Иегова көзүлбес хуу-боттарны эки мөзүлүг кылдыр чаяап каан. Ынчалза-даа бир ангел каржы апарган. Ол дээрге Эрлик-тир. Шупту кижилерни Иеговага эвес, а бодунга мөгеерин Эрлик күзей берген. Ооң соонда мындыг чүүл болган.

Эдем сесерлиинге чаагай чимистерлиг дыка хөй ыяштар өзүп турган. Иегова Адамга болгаш ооң кадайы Евага ол шупту ыяштарның чимистерин чип болурун чугаалаан. Ынчалза-даа Бурганның хоруп кааны, чимизин чип болбас бир ыяш турган. Ону амзаптар болзуңарза, албан өлүр силер деп, Иегова сагындырган (Эге дөс 2:9, 16—17).

Бир катап Ева чааскаан турда, ооң-биле чылан чугаалажы берген. Шынында Эрлик чыланны ажыглап, чугааланып турган. Эрлик Евага хоруп каан чимисти чиптер болзуңза, Бурган ышкаш, мерген угаанныг апаар сен деп чугаалаан. Оон ыңай өлбес сен деп база аазаан. Ол шупту аазаашкыннар меге турган. Ынчалза-даа Ева Эрликке бүзүрей бергеш, ол чимисти чипкен. Ооң соонда ол ыяштың чимистерин Адамга бээрге, ол база чипкен (Эге дөс 3:1—6).

Бо шын болган төөгүден Эрликти үймээнчи база мегечи деп билип алдывыс. Ол Евага Бурганны дыңнавайн баар болзуңза, өлбес сен дээн. Ынчалза-даа ол көк меге болган! Херек кырында Адам-даа, Ева-даа чок апарган. Ынчан Эрлик өлбээн, ынчалза-даа ону дөмей-ле өлүм манап турар, чүге дизе ол бачыт үүлгеткен. Ол ам-даа дириг, кижи төрелгетенин мегелевишаан хевээр. Нүгүл-мегениң адазы Эрлик кижилерни Бурганның хоойлуларын хажыдарынче ыдалап турар хевээр (Иоанн 8:44).

Сөөлзүредир чамдык ангелдер каржы апарган. Олар чер кырында чараш кыстарны көргеш, оларның-биле холбажыр күзелдиг апарып, эр кижи мага-бодунче хуулуп алгаш, херээжен улусту кадайлар кылдыр ап турганнар. Шак ынчаар олар Бурганның күзел-соруунга удурланган (Эге дөс 6:1, 2; Иуда 6).

Бо бүгү кижи төрелгетенинге дыка хөй бергелерни эккелген. Ол ангелдерниң ажы-төлү кижилерниң ажы-төлүнден ылгалып турган. Олар каржыга болгаш күчүлелге ынак, кончуг улуг-шыырак кижилер кылдыр өзүп келген. Ол үеде күчүлел чер кырын дола бээрге, Иегова шупту каржы кижилерни узуткаар дээш, черже суг-халавы чоргузупкан. Суг-халавын чүгле чөптүг-шынныг Ной биле ооң өг-бүлези ажып эрткен (Эге дөс 6:4, 11; 7:23).

Ынчалза-даа каржы ангелдер өлбээн, олар дээрже көзүлбес мага-боттуг үне бергеш, дөмей-ле кеземче алганнар. Олар моон соңгаар Бурганның шынчы ангелдериниң өг-бүлезинче эглип шыдавас апарган. Ол үеден тура Иегова оларга кижи мага-бодунче хуулдунарын хоруп каан. Адак сөөлүнде улуг шииткел хүнүнде олар узуткадыр (2 Пётр 2:4; Иуда 6).

ХХ вектиң эгезинде өрү дээрге дайын болган. Библияда Ажыдыышкын номунда ону мынчаар бижээн: «Дээрге ооң соонда дайын эгеледи: Михаил [дирлип келген Иисус Христос] база дээрниң аңаа чагырткан [эки] төлээлери улуга [Эрликке] удур, а улу бодунуң [каржы] төлээлери-биле оларга удур демисежип үндү. Ынчалза-даа улу күш четпейн барып, бодунуң төлээлери-биле кады дээрге турар черин чидирипти. Бүгү делегейни дуурайлаан, эрлик база удурланыкчы деп адаткан ол аажок улуг улу, шаандагы чылан бодунуң төлээлери-биле кады черже дүжүр октаттырыпты».

Ол дайын канчаар төнген? Ажыдыышкын номунда улаштыр мынча дээн: «Өөрүп-байырлаңар, дээрлер база дээрлерниң чурттакчылары!» Шынчы ангелдерге ол дыка өөрүнчүг болган, чүге дизе Эрлик болгаш ооң каржы ангелдери дээрден дүжүр октаттырыпкан. А черде чурттап турар улуска кандыг салдарлыг болган? Библияда: «А чер биле далай, ат болур силер, чүге дээрге эрлик силерже бадып келген-дир! Ол хөлчок килеңнээн, чүге дээрге ооң үези көңгүс эвээш артканын билир-дир» — дээн (Ажыдыышкын 12:7—9, 12).

Эрлик болгаш ооң каржы төлээлери амгы үеде улусту дуурайлап, оларга хинчек-човалаңны чедирип турар. Ол каржы ангелдерни аза-буктар деп адаар. Олар каржы-бак чүүлдер үүлгедип турар Бурганның дайзыннары-дыр.