti yiyowoye. Satana wakayowoya nayo Heva kuti usange waryenge cipambi ca khuni lakukanizgika, iye waŵenge na vinjeru nga ni Ciuta. Satana wakamuphaliraso Heva kuti wafwenge cara. Wose uwu ukaŵa utesi pera. Kweni ndipouli, Heva wakapulikira Satana ndipo wakarya cipambi cira. Pamanyuma pake wakapako Adamu, iye nayo wakarya.—Genizesi 3:1-6.

Kufuma mu nkani yaunenesko iyi, tamanya kuti Satana ngwacigaruka ndipo ni mutesi. Wakaphalira Heva kuti para walekenge kupulikira Ciuta, iye wafwenge cara. Uwu ukaŵa utesi weneco. Heva wakafwa, Adamu nayo wakafwa. Nangauli Satana wakananga,  kweni wakafwa nyengo yeneyira cara. Panyengo yasono ngwamoyo ndipo wacali kupusika ŵantu. Wacali kuyowoya utesi, ndipo wakuyezgera umu na umu kunyenga ŵantu kuti ŵaswe marango gha Ciuta.—Yohane 8:44.

Nyengo yikati yajumpapo, ŵangelo ŵanyake ŵakazgoka ŵaheni. Ŵangelo aŵa ŵakawona ŵanakazi ŵakutowa pa caru capasi pano ndipo ŵakadokera kuti ŵacite nawo uzaghali. Mwanteura, ŵakakhilira pa caru capasi na kuvwara thupi la ŵantu ŵanarumi. Ŵakajitolera ŵanakazi. Kacitiro aka nkakukolerana cara na khumbo la Ciuta.—Genizesi 6:1, 2; Yuda 6.

Mukhaliro uwu ukambiska suzgo pa ŵantu. Ŵawoli ŵa ŵangelo ŵakababa ŵana, kweni ŵakaŵa ŵana bweka yayi. Ŵana awo ŵakakura kufikira vikaŵa vinkara vyakofya na vyankaza. Nyengo yikati yajumpapo, caru cikazura na nkaza kwakuti Yehova wakaghanaghana za kuparanya ŵaheni na cigumura cikuru. Nowa, muntu yekha wakunyoroka na mbumba yake ndiwo ŵakapona pa Cigumula.—Genizesi 6:4, 11; 7:23.

Ŵangelo ŵaheni aŵa ŵakawelera ku malo gha mizimu; ŵakafwa cara. Kweni ŵakalangika waka. Ŵakazomerezgeka cara kukhalaso mu mbumba ya Ciuta ya ŵangelo ŵakunyoroka. Yehova wakaŵazomerezga cara kuti ŵavwareso thupi la wuntu. Para nyengo yazakakwana ŵazamufwa  pa ceruzgo cikuru. 2 Petrosi 2:4; Yuda 6.

Ku kwambilira kwa virimika vya mu handiredi lithu ili, kucanya kukacitika nkondo. Buku la Chivumbuzi likukonkoska za ivyo vikacitika, likuti: ‘Ndipo kucanya kukaŵa nkondo: Mikayeli [Yesu Kristu uyo wakawuka ku ŵakufwa] na ŵangelo ŵake [ŵaweme] ŵakarwanga na Cinjoka [Satana]; ndipo Cinjoka cikarwanga pamoza na ŵangelo ŵake [ŵaheni]; ndipo kuti ŵakaruska cara, panji nesi malo ghaŵo kuti ghakawonekaso kucanya cara. Ndipo Cinjoka cikuru cikaponyeka pasi, njoka ya ciyamwaka, iyo yikucemeka Musesi na Satana, uyo wakupusika caru cose ca pasi; wakaponyeka pa caru ca pasi, na ŵangelo ŵake [ŵaheni] ŵakaponyeka pasi pamoza nayo.’

Cakufumapo cake? Nkani yikurutilira kuti: “Sekererani, mwa macanya mwe, na imwe mukukhala mwenemumo.” Ŵangelo ŵaweme ŵakenera kusekerera cifukwa Satana na ŵangelo ŵake ŵaheni, panji mizimu, ŵakapondomoskekera pasi. Kweni wuli pakuyowoya za ŵantu pa caru capasi? Baibolo likuti: “Soka ku caru ca pasi na nyanja! cifukwa Satana wali kwikhira kwa imwe, wakuŵa na ukali ukuru, uku wakumanya kuti nyengo yake njicoko waka.”—Chivumbuzi 12:7-9, 12.

Enya, Satana na ŵanyake ŵaheni ŵakupusika na kucitiska masoka ku ŵantu pa caru capasi. Ŵangelo ŵaheni aŵa ŵakucemeka viŵanda. Iwo mbarwani ŵa Ciuta. Wose mbaheni.