Atthu otheene oomunepani yaapattuxiwe ni Yehova yaari ooloka. Nto nlaikha nimosaa naahirukunuwa nikhala nootakhala. Nlaikha nno naari Satana Diabo. Satana aaphavela wira atthu a elapo ya vathii amukokhoreleke owo ohiya omukokhorela Yehova. Etthu yiiranen’ye tiila:

Ojardim wa Eedeni, saahikhala mirii sinceene seiyo siima mihokorokho soosiva. Yehova aahimuleela Adamu ni mwaarawe Eva, wira alyeeke. Masi aahikhala mwirii mmosaa yoowo Muluku aahimenrye awe wira ahilyee. Owo aahihimya-tho wi akhala wira yaamoolya, tthiri awo yaarowa okhwa.—Maphattuwelo 2:9, 16, 17.

Nihiku nimosaa, Eva yaari ekhaya vaavo enowa yaalavunle aya n’awo. Tthiri, khahiyo yaari enowa yaalavula; aari Satana Diabo yoowo iirinhe wira enowa ekhaleke ntoko ti yaalavula. Satana aahimuhimeerya Eva wira alya muhokorokho wookhoottihiwa, aarowa okhala oosuwela ntoko Muluku. Satana aahihimya-tho wira owo khaarowa okhwa. Soohimya iya sotheene saari sowootha. Nnaamwi vaari siiso, Eva yaahimukupali Satana nto yaahilya muhokorokho. Vattuli vaya, Eva aahinvaha Adamu muhokorokho ole, ni Adamu khulya-tho.—Maphattuwelo 3:1-6.

Mu yoohimmwa ela yekeekhai, hiyo nniixutta wira Satana namavirikanya ni nawoothe. Owo aahimuhimeerya Eva wira aahimwiiwelele Muluku, owo khaarowa okhwa. Nno waari wootha. Eva ni Adamu yaahikhwa. Satana khaakhwiiye okathi yoole, nnaamwi orowaka okhwa muhoolo mwaha wa ottheka. Nto, okathi ola, owo ookhala ni onnivikaniha  waawoka apinaatamu. Owo nlelo onnootha, ni oneererya owiiriha atthu wira ahiiweleleke malamulo a Muluku.—Yohani 8:44.

Vattuli vaya, malaikha makina yaahirukunuwa akhala ootakhala. Malaikha ala yaahaaweha axithiyana ooreera elapo ya vathii ni yaaphavela orupana. Siiso awo yaahikhuruwela vathii ni yaahiipakela irutthu soopinaatamu. Nto yaahaakuxa athiyana awo. Ela yaari etthu yaavirikanya yoolakela ya Muluku.—Maphattuwelo 6:1, 2; Yuda 6.

Ela yaahaakumiherya-tho apinaatamu mixankiho sinceene. Axaaraya malaikha ale yaahaayara anamwane, masi anamwane ala yaari oovirikana. Awo yaahinnuwa khukhala mikwarapasa soohaaxa ni sootakhala. Okathi owo ni waakelela aya, elapo yaahisareya owali, nto Yehova aahilakela waapwetexa atthu ootakhala orumeelaka epula yuulupale ya mutaaseke. Paahi atthu yooponwe okathi wa Epula ya Mutaaseke yaari anaxariya, Nowee ni emusi awe.—Maphattuwelo 6:4, 11; 7:23.

Nto, malaikha ootakhala, yaahitthikela mapuro ahinooneya; awo khiyaakhwiiye. Masi yaahitthukweliwa. Awo khiyeemereriwe ohokolowela mu emusi ya Muluku ya malaikha a xariya. Nave-tho, Yehova kheemerenrye wira aware-tho irutthu soopinaatamu. Nto muhoolo anrowa okhwa okathi wa yoophukela yuulupale.—2 Pedru 2:4; Yuda 6.

Wanipacerya wa eseekulu evinre, yaahikhumelela ekhotto wirimu. Wisupulula, eliivuru ya Biibiliya ennilavula yeele yiiranen’ye: “Numalà, yahikhumelela ekhotto wirimu. Nlaikha Mikhayeli [Yesu Kristu yoowo ohihimuxiwe] ni makhw’aya [malaikha ooloka] nahiwana n’inow’eyo [Satana]: vano enowa yakhaliheriwa ni malaikh’aya [ootakhala]. Enowa yahiweriwa: tivó khiyàwenrye-tho ophwanya opuro wirimu, khuriheliwa ota. Enow’eyo yulupalexa t’inowa yele ya khalai, enìhaniwa Nwanani walá Satana, yeyo eniwototha atthu othene. Eyo yahiriheliwa elapo ya vathí: Malaikh’aya yahiriheliwa-tho mulaponi vamosá ni yeyo”.

Yookhumelela aya yaari exeeni? Yoolepa ennivikaniha eriki: “Tivó, erimu yothene etteliweke murima, ni nyuwo othene munkhala weiwo!” Malaikha ooloka yanwerya otteeliwa murima okhala wira Satana ni malaikha awe ootakhala, aahiiso minepa, khisaakhanle-tho wirimu. Masi nihimye exeeni sa atthu a valaponi? Biibiliya onihimya so: “Nto nyuwo, elapo n’iphareya, motakhaliwa, mana Satana òkhuruwela wa nyuwo ananariwene vanjene, okhala wira òsuwela wira orina okathi vakhani pahi”.—Wisupulula 12:7-9, 12.

Aayo, Satana ni ale animukhaliherya onnaawoka atthu a valaponi ni waakumiherya ohaawa wuulupale. Malaikha ala ootakhala aniihaniwa axetwani. Awo awanani a Muluku. Otheene aya tootakhala.