Te Jehová spisil lek la spastiklan te espirituetik te ayik ta chʼulchan. Pero ta patil jtul chʼul-abat jajch spas te bin chopol. Jaʼ te Satanase. Jaʼ la skʼan te ya x-ichʼot ta mukʼ yuʼun te ants winiketik te ayik ta Balumilal ma jaʼuk te ya yichʼik ta mukʼ te Jehovae. Kiltik bin-utʼil kʼot ta pasel.

Ta tsʼunbil kʼinal Edén bayal sit teʼetik te ya xjuʼ ta loʼele. Te Jehová la yalbey te Adán sok te Eva te ya xjuʼ ya sloʼik te sit teʼetik-abi. Pero ay jpejt teʼ te la yal te Dios te ma xjuʼ ya sloʼbeyik te site. Teme ya sloʼike ya xlajik yuʼun (Génesis 2:9, 16, 17).

Ta jun kʼajkʼal kʼalal stukel–a te Eva, kʼoponot yuʼun jkojt chan. Pero manix jaʼuk kʼopoj-a te chane; te Satanás la stuuntes yuʼun jich yilel te jaʼ yak ta kʼope. Te Satanás la yalbey te Eva teme ya sloʼbey te sit te teʼe ay spʼijil ya xkʼot bitʼil te Diose. Jaʼnix jich la yalbey te maba ya xlaje. Te bintik la yal te Satanás ma smeleliluk. Manchukme jich-abi, te Eva la schʼuun te bin la yal te Satanás sok la sloʼbey te sit te teʼe. Ta patil, la yakʼbey te Adán, jich la sloʼ-euk (Génesis 3:1-6).

Spisil-abi ya yakʼ kiltik te jaʼ jkʼaxunkʼop te Satanás sok jaʼ jpaslot. Te Satanás la yalbey te ma xlaj te Eva teme ya skʼaxuntaybey skʼop te Diose. Pero ma jichuk kʼot ta pasel. Te Eva laj bael, jaʼnix jich-euk te Adán. Te Satanás maba laj, pero yato yichʼ lajinel ta patil. Kuxulto ta ora ini sok yak ta sloʼlayel te ants winiketik ta Balumilal. Yakto ta spasel lot sok yak ta spasel tulan yuʼun ya skʼaxuntaybeyik smantal te Dios te ants winiketike (Juan 8:44).

Ta patil, ay yantikxan chʼul-abatetik te la spasik te bin chopole. Te chʼul-abatetik-abi jajch yilik te ay tʼujbil antsetik ta Balumilal sok la skʼan la sjokinik ta wayel. Jaʼ yuʼun koik tal ta Balumilal la yichʼ sbakʼetalik jich bitʼil winiketik. Jich yuʼun la yikʼ yinaminik te antsetike. Spisil-abi ma jichuk skʼanojel yoʼtan te Diose (Génesis 6:1, 2; Judas 6).

Te bin kʼot ta pasel la yakʼbey swokol te ants winiketik. Te antsetik-abi la sta yalik. Kʼotik ta najtil winiketik sok bayal ya x-utsʼinwanik. Ta patil bael te Balumilal noj ta chopol ants winiketik, jaʼ yuʼun te Jehová la slajinlan ta jun pulemal. Te machʼatik kolik jilel ta Pulemale jaʼnax te Noé sok te sfamiliae (Génesis 6:4, 11; 7:23).

Pero te chopol chʼul-abatetik maba lajik; chaʼsujtik bael ta chʼulchan te banti ay te yantik espirituetike. Pero la yichʼik akʼbeyel castigo. Maba juʼ la sfamiliainikix te tojil chʼul-abatetik yuʼun te Diose. Jaʼnix jich, te Jehová maba la yakʼix te ya yichʼ sbakʼetalik jich bitʼil winiketik. Sok ta patil ya yichʼik lajinel ta yorail te ichʼel ta kʼope (2 Pedro 2:4; Judas 6).

Ta jaʼbil 1914 jajch guerra ta chʼulchan. Te libro yuʼun Apocalipsis ya yalbey skʼoplal te bin kʼot ta pasel: «Hahch guerra ta chʼulchan: te Miguel [te Jesucristo te chaʼkuxajemix] soc te chʼul aʼbatetic yuʼun la stsal sbahic soc te dragón [te Satanás]. Te dragón soc te [chopol] aʼbatetic yuʼun la yaʼbeyic guerra, pero ma ba huʼ yuʼunic, soc mayuquix lugar yuʼunic ta chʼulchan. La yichʼ chʼojel cohel te mucʼul dragón, ha te antiguo chan, te Pucuj soc Satanás sbihil, ha te ya sloʼloy spisil te bahlumilale. Chʼojot cohel ta bahlumilal soc te aʼbatetic yuʼune».

¿Bin kʼot ta lokʼel? Te Biblia jich ya yalxan: «Ha yuʼun tseʼeluc me awoʼtan, haʼat chʼulchan, soc haʼex te nahinemex tey a». Te chʼul-abatetik tseʼelnax yoʼtanik, melel te Satanás sok te chopol abatetik yuʼun maba ayikix ta chʼulchan. Pero ¿bin ya xkʼot ta pasel ta stojol te ants winiketik ta Balumilal? Te Biblia jich ya yal: «¡Pero ay me swocolic te machʼatic nahinemic ta bahlumilal soc ta mar! Como te pucuje, soc bayel yilimba cohemix tal ta atojolic, yuʼun ya snaʼ te nopol ya xlaj ora yuʼun» (Apocalipsis 12:7-9, 12).

Te Satanás sok te pukujetik yuʼun ya xloʼlaywanik sok ya yakʼbeyik bayal swokol te ants winiketik ta Balumilal. Sok jaʼ skontratak te Diose. Spisilik kʼax chopolik.