Yihooway ayyaana meretata medhdhido wode ubbaykka loˈo. Guyyeppe issi kiitanchchay iita gidiis. I Seexaanaa Dablloosa. Seexaanay, saˈan deˈiya asay Yihoowaayyo goynniyoogaa aggidi baassi goynnanaadan koyiis. Hanidabay kaallidi deˈiyagaadana:

Edene gannatiyaa giddon, maanau malˈiya ayfe ayfiyaa daro mittay deˈees. Yihooway Addaameenne a machchiya Hewaana he mittatu ayfiyaappe coo maanaadan yootiis. Shin gannte giddon Xoossay mooppite giido issi mittay deˈees. Eti appe miikko, tumu hayqqiyoogaa yootiis.—Doomettaabaa 2:9, 16, 17.

Issi gallassi Hewaana barkka deˈishin shooshshay o haasayssiis. O haasayssidaagee tumuppe shooshshaa gidenna; shooshshay haasayiyaaba malatanaadan oottaagee Seexaanaa Dablloosa. Seexaanay, Hewaana he mittaa ayfiyaappe miidaba gidiyaakko, a Xoossaadan aadhdhida eranchcha gidana danddayiyoogaadan yootiis. A hayqqana danddayenaagaakka yootiis. Ha naaˈu odottikka worddo. Gidikkokka, Hewaana Seexaanaa ammanada mittaa ayfiyaappe maasu. Hegaappe guyyiyaan, Addaameyyo immin ikka miis.—Doomettaabaa 3:1-6.

Ha tumu taarikiyaappe, Seexaanay makkalanchchanne worddanchcha gidiyoogaa tamaaroos. Seexaanay, Hewaaniyyo Xoossaa azazetennaba gidikko, hayqqakka yaagidi yootiis. Hegee worddo. Akka hayqqaasu, Addaamakka gidin hayqqiis. Seexaanay nagaraa oottido gishshau he wode hayqqana xayikkokka, sinttappe hayqqanaagee attenna. Gidikkokka i xayana gallassay gakkanaashin, asaa naata balettiyoogaa aggenna. I hanno gakkanaukka worddanchcha, qassi asay Xoossaa higgiyaa menttana mala i oottennabi baawa.—Yohaannisa 8:44.

Takkidi, hara kiitanchchati iita gididosona. Ha kiitanchchati saˈan deˈiya macca asay puulanchcha gidiyoogaa beˈidi etaara asho gayttotetta polanau koyidosona. Hegaa gishshau saˈaa yiidi attuma asa gididi ashuwaa maayidosona. Hegaappe simmidi he macca asata banttassi ekkidosona. Hagee Xoossaa halchchuwaara eqettiyaaba.—Doomettaabaa 6:1, 2; Yihudaa 6.

Hagee asaa naatu bollikka daro metuwaa kaalettiis. Ha kiitanchchatu machchoti naata yelidosona, shin he naati asaa naatuppe dumma. Eti diccidi keehi wolqqaamanne gita, qassi makkalanchchanne meqetti baynnaageeta gididosona. Wurssettan biittay makkalan kummido gishshau Yihooway iita asata gita bashsha haattan xayssanau kuuyiis. He bashsha haattaappe attida asati xillo gidida Nohanne a so asaa xalaala.—Doomettaabaa 6:4, 11; 7:23.

SHin iita kiitanchchati, ayyaana alamiyau simmidi biidosonappe attin hayqqibookkona. Gidikkokka, qaxxayettidosona. Xoossaa yuushuwan deˈiya xillo kiitanchchati deˈiyoosa simmennaadan teqettidosona. Hegaa bollankka, Yihooway eti zaarettidi asadan ashuwaa maayennaadan digiis. Qassikka wurssettan eti gita pirddan hayqqidi xayana.—2 PHeexiroosa 2:4; Yihudaa 6.

Saluwan olay, 1914M.Ln denddiis. Geeshsha Maxaafan Ajjuutaa maxaafay he wode aybi hanidaakko odees: “Hegaappe guyyiyan, saluwan olai denddiis. Mikaa7eeli [hayquwaappe denddida Yesuus Kiristtoosi] ba [xillo] kiitanchchatuura issippe miimminttiyaara [Seexaanaara] olettiis; miimmintteekka ba [iita] kiitanchchatuura gididi, zaarettidi olettiis. SHin miimminttee xoonettiis. Xoonettin miimminttiyaassinne a kiitanchchatussi saluwan sohoi xayiis. Gita miimminttee, xalahe halaqaa woikko Seexaanaa giyoogee, beni shooshshai, sa7a ubbaa balettiyaagee olettiis; i ba kiitanchchatuura issippe duge sa7au olettiis.”

Wurssettan aybi hanidee? Qonccissoy hagaatuwaa gees: “Hegaa gishshau, saluwaunne salo giddon de7iyaageetoo, ufaittite.” Xillo kiitanchchati ufayttana danddayoosona; aybissi giikko, Seexaanaynne iita kiitanchchati woykko iita ayyaanati hegaappe guyyiyaan saluwan deˈokkona. Saˈan deˈiya asaayyo shin? Geeshsha Maxaafay: “sa7aunne abbau aayye7ana! Aissi giikko, xalahe halaqai baayyo guutta wodee attidoogaa eriyo gishshau, wolqqaama hanqquwaara duge inttekko wodhdhiis” yaagees.—Ajj. 12:7-9, 12.

Ee, Seexaanaynne a kaalliya iita yameti saˈan deˈiya asaa balettoosonanne aayyeˈana giissiya wolqqaamabaa oottiiddi deˈoosona. Ha iita kiitanchchati daydanttata woykko xalaheta geeteti xeegettoosona. Eti Xoossaa morkketa. Eti ubbaykka iita.